البلد بتولع يارجاله

يعنى الصراحه ياجماعه الواحد محتار جداّ فى كل حاجه بتحصل فى البلد دى...والله بجد مبقيتش عارفه ازاى وفين وامتى الدنيا حوالينا هاتفضل ملغبطه كده
يعنى الواحد يقرأ الجرايد يجيله غباء...يتفرج على التليفزيون الغباء بيزيد...يسمع الاخبار دى بقى ملهاش حل ...يعنى مثلا لو حد فيكم زيى كده عايش فى بيت كله ثقافه ومتربيين على ان الجرايد دى حاجه اهم من اهم حاجه (انا بابايا بيجيب الاخبار والاهرام والجمهوريه والوفد والاهرام المسائى والمساء والمصرى اليوم والاهرام الرياضى والدستور والاسبوع وصوت الامه وساعات الفجر وافاق عربيه وطبعا وفد الفيوم لما بيكون فيها وفد) وانا بقى الاقى قدامى الجرايد دى كلها لازماً وحتماً ولا بد على الاقل اتصفحها واعرف الدنيا فيها ايه اذا مقعدتش اقراها كلها
وده بقى اللى لاقيته فى جرايد الاسبوع اللى فات بالذات وبرامج التليفزيون طبعا وهاسيبكم انتوا تحكموا
* اولا حكايه انفلونزا الطيور اللى اتحورت دى...طب اتحورت فين مش هما اعدموا كل الطيور وسابوا المرض فى المواطنيين بس ...ده كمان قالوا ان مصر وتحديدا الفيوم تعتبر من المناطق المعرضه للوباء ( يعنى انا لو قعدت فتره مكتبش ياريت تسألوا عليا وربنا يستر مياخدنيش الوبا)
طب وعدم اللامؤاخذه دى بقى هنعمل فيها ايه دى بما اننا معرفناش نسيطر على المرض الاصلى
* حكايه اكياس الدم الملوثه وفلاتر الغسيل الكلوى والبلا الازرق اللى نزل على دماغنا ده هو مثلا احنا كنا ناقصين...وبعدين تشوف الناس فى جلسه لجنه الصناعه والصحه بتاعه مجلس الشعب ( بكسر الشين ) تحس انهم كلهم بيخبطوا فى بعض وخلاص انصار هانى سرور وانصار حيدر بغدادى وانت بقى تتوه وسطهم ده غير السيد المحترم المبجل حمدى السيد وربنا الراجل ده انا بحبه لله فى لله حاجه كده الهيه كله ذوق وادب واخلاق عاليه وحاجه كده سكره
المهم يعنى حد يتكرم ويتعطف ويقولى الحقيقه فين؟ مين الكويس ومين الوحش؟
*التعديلات الدستوريه بين مؤيد ومعارض ومش فاهم ( زى حالاتى كده) ناس بتقول وحشه وناس بتقول حلوه وانا مش فاهمه ايه أليه تعديلها او تغيرها
*سفاح المعادى..على غرار التوربينى كده ...برضه ناس بتقول انه موجود وبرنامج (هو فيه ايه) بيقول ان مفيش سفاح واحنا اللى بنهول وبعدين تلاقى واحده اتضربت بسكينه غير التلاته اللى كانوا فى الاول وبرضه مفيش تأكيد غير انهم قبضوا على المشتبه فيهم وغالبا بيتعذبوا دلوقتى علشان حد فيهم يعترف ويقر انه هو السفاح
اطرف خبريين اللى جايين دلوقتى
* سعد الصغير بنى مسجد علشان الناس تدخل تصلى فيه طبعا مفهومه دى ...بس اللى مش مفهوم ان الناس مدخلتش ليه بقى
الشيخ محمد المسير قال ان فلوس سعد الصغير حرام ومابنى من حرام فهو حرام وان ميجوزش الصلاه فى المسجد ده
بس الدكتور سعاد صالح قالت لأ ينفع طبعا ودلوقتى هى بتدى دروس هناك وبتدافع بضراوه وشراسه عن المسجد كأنها هى اللى بنته _ الست دى من ساعه النقاب وبقت بتقول حاجات عجيبه وربنا
وبرضه بيتخنقوا علشان سعد الصغير
ده غير طبعا خناقات سعد وشعبان عبد ال رحيم على اغنيه الحمار وخناقات سعد والمبدع مرهف الحس عميق المشاعر صاحب الصوت الشجى عماد بعرور على رائعه ملاك عادل العنب
* من شويه شفت برنامج الحقيقه بتاع وائل الابراشى اللى بيتذاع على دريم 2 وكان مستضيف فلترواد بييتون ( ارمله جاك بييتون الشهير برفعت الجمال ) ودكتور نبيل فاروق لبحث حاجه مهمه جدا الا وهى : ادعاء المرحوم ايهاب نافع (طليق الست فلترواد بييتون بعد المرحوم جاك بييتون ) ان جوزها السابق اللى هو رفعت الجمال وابنه عملاء للموساد
ان ان ان اةةةةةة
حد فاهم حاجه
مش عدم اللمؤاخذه رفعت الجمال ده الجاسوس المصرى الشهير اللى كان السبب فى كشف ايلى كوهين كعميل للموساد الاسرائيلى فى سوريا وهو اللى عرفنا مكان خطوط النابلم تحت القناه واللى معلوماته كانت من اهم اسباب نجاح حرب اكتوبر (مش الضربه الجويه يعنى) ازاى بقى يجيى واحد مش عارفه اقول عليه ايه علشان هو دلوقتى اكيد فى موقف يحتاج مننا الدعاء ليه بس يقول ان رفعت الجمال وابنه كانوا عملاء للموساد بغض النظر عن مدى صحه او خطأ معلوماته يعنى بس رفعت الله يرحمه جاى هو بيخبط فى مين دلوقتى
وبعدين الست فلترواد (اسمها عجيب اوى ) جايه عايزه تبرأ ساحه جوزها السابق وابنها من واحد الله يرحمه كتب كتاب عنهم بيتهموهم بكده...كانت فين قبل ما يموت
لأ وكمان جايه تخبط فى السيد نسيم وزملائه وتقول انهم مانعيين ابنها من الحصول على الجنسيه المصريه وانهم اخفوا اوراق جوزها عنها وهى عايزاها دلوقتى
الراجل الله يرحمه مات وشبع موت وجايه دلوقتى تطالب بايه وبعد ايه
لأ وكمان زعلانه انه كان عيان وبيموت فى المستشفى ومحدش من المخابرات سأل عليه ( اخص الله يسكفهم) انا مفهمتش هى عايزه ايه الصراحه
بس ايه دكتور نبيل فاروق افحمها وكل ماكانت تتزنق فى رد عليه كانت تمسك ملف ابيض وتقول انا مش راضيه اتكلم علشان متحصلش مأساه
لا والنبى اتكلمى...اتكلمى ياشيخه ولا يهمك جات عليكى يعنى
واخيرا وليس اخرا لا اجد كلمات تسعفنى فى وصف حديث السيد حبيب اللى مش عادلى للسيد اللى ...محترم مفيد فوزى...خيبه الله عليهم هما الاتنين فى ساعه واحده
وكل عيد شرطه وانتوا طييبين وعن الاقسام بعيدين ومن المحاضر مرحومين وكلمه واحده عن الظباط هادور فيكم الضرب وهابلغ عنكم كلكم
احترموا وجودى شويه
يلا بألف هنا شويه الحاجات اللى فاتت دى
متنسوش تغسلوا رجيلكم قبل ماتناموا
تصبحوا على خير
وعلى رأى الست والدتى
تصبحوا قطط من غير ديل

محمول الى الابد

وكما وعدتكم اعزائى القراء باستكمال باقى الحلقات المسلسله عن تداعيات اعلانات شبكه ام نبيل لخدمات المحمول ممثله فى استبيان شعبى قام به شباب مركز شباب كفر ابو طشت عنهم الساده الافاضل
الاستاذ/ ابو المحمول الاريلى....والاستاذ / شبكه ابن ابى الجراب الاهطل
واليكم اخر ما وصلوا اليه فى الموضوع محل النزاع
*******************************************************************
تحذير للساده اصحاب القلوب الضعيفه ومرضى السكر والضغط والسيدات الحوامل ...برجاء عدم قراءه السطور الاتيه حفاظا على ارواحكم
*******************************************************************
خرجت انا وزميلى وصديق كفاحى الاستاذ شبكه ابن ابى الجراب الاهطل لدراسه ظاهره اعلانات شبكه ام نبيل ومدى تأثيرها فى السوق المصرى على المستهلكين الغلابه وذلك نزولا على رغبه الجماهير المعارضه للاعلان والاغنيه التى تبثها القنوات الارضيه والفضائيه مرارا وتكرارا
نزلنا الى شوارع المحروسه لتفقد الحاله المعدنيه للجماهير ممثليين فى احدى مقاهى المحروسه وتسمى...مقهى العاطلون يجتمعون
وقابلنا هناك المواطن المصرى العبيط وكان الاتى
ابو المحمول : سيدى الفاضل المواطن المصرى الاصيل...بدايه ارحب بسيادتكم فى حديثنا المسجل كتابه وصوتا...ونرغب فى معرفه راى سيادتكم الكريم فى ماتبثه شبكه ام نبيل لخدمات المحمول من اعلانات تخالف القواعد والاعراف والتقاليد المتبعه فى ماضينا العريق...كتشويه اغنيه داليدا الراحله وتعمد نشر الفساد بالرغم من انتشاره الفعلى بين الشباب اضافه الى الاستهجان من باقى محافظات مصر بعدم ذكرها فى الاغنيه ناهيك عن الاستبعاد المباشر لمركز شباب كفر ابو طشت واغفال ذكره المعتمد فى الاغنيه...ويشرفنى سيدى ان اعلمكم ان رأيكم الكريم سيساهم بشكل كبير وفعلى ومباشر فى طلبات الاحاطه والاستجوابات التى نرغب فى تقديمها فى مجلس الشعب لوزير الاتصالات والمواصلات والصحه والاعلام والتنميه المحليه والداخليه والخارجيه وكل وزارات وكل مسئول له علاقه بالامر من قرب او بعيد وذلك ايمانا منا بضروره وجود رداع لمثل هذه الممارسات...؟
المواطن المصرى وعلامات الغباء واضحه وضوح الشمس : يافتاح ياعليم يارزاق ياكريم ...ايه ياعم الامور انت مالك داخل حامى كده ليه وكمان بتكلمنى انجليزى ...ليه شايفنى داهن شعرى جيلى ولا مثلا مثلا شايفنى لابس بلوزه اختى الصغيره وبنطلونى عند ركبى...ياعم اتكلم عربى وحياه والدك ده حتى النبى عربى
ابو المحمول باستهجان وقرف : ياعم ما انا كلمتك عربى ولا ايه اللى انا قولته انجليزى اساسا فى الفيلم اللى قولته ده كله؟
المواطن المصرى وهو يزغر بعينيه : لألألأ اقف معوج واتكلم عدل...انت بتكلم واحد معاه دبلون مش اى حاجه يعنى ولاتكونش فاكرنى امى ولا تكونش فاكرنى امى
شبكه وهو يتدخل لفض اشتباك وشيك الحدوث : صبح صبح ياعم الحاج...اهدى كده يامعلم ده صاحبى بس بيحب يهزر شويه...قولى يامعلم انت بتتفرج على روتانا سينما او شفت اعلان ام نبيل عليها مثلا فى اى حته؟
المواطن المصرى بفرحه وغبطه :روتانا سينما مش هتقدر تغمض عينيك (هههههههه) لا ياحبيبى معندناش دش لا بشوفها ولا بشوف اختها فى الرضاعه ميلودى تتحدى الهبل بهبل اقوى منه
شبكه : طيب يمكن تكون شفت الاعلان على القناه التانيه الارضيه ده اصله بيجيى كتير اوى فى برنامج البيت بيتك عارفه ولا ايه ؟
المواطن المصرى بقرف واضح : لا لا لا من ساعه ما قالوا ان برنامج البيض بيضك بيسبب عدوى انفلونزا الطيور واحنا بعنا التليفزيون واشترينا بداله فيديون اهو برضه اضمن منه
هو انتوا عايزين ايه عدم اللامؤاخذه؟
ابو المحمول : انا اقولك احنا عايزين ايه...انت عندك موبيل...فوله فون ولا ام نبيل...خط ولا كارت...كنترول ولا مفتوح...سحرى ولا ساحر...جاوب برجلك اليمين والنبى؟
المواطن المصرى: بالراحه ياعم الحاج عليا ...انا كان عندى عده شعبيه 3310 من غير خط من يجيى سنه وشويه بس بعتها للواد حموقه اللى فاتح على اول الشارع على ايدك الشمين وادانى مكانها علبه سجاير نص مستورده من الزمالك يعنى ...بس لو ليك شوق تشوفها ممكن اخدك هناك هو عامل النص ساعه باتنين جنيه وممكن يكرمكم علشانى
شبكه : طب بلاش الموبيل..انت ايه رايك فى سياسه الاحتكار فى سوق المحمول وتأثيرها على المواطن المصرى؟
المواطن المصرى : سياسه ...والله يامحترم سياده الريس ده راجل زى الفل وبتاع ربنا والمحروس ربنا يبارك فيه راجل جدع فعلا لا وكمان كلاب الحراسه اللى قدام القصر كلاب متأصله بجد
ابو المحمول : ياعم حد جاب سيره الريس ولا ابنه احنا بنسألك عن الموبيلات تقولى الريس؟
المواطن المصرى: وماله الريس ياعينيا احنا هنغلط ولا ايه ؟
شبكه : ايه ياعم هو حد قال حاجه بس احنا بنتكلم فى موضوع مهم خلينا فيه احسن
المواطن المصرى وامارات الذكاء والفهم جاليه على وجهه : اه ه ه ه ه ه ه انا عرفتكم يااولاد المبقعه...انتوا خونه وعملاء وجايين تقلبوا نظام الحكم فى مصر....تلاقيكم من كفايه ولا من الاخوان ولا حاجه
ابو المحمول: شكلها قلبت بضلمه...اخوان ايه وعملاء ايه ياعم...خلاص خلاص الطيب احسن احنا هنمشى ونسيبك فى حالك
المواطن المصرى بشراسه سبعه الاف سنه : ليه وهو انت فاكر دخول الحمام زى خروجه ياصغنن...وهو ينادى بعلو صوته على رفاقه فى المقهى...دول من كفايه يارجاله...خياااااااااااااااااااااانه
اه ه ه ه ه ه ه
ايه ده...هو احنا عملنا ايه
وكان هناك على شريط التسجيل كثير من الطااااااااااااااخ
والطوووووووووووووخ
والطييييييييييييييخ
وحرمت...سيبونى والنبى
انا معملتش حاجه
ووجدنا مذكرات ابو المحمول تباع فيها التسالى واللب فى احدى مقالى المحروسه ولم يستدل بعد على اى اثر لمراسلينا ...اغلب الظن انهم فى احدى مقار امن الدوله المنتشره كالنار فى الهشيم
وهذا نداء منا لاصحاب القلوب الرحيمه من ظباط امن الدوله الافاضل....احيطونا علما فقط بمكانهم اهو سجن مزرعه طره...او ابو زعبل او تم ارسالهم بالبريد السريع الى جوانتانامو
ولتعيث ام نبيل ومثيلاتها فسادا فى المحروسه بدون قيد او شرط ولكن دعوا الغلابه ولاد الغلابه ليعيشوا

كانت معكم
ام بدوى مراسلتكم...رنا سابقا

يارب يا ربنا...تكبر وتبقى قدنا

لم يكن هناك صراخاُ
لم تكن هنا اسباب واضحه للوجوم الظاهر على الوجوه
لم تكن الدموع الحبيسه فى العيون تجرؤ على الفرار منطلقه تروى انهارا من القلق والخوف بداخلنا
الجيع ما بين مترقب وخائف...مذهول ومنتظر...سعيد وطائر من الفرحه
حتى خرجت علينا تحمله وتلفه بغطائه ذو اللون السماوى المحبب للعين الدال على من بداخله...انه من جلسنا شهورا واياما بانتظاره
تسعه وثلاثون اسبوعاً بالتمام والكمال لاينقصون يوما ولا يزيدون جلسناها على احر من الجمر لرؤيه ذلك الملاك البرئ الذى حباه الله باربعه خالات كأنهن الحموات الفاتنات
اختى ولدت يارجاله
وجابتلنا احمدوى الصغير ...حاجه كده تشوفها تحبها
هو مش باينله ايد من رجل من راس ولحد دلوقتى مفتحش عينيه على الدنيا الهم اللى اتولد فيها بس بجد...مشفتش عمرى (ماشاء الله ,الله اكبر) طفل امور كده اول مايتولد
حلاوته بصراحه متجيش حاجه جنب واحشتى لما اتولدت ( اصل انا كنت بشعه لما اتولدت الحقيقه ) بس بجد الله اكبر عليه حاجه كده تمسكها تخاف تتكسر ...تبوسها متبقاش عايز تبطل او تبعد عنها...تمسك ايده اللى صوابعه فيها شبه ضوافرنا (على راى باباه ) تبقى هتاكلها...ورجليه ياجماعه...انا اول ماشوفت رجليه حلفت يمين تلاته لازم اتصور جنبها وفضلت ابوس فيها لما ماما قامت زعقتلى وقعدت تقولى هتاكليه...انتى اول مره تشوفى طفل حلو ولا ايه
احمد ان شاء الله اول حفيد فى اسرتنا...هياخد من الدلع تلال...ومن الحب انهار...ربنا يستر عليه بجد
ويخليه لمامته ولباباه واحنا طبعا...خالاته وجده وجدته
ويكبر يارب ويقولى يابنت ياخالتو رونى..ويقول لامى يا نانا غصب عنها ...ولابويا جدو غصب عنه برضه
واشوفك كده يااحمد يارب عيل عفريت كده وتاعب الكل بشقاوتك (اصل انا مبحبش العيل الملل ) وتلعب وتجرى حوالينا ومعاك عيالنا بعد عمر طويل ان شاء الله
تقام العقيقه فى بيتنا ان شاء الله والسبوع شرحه...ومش عايزين طفاسه وقله قيمه انتوا لسه خارجين من عيد اللحمه واكلتوا لما قولتوا يابس
متفضحونيش بقى...أللى عايز ينقط بحاجه يقف على اليمين ( ايدك اللى بتاكل بيها يا حلو ) شكلك بتاكل بايديك الاتنين
واللى جايب هديه...يقف على ايده الشمال
واللى جاى لوحده بطوله يعنى...اهلا وسهلا نورت

اختى حبيبتى
بورك فى الموهوب وشكرت الوهاب...ورزقت بره وبلغ اشده
اللهم امين
بعد كده اللى داخل يقولى ياخالتو رونى والنبى

ورانا ايه...ورانا ايه...!؟

ايماناً منى بالدور القويم الذى تقوم به شركه ( ام نبيل خدمات المهبول ) فى السيطره على سوق المهبول المصرى كليه وجزئيه طولا وعرضا ...ترسيخا لفكره انها شبكه المهبول الاولى فى مصر ...... وذلك تدعيما لمبدأ ان السيطره الاقتصاديه يلزمها غيابا فكريا وعقليا ...اخلاقيا وسلوكيا...وذلك بوضع عده اهداف عامه وخاصه فى نفس ذات الوقت عملا بمبدأ النجاح يلزمه معرفه والمعرفه يلزمها مواكبه وسائل تطور الانحطاط الاخلاقى واللاخلاقى فى ظل غياب اليات المراقبه وعدم تفعيل دور الرقابيات فى بناء الدوله وتفعيلها فقط فى الهيافات ...ونذكر بعضا من هذه الاهداف
اولاً: مسح الشركات التى نافست او تنافس او سوف تنافس فى يوم من الايام وفى اى مكان صحرا ان كان او بستان باستيكه روترنج ...وقطع ارجلها من الدخول فى اى سوق اخرى عملا بمبدأ " انا زى الفريك محبش شريك " ومن امثال هذه الشركات المدحوره المهزومه __ فوله فون لخدمات المهبول
ثانياً: زياده جرعه الفساد والانحطاط الاخلاقى فى ما يشاهده المواطن المصرى العبيط
ثالثاً: دفع الشباب لاستيعاب الهدف الاساسى الوحيد والاوحد من المهبول فى مصر وهو التعارف والتألف وقله الادب
رابعاً: الاتفاق مع بعض الجهات الفضائيه على تسميم الذوق المصرى بدفع عدد من ممن يقال عنهم زورا مغنييون اصحا الاصوات النشاذ فى اغنيه واحده وعدم مراعاه الشعور الوجدانى فى الانفعاليه الشعوريه لمرضى القلب والسكر والنقرص
خامساً: التشويه المتعمد للتراث الاصيل _ داليدا على وجه النحديد
وامعانا فى استخدام وتطبيق نظريه المؤامره علينا كشعب مصرى عريق لابد وان نشير الى ان مصرنا الحبيبه الان تمر بعده خطوات هامه ومنطقيه تجاه تعديلات دستوريه هامه وبناء _او هدم _ البنيه التحتيه والنص نصيه وايضا لانغفل مرورها بتلك الوعكه الصحيه والسجال السياسى الذى تعانى منه والذى لم يعرف بعد فتره حضانته او علاجا معروفا له ...قامت شبكه ام نبيل متعمده مع سبق الاصرار والترصد بتجاهل كل ما سبق والاتيان بتلك الفعله المنكره الشنعاء ...وذلك ببثها ذلك الاعلان والاغنيه المصاحبه له" احسن ناس "...متجاهله كل الاعراف والتقاليد وما نحفل به نحن المصرييون ....لذلك اليكم اعزائى القراء على حلقات مسلسله تحليلا منطقيا وموضوغيل محيادا للاعلان والاغنيه مصحوبا باستفتاء واستبيان شعبى لبحث وجهه النظر المصريه الشعبيه فى الاعلان
وقام باجراء الاستفتاء للحلقه القادمه...شباب مركز شبياب كفر ابو طشت
والان اترككم لتحليل الاغنيه
**************************************************************************
باخره تمخر عباب النيل تصاحبها موسيقى
نررررم...تاااااارررر.....ترررررررررر...ترررررررررر
ادينا بندردش...ورانا ايه...ورانا ايه...!؟
كا اجابه عن سؤال المحترم..ورانا ايه..!؟
ورانا بلد نبنيها.... نعمرها ....نسدد ديونها....نفرج عن مسجونيها...ونطرد امثالك منها
وبالنسبه للبلوزه البمبى اللى حضرتك لابسها دى انا مش هتكلم عنها علشان دى خلقه ربنا بس هى حريمى اوى ياكابتن
من حقنا نفرفش...ورانا ايه...ورانا ايه..!؟
الاخت دى بالذات وراها غسيل وطابيخ ومطنشه ودايره بس تقول
هو ده ...مسحوقى حبيبى
هو ده...مغسلش الا بيه
هو دهي ايوه ده...اللى انا عينى عليه
وبعدين سيادتك احنا منهوبين ومتبهدلين ومنفوخين وتقوليلى نفرفش...وماله ياحبيبى
نحب نتعرف....ورانا ايه...ورانا ايه..!؟
نتعرف ازاى يعنى...اعتبر ده وعد..؟
نتعرف بايه ومين وازاى؟؟؟ انت بتخاطب شباب مش ناقص بوظان اساسا ...وانا من موقعى هذا كرسى المكتب يعنى...احب اقول لاى شاب تسوله نفسه بتصل بيا يقولى نحب نتعرف
وحياه امى معنديش غير الشبشب ابو صباع
نحب نتشرف...ورانا ايه....ورانا ايه..!؟
وعلى راى المثل
وما الدنيا الا شات روم كبير
ومنين يابلدينا ...وبلدكم ايه...؟
هما نسيوا ورانا ايه...بس انا فاكره
ورانا ايه...ورانا ايه..!؟
لو حد بقى سألك السؤال ده عزيزى القارئ على طول ترد وتقوله
اى دونت سبيك انجلش ولا عربى
ولو اتزنقت اوى ياريت تقوله ساحل العاج او تمبكتو..هى بلد بس معرفش فين
بس بلاش مصر وحياه والدك والا هتلاقيه يرد يقولك
احسن ناااااااااااااااس
ام نبيل بتغطى 99% من سكان مصر...احسن ناس
طب مش بالذمه دى تبقى تفرقه عنصريه وزعزعه للامن القومى وزريعه للفتنه الطئفيه وتغذيه للصراع الطبقى والحقد الداخلى والخارجىزززطب وحمله خطوط فوله فون ينتحروا بقى ولا ايه...طب واللى معندهمش عدد ارضيه اساسا ولا اللى لاقيين يتفرجوا حتى على العدد العاديه يعملوا ايه
وبعدين نيجى بقى للاغنيه اللى ذكرت
سوهاج...برج الزغاليل...انفلونزا الطيور
بنها ...ألكوبرى...هاتدى لحبيبها طرف عينيها اللى معرفش هو فين
الاسماعليه...بعد المغربيه لان المحافظه بتفقل تقريبا بعد كده
المحله...ياسمنودى...وانا معرفش هو مين
اسكندريه...اجدع ناس
شبرا...مصر واولادها الطعمين...الاخت بتاعه الغسيل بتبيع ورد وفل فى الاشارات دلوقتى
------------- وباقى محافظات مصر
كل سنه وانت طيب راحوا مع اللى راحوا...اخدهم الوبا ياامه...راحوا فى 67 ...مهمش ام نبيل طبعا
طب مش دى بقى تبقى فعلا زعزعه للامن القومى ومصدر للمظاهرات
انا من مكانى هذا اطالب باغنيه للفيوم والفيوميه ولو حتى كانت...كوكى كا كوكى كا ولا اى حاجه تعبر عنهم
ولكن يبقى السؤال الاذلى
ورانا ايه...ورانا ايه...!؟

الحلقه القادمه يوميا محموليه بحته

اعلان مكتب الخبراء...هو ايه اساساً

بصوا بقى علشان انا فاض بيا الكيل وقربت انفجر من جنابى...ألاعلان اللى هاقوله ده حديث جمهوريه مصر العربيه من قبل العيد وكان منشور فى الاهرام فى صفحه حقيره بخط احقر علشان محدش يشوفه بس للاسف حد شافه ونشر الخبر وفضح الدنيا الخبر بقى الجاى
(بس طبعا انا هختصره علشان الامراض المزمنه اللى عندنا)
"وزراه العدل_ مصلحه الخبراء _ تعلن المصلحه عن حاجتها لشغل وظيفتى معاون خبير حسابىوهندسى من الدرجه الثالثه بمجموعه وظائف الخبره ...ألخ الخ الخ....من الحاصلين على بكالريوس احدى كليات الجامعات المصريه من خريجى دفعات 2003 ومابعدها بالتخصصات الاتيه
اولا بكالريوس تجاره شعبه محاسبه
ثانيا بكالريوس هندسه شعبه مدنى, عماره, ميكانيكا ,هندسه كهربيه _حاسبات ونظم الالكترونيات والاتصالات الكهربيه_
ترسل الطلبات...ألخ الخ الخ ...بالبريد المسجل مصحوبا بعلم الوصول خلال خمسه عشره يوما من تاريخ النشر ويكتب على المظروف اعلان رقم واحد ويرفق بالطلب المستندات الاتيه
( حد يسمعنى زغروده بقى جامده اوى على المستندات الاتيه دى)
1- صوره ضوئيه من الشهاده الداله على التخرج موضحا بها عدد الدرجات التى حصل عليها الطالب وعدد الدرجات الكليه والتقدير العام للنجاح
2- صوره ضوئيه بتقديرات المواد الدراسيه خلال سنوات الدراسه
(تفرق ايه دى عن اختها اللى فوقها انا الحقيقه معرفش)
3- صوره من شهاده الميلاد اوصوره مستخرج رسمى منها
4-صوره الرقم القومى
5-صوره الشهاده الداله على التجنيد
(مش ليا ياجماعه علشان محدش يفهم غلط)
6-.....
7-......
8_ صوره من بطاقه القيد بعضويه نقابه التجاريين او المهندسيين
( مع انى ولا كنت ناويه اتقيد بالنقابه اساسا)
9- صحيفه الحاله الجنائيه
( الفيش والتشبيه يعنى)
10- عدد 6 صور فوتغرافيه حديثه
11- اقرار بقبول التعيين باى من مكاتب الخبراء الموضحه بهذا الاعلان قرين كل تخصص مع مراعاه الا يزيد سن المتقدم عن 28 عاما فى 1-1-2007
ولن يلتفت الى الطلبات غير المستوفاه او المقدمه باليد او السابقه على الاعلان او المرسله بعد اليوم المحدد"
كده الاعلان خلص وباقى انى اعلق عليه ومعلش هاطول عليكم
حد غيرى لاحظ ان الاعلان ده كان ناقص اسامى الناس اللى هاتتعين فى الوظايف اللى بيعلنوا عنها دى
طب حد غيرى لاحظ ان بيان الدرجات او التقديرات اللى هما طالبينه ده مش بيطلع غير بالطلب لان محدش بيهتم بيه والكل بيهتم بالشهاده المؤقته
طب حد غير اخد باله ان الفيش والتشبيه ده لوحده بالنسبه لسكان المحافظات بياخد مش اقل من 5 ايام وهايبقى بالواسطه
طب حد اخد باله بقى ان الاعلان ده نزل يوم24,25-12-2006 وان ال 10 يوم اللى بيقولوا عليهم دول داخل فيهم اسبوع العيد باجازاته وعيد القيامه الاسبوع اللى بعده
طب انا رضيت بقضاء ربنا وقدره وقولت اشد الرحال على جامعتى علشان اطلع البيان المنيل ده وصلت الكليه الساعه 9:30 وخرجت منها الساعه 4:30 بخفى حنين
لا عملت الورق ولا نيلته وفيه ناس علقت امال من قبلى وراحت قبل العيد ولسه مخلصتش الورقه دى لحد دلوقتى
طب النكته بقى " الشهاده المؤقته بتاعتى مكتوب فيها
تحريرا ( الشهاده يعنى ) بتاريخ 18-12-2006
وبخط بالايد تحتها مكتوب حاجه حلوه اوى
اعتمدت النتيجه فى 19-12-2006
يعنى انا ناجحه قبل النتيجه ماتخلص وورقى خالص وكله تمام بس العميد من حبه فيا كان مقعدنى جنبه
طب يرضى مين ان الموظفين بتوع شئون الطلبه اللى العنكبوت عمل عمايله فيهم وحواليهم يتحكموا فى الطلبه بالشكل الفظيع ده وطبعا مقولكوش بقى ولا فيه نظام ولا ورق بيمشى ولا حتى الوسايط نافعه( الكدب خيبه انا جربت ومنفعش)
طب بلاش الموظف اللى بيكتب بيان الدرجات ده بيبقى الورقه مطبوع فيها المواد وهو مجرد بينقل الدرجات( وخلوا بالكم من انه بيكتب الدرجات فى ورقه مكتوبه اساسا ) قعد من الساعه 10 لحد الساعه 1:30
مش بيخلص ورق لاى طالب قال ايه اصل نتيجه سنه تانيه تحت فى شئون الطلبه ...ومجبتهاش وانت طالع الصبح ليه ؟؟؟ معطل امه لا اله الا الله ليه؟؟؟؟ واساسا بقى انا دفعتى اللى كلها النهارده رايحه تطلع بيان الدرجات ده كانت 1816 ده غير التلات دفعات اللى قبلى وكانوا بالالاف طبعا يقعد موظف واحد يعملوهم ورقهم ليه.... سوبر مان
طب خد دى كمان بعد ما بتطلع روحك وروح اهلك وجدودك لحد ماتوصل شجره العيله لرمسيس الله يرحمه تاخد الورقه اللى اقل ما يقال عليها انها تقرف وتروح بيها عند الموظفه اللى هاتكتبها على الكمبيوتر...طب لما هى كده كده لازم تتكتب كمبيوتر ليه من الاول بتبقى يدوى ...معرفش
الست بقى بتاعه الكمبيوتر دى قاعده فى اوضه كده شرحه وبرحه وفجاه لاقينها صرخت....اه وربنا وراحت مطلعه الطلبه كلهم بره وقفلت على نفسها الباب وكل نص ساعه تطلع ورقه كتبها.... غالبا قالت تخلص الغدا الاول وفضلنا على الحال ده لحد الساعه 4:30 صاحبتكم بقى كانت تعبت وجاعت ونعست وكل ما يخطر ببالكم خطر ببالى طبعا رحت داخله الاوضه بتاعه الكمبيوتر دى كيفما الاسد الجسور وكانت كلها اولاد ودفعتى وشايفنى اربع سنين مش بيطلعلى صوت اهم سمعوه
دخلت لواحد واقف فراض باينه ولا ايه وقولتله انتوا قدامكم قد ايه وتخلصوا انا زهقت وبصتله من فوق لتحت كده...رد عليا ببرود وقالى عدى علينا كمان اسبوع
الدم غلى فى عروقى وعينيا احمرت ورحت شمرت كمى ودخلت بين الاولاد وقولتله احنا هنهزر....خلوها الورقه المعفنه دى اشبعوا بيها
مش عايزه حاجه من وشكم
ومكتب الخبراء ده يعنى مش مستنينى وان شاء الله هايجيلى الاحسن منه
بس حرقه الدم بقى مقولكوش الحقيقه بس مره تانى ابقى احكيلكم
تصحبوا على خير

happy,happy and happy days

dear friends of mine ,
happy feast to u all and for sure happy new year also.. i wondered this year why this many feasts came one after the other , i thought for a second that it might be a bad luck and it means that we will face lots of problems and disasters along this new year....OK OK don't worry it was the thoughts of my dark me or i can say it was the evil me , then i had a dream of me running in a green farm with the one i love he told me its all going to be alright and i wont cry again coz he is here with me now and nothing and nobody would ever hurt me again .i woke up with a big smile over my face it was a dream but one day it will be the fact of my life.
i could feel his worm love around me now , so i could tell you for sure its going to be a lovely year , i know it now hope u too find this out through the coming days .
happy new year again
yours
"Rana"

خارج نطاق الخدمه

لظروف خارجه عن ارداتى طبعا ...اعتذر انى اكمل باقى الحكايات لظروف خاصه بنفسنويتى
انا اسفه بجد كان نفسى اضحكم بس للاسف لو كتبت اى حاجه دلوقتى هانكد عليكم
وهاتشفقوا عليا بقى وحاجات كده وانا مش بحب احاسيس التعاطف لان غالبا بتبقى نابعه من الشفقه
المهم يعنى انى اتغدر بيا من اعز اصحابى ولاسف ملوش حل ضيقى غير انى انسى
انا بس بطلب منكم بس ....تدعولى
ادعولى اعرف الناس بتكذب ليه
ادعولى انى ابطل اثق فى الناس
ادعولى انى افهم انا ليه حصلى كده
وده مش ندم على الصديق....ده ندم على صداقه مكنش يستاهلها
ادعولى بجد

ها نقول كمان ولا كفايه

ها يا حبايبى انبسطوا المره اللى فاتت...طب خدوا عندكم دى كمان
بما انى بنت روشه اوى زى ماانتوا شايفين ودمى خفيف اوى _يطلش الحقيقه_ وحلوه واموره واقدس الحياه الزوجيه ...مش عارفه مين اللى بيقول كده بس هما بيقولوا
المهم يعنى لينا واحده جارتنا اخدت على عاتقها مهمه تزويجى ومحدش برضه يسأل ليه
بس زى ماانتوا شايفين برضه لازم فى كل جوازه تطلعنا طنط شكريه بتاعه برايد
بس الحمد لله هى لسه موصلتش لحد طنط شكريه ومجايبها يعنى
يعنى مطولش عليكوا ولا اطول بر احتى برضه...ده بلوجى ولا ايه
طنط دى بتشتغل فى المحكمه...ومحدش يسألنى بتشتغل ايه علشان انا معرفش
المهم الاول وانا فى سنه رابعه اتصلت بمامتى _كانت اختى اتجوزت وقتها الدور عليا يعنى فى القطر_ان عندها عريس مواصفاته كالاتى
خريج المعهد العالى للخدمه الاجتماعيه _مدينه نصر( الكعب العالى لو تعروفه) وها _ وخلوا بالكم من ها دى _ ها يشتغل فى المحكمه
بس ايه عنده محل موبيلات قدددددددددددددددددددددد الدنيا
.
.
.
.
بس خلاص انتوا مستنين حاجه تانى؟
اصل دى المعلومات اللى توافرت عنه
طبعا انا قولت لا
اولا علشان انا مفهتمش هايشتغل ايه فى المحكمه بس حاسه ان المحكمه دى مفيهاش شغل اصلا
وثانيا يعنى ايه محل موبيلات
وثالثا اسمه ايه
ده كان واحد
الست برضه لسه عايزه تخدم
قامت اتصلت بمامتى برضه وقالتلها مواصفات العريس التانى
بيشتغل فى المحكمه
وعنده محل كمبيوترات
وخريج تجاره خارجيه
والمره دى قالت اسمه بس بلاش علشان الاحراج
المهم يعنى المشكله فين بقى
مهو لازم كل حاجه يبقى فيها مشكله
انه قاعد فى قريه تبع مركز من مراكز الفيوم ومفيش امل انه يستقر فى الفيوم
دى طبعا المشكله فى نظرهم
المشكله فى نظرى بقى الاتى
اولا انا ليه اتجوز بالطريقه دى واحد لا يعرفنى ولا اعرفه
ثانيا اول حاجه بيقولها اى عريس بيدخل بيتنا انه سمع عن بابا كتير وكان نفسه من زمان يناسبه
طب مايتجوز بابا طالما هو عاجبه اوى كده
واهم حاجه بقى مين قال انى هاعرف اتجوز واحد من غير مااحبه...مااتعلق بيه...أسهر طول الليل افكر فيه
طبعا فيكم اللى هايقولى زى ماما
افرض طلع كويس...هاقولك افرض مطلعش
افرض عجبك من اول مره...افرض انا معجبتوش من اول مره
افرض معجبنيش...هابقى محرجه وانا بعتذر واحتمال اكون متضرره اوى كمان ومش هاتجوز شفقه انا
طيب افرض حبنى وحبيته...عجبنى وعجبته....وحصلت اى مشكله لاى سبب وسيبنا بعض...يبقى ازاى الحال بقى
او حصلت اى مشكله وفسخت الخطوبه
هاسلم من كلام الناس بقى اللى هاتقول
والعيب كان منه ولامنها؟
اكيد فيه سر فى الموضوع؟
ومش بعيد يستحضروا روح شيرلوك هولمز علشان يعرفوا انا فسخت الخطوبه ليه
وطبعا مش هاسم من مصمصه الشفايف
وياعينى ياحبيبتى...اخص عليه المفترى
وحد يسيب القمر ده يضيع من ايده _اه انا قمر ...حد ليه شوق فى حاجه_ اخص اخص عليه
وبعدين فين احلامى انا ان واحد يموت فيا ويقول هى دى ويجى يجرى عليا ويشوق الدنيا كلها على بابايا علشان يرضى...وانا اقوله ....بحبه يا بابا
طب بلاش
الخطوبه هانقضيها نعرف بعض ...ولا هنقضيها يقولى بحبك وانا اتكسف ووشى يروح ميت لون
المهم طنط الحمد لله فقدت الامل فى اصحاب المحلات والمحكمه وشكلها هاتدور فى مصلحه حكوميه تانيه
تقولوش قاعده على قلبها فى العماره
ولا انا بايره مثلا بتدورلى على عريس والسلام
وبعدين مش العريس ده يشوفنى على الاقل ويلاقينى متعوضش يقوم يسأل عليا يلاقى اصلى طيب يتهبل عليا...انا مش فاهمه بجد
المهم يعنى على ذكر حكايه يشوفنى دى المره الجايه الكارثه بقى الفظيعه
استنوها بقى
ياجماعه الكلام ده بيحصل فعلا انا مش بألف واسألوا البنات يقولولكم

عريس مؤمن

بصوا بقى .....انا شايفه اننا نوعاً ما محتاجين للضحك شويه كتير وانا واحده من ناس كتير اوى بدخل عند (برايد_ عايزه اتجوز) اموت على نفسى من الضحك وامى تفضل تلف حواليا وتقول ايه المجنونه اللى بتضحك لوحدها....علشان كده فكرت انى احكيلكم على اللى بيحصل لينا كبنات عموما فى المواقف اللى زى دى
اول مره يحصلنا كده انا واخواتى وكانت مره فظيعه الحقيقه
اولا انا احب اقولكم اننا خمس بنات انا التانيه...والموقف ده حصل الصيف اللى قبل اللى فات...كنا فى كايرو مول بنشترى حاجات علشان فرح اختى الكبيره كان قرب وبنشترى طبعا حاجات كتير جدا وكلنا لابسين لبس البهدله بقى على اساس اننا هانقعد اليوم كله بره ....يعنى عايزين لبس مريح ومش محتاج مكواه ولا اخاف عليه يتبهدل
المهم دخلنا مؤمن اللى تحت كايرو مول انا وماما واخواتى الاربعه....طلبنا الاكل والحقيقه كنا هانموت من الجوع بعد ما المحروسه اختى طلعت عينينا فى اللف وكنا لسه هانكمل تانى
المهم قعدت انا واختى الكبيره واللى بعدى على تربيزه لوحدنا وماما واخواتى الصغيرين قعدوا على تربيزه جنبنا
علشان تبقى الصوره واضحه ليكم....انا اه عندى 21 سنه بس الواقع بيقول انى ادى تالته اعدادى بالكتير اوى واختى الاصغر منى بسنه واربع شهور شكلها اكبر من اختى الكبيره اساسا
المهم يعنى قاعدين بناكل (سندويتشات جمبرى بالكالايمارى ...وللى ميعرفش غالبا الكالايمارى ده نوع من السمك بس انا ماخدتوش فى المدرسه والراجل قالى جمبرى بالكالايمارى مفهمتش بس كنت جعانه اوى فا عديت الكلمه) المهم وطبعا كنا تلات قمرات مبهدلين قاعدين على التربيزه.....وفجأه
نلاقى واحده جات ومالت علينا وقالت
انتوا اخوات.....يااختى عليكم قمرات
طبعا كل واحده فينا حاطه صوابعها العشره فى بقها وبتاكل ومش فاضيه ترد...اختى الكبيره هزت راسها موافقه يعنى اننا اخوات
وفجأه برضه لاقينا طنط دى راحت ساحبه كرسى وقاعدت معانا على التربيزه...الاكل وقف فى زورنا طبعا وهى قعدت تتكلم
طنط: انا قاعده مراقباكم من بدرى وبصراحه عاجبنى اوى
الله يكرم اصلك ياستى بس احنا بناكل واكيد شكلنا مش عاطفى
طنط: ها ياحبايبى من فيكم الكبيره بقى _وشاورت على اختى الكبيره_اكيد انتى طبعا ياحلوه
بوسى _اختى الكبيره _: ايوه ياطنط انا الكبيره
وهى بتحشر الاكل فى بقها وبتبلع بالبيبسى
طنط: ماشاء الله ولا حول ولا قوه الا بالله...وانتى بقى ياحبيبتى خلصتى ولا لسه بتدرسى؟
بوسى_ وهى ابتدت تفهم الليله : اه ياطنط خلصت ومخطوبه
وصدرتلها الصباع اللى فيه الدبله ...الله يكسفك كنتى استنيتى شويه طيب
طنط _وخيبه الامل اترسمت على وشها_: اه انا برضه قاعده من بدرى وشايفه الدبله بس قولت اقرب اكتر ممكن تكون خاتم
ها بقى ياحبيايبى انتوا منين
انا واختى التانيه قاعدين بناكل وملناش اى علاقه ولا تدخل فى الحوار وسايبين بوسى تقوم بالمهمه دى
بوسى: احنا من الفيوم ياطنط...تعرفيها؟
طنط: اه طبعا ياحبيبتى....احسن ناس
انا اعرف اللى كان محافظ الفيوم من 13 سنه تقريبا...واحنا بقى من اسيوط وقاعدين فى القاهره ....الخ الخ الخ الخ
الحقيقه انا فاكره ان الاكل كان حلو اوى ومكناش عارفين ناكل منها المسكينه بوسى كل ماكانت تيجى تحط السندويتش فى بقها تقعد الست تتكلم تتكسف تروح مبطله اكل
بوسى : امممممم اه اسيوط امممممم اه طيب
طنط: ها بقى ياحبيبتى مش تعرفينى على اخواتك مين فيهم الكبيره اللى بعدك علشان انا عايزه اخطب لابنى منكم
بوسى: والصدمه باينه على وشها....وبتشاور عليا...دى اللى بعدى فى بكالريوس تجاره....وبتشاور على سوسو وبتقول ودى اللى بعدها فى تالته صيدله
واذ فجأه الست يجيلها ويحط عليها تقول
طنط: وهى بتبصلى شزرا ...اه لا دى شكلها صغيره اوى...وتحول نظرها لسوسو...وانتى ياحبيبتى قدامك قد ايه وتخلصى
بقى انا يتعمل فيا الفصل ده...اينعم انا لا كنت ولا عايزه اتجوز بس مش قدامى احترمينى ياشيخه شويه
بقى انا صغيره
طب دى حتى ميزه على الاقل السن مش هايبان عليا
المهم فى نفس ذات الوقت كانت ماما اخدت بالها من الست اللى قاعده تاكل ودانا وابتديت تاخد وضع الانقضاض علشان تشوف مين اللى رمت هيلب علينا دى
وطنط برضه ابتدت تاخد بالها وسالتنا
طنط: هى دى مامتكم
بوسى: ايوه ياطنط ماما واخواتى الصغيرين
طنط: ماشاء الله لاحول ولا قوه الا بالله دى زى القمر ومش شكلها مامتكم خالص واخواتكم ماشاء الله كتاكيت
وفى نفس ذات اللحظه اختى الصغيره وقعت من على الكرسى بدون سبب معروف اول ماطنط شاورت عليهم
واتفرج علينا كل الناس اللى كانوا فى مؤمن وقتها ...وهما اصلا كانوا بيتفرجوا
وراحت الست قامت وقعدت جنب ماما وقعدت تهرى فى ودانها كتير اوى
وفجاه لاقينا ماما طلعت ورقه وقلم
الست تمليها وهى تكتب
تقولوش قاعدين فى امتحان ماليه عامه ولا سياسات استراتيجيه وطنط بتغشش ماما الاجابه
واحنا طبعا قاعدين هانموت على نفسنا من الضحك
وخلص الكلام على ان طنط هاتورح تصيف فى مارينا وترجع تكلمنا علشان ابنها الكبير الدكتور اللى شغال فى السعوديه ولو منفعش عندها واحد وكيل نيابه اى واحد فيهم يشيل وخلاص
المهم بقى انا عايزه ارسملكم الصوره كامله
احنا كنا قاعدين بناكل....وعايزين نخلص بسرعه علشان ورانا الف حاجه لسه هانعملها
طبعا الامر مكنش يخلو من اصوات بتطلع واحنا بنشرب البيبسى
او المعركه الكبرى اللى هى طبعا....فتح اكياس الكاتشب...بأسنانا طبعا علشان مش معانا حاجه تانى نفتح بيها
وطبعا البطاطس اللى مكناش بنحس بيها لاننا كنا بنبلعها على طول
ورغم كده الست اعجبت بينا وكانت عايزه تناسبنا
اينعم هى متصلتش تانى...بس احنا قولنا يمكن لسه مرجعتش من مارينا
بس هى كانت قالت انها جوزت ابنها البكرى برضه من مطعم تانى بس هى مقالتش اسمه الحقيقه
علشان كده ماما كان عندها امل
ربنا يرجعها بالسلامه
قولوا يارب
الموقف ده حصلنا كلنا
لو عجبكم هاحكيلكم مأساتى الشخصيه بقى

حد يسمعنى زغروده

يا كل اصحابى البلوجريه
احب ازف ليكم الخبر التالى
خبر هايفرحكم قد ما فرحنى
هايسعدكم بعون الله قد مااسعدنى
لا لا لا مش هاتخطب لا سمح الله
لان الخبر ده هايزعل المعجبين منى
وهايزعلنى انا شخصيا
مش علشان الجواز والخطوبه والحاجات دى
بس ده هايبقى اعتراف رسمى من السلطات انى...كبرت
وبما انهم هايعترفوا انى كبرت يبقى هايعترفوا انى عقلت
ودى سابع المستحيلات
المهم يعنى الخبر بقى مش عايزه اقولكم
كليتى...جامعتى...دفعتى
قرروا يستغنوا عن خدماتى الجليله
واعلنوا رسميا
انى بقيت عاطله
الحمد لله حمداً كثيراً مباركاً طيباً
دلوقتى وبكل الفخر يملؤنى اقدر اقولكم
انى من بخره الصبخ (على راى اللمبى ) اقدر اروح اخلص ورقى
وطبعا هاوفر عليكم مهاترات انا ليه مخلصتش ورقى قبل كده
وخلينا فى انى خلاص هاخلصه
وهانضم لجموع العاطلين منكم
نبص للى بيشتغلوا ونقول ياريت
ونستنى اللى مخلصش يجيى يونسنا
انا مش عارف المفروض انبسط ولا لأ
افرح انى خلاص ارتحت لابد
ولا ازعل انى هابقى عاطله
قال يعنى كنت فالحه اوى فى الكليه
وكلام بينى وبينكم طبعا انا كنت رهيبه فى الكليه
كنت بذاكر انا واصحابى مقررات الصبح واحنا رايحين الامتحان..فى المكيروباص اللى كنا بنركب فيه
و اخد مننا رقات الحقيقه
المهم يعنى خلاص انا بقيت حررررررررررررررره
من الكليه طبعا مش بتاعه احسان عبد القدوس
وهافضى بقى وهادور على شغل بقى
ومش هلاقى
وغالبا هعمل زى كل الشباب مابتعمل
ايوه زى ماانتوا عارفين
هافتح محل موبيلات
اى خدمه
يلا حد يسمعنى زغروده علشان مش بعرف اعمل العمليه دى

سيدى الرئيس

ولما كانت الفتره الماضيه فى حياتى فتره حرجه للغايه

ولما كنت فى امس الحاجه الى ان ادخل لاكتب وافرغ ما فى صدرى من كلمات عجزت عن التعبير عنها بلسانى

ولما كان الجهاز المعاق خاصتى يعانى من انتكاسه ويلات البقاء لمده سبع سنوات فى منزل مفعم بخمسه فتيات تتنافس كل منهن على الظفر باى ساعه تجلسها امام شاشته

ولما تضافرت عوامل عده فى سبيل نشرى لما كنت ارغب فى نشره وتضافرت عوامل اكبر فى جعلى انسى ما كنت اود الحديث عنه واهمها احدى علامات تقدم سنى وهى الزهايمر

ولما كنت قد انتهيت من مراحل الدرسه فى حياتى ولكن كليتى تأبى ان تخصلنى مما علق بطرف ثوبى منها

ولما كنت قد نسيت ما تعلمته فيها من الاصل قبل ان اخطو لاخر مره خارج اسوارها

ولما كنت ارغب وبشده فى ان اخرج لاعمل اى عمل فقط ينسينى جلوسى فى المنزل والنوم المتواصل الذى لا استيقظ منه الا لانام مره اخرى

فقد قررت وانا بكامل قواى العقليه وحالتى المعنويه تقترب من ان تكون بالسالب لانها تعدت مرحله الصفر ان استيقظ

نعم لقد قررت الا ادع النوم يغلف حياتى بكسله بالرغم من ضعفى امامه وسلطانه المسيطر على ......لقد قررت ان استيقظ بدلا من ان يوقظنى والدى كلما رانى نائمه ...او ان تنادى والدتى على الجيران لكى يساعدوها فى ايقاظى

ولكن لاصدقك القول يامفكرتى العزيزه...غداً ساستيقظ رغما عن ارادتى وذلك بناءا على فرمان والدتى العزيزه بعوده اختى المتزوجه بعد وضعها لمولودها الى منزلنا ثانيه بل الى سريرها ايضاً وبالطبع لن يكون قائما على خدمه هذا الملاك الصغير غير خالته العاطله....والتى لاجدها احلى وظيفه يمكننى ان احظى بها...ولكن هذا لا يمنع اننى ارغب حقا ان اعمل عمل احبه قبل ان اصاب بجنون المنزل

ولكن الاهم من هذا كله الان مااتذكر فعلا رغبتى فى الحديث عنه هو الاتى

لقد كنت يوم خطاب الرئيس فى عياده طبيب الاسنان....وللامانه لم اعرف سبب ترقرق الدموع فى عينى ...اكان بسبب هذا الذى يعبث بادواته فى اسنانى وانا جالسه على الكرسى وقدامى مكان راسى ام كان بسبب قول الرئيس ان انحنائه لن يكون لغير الله سبحانه وتعالى.....ولكننى اعرف اننى فى قراره نفسى اود ان اخرج تلك الاله اللعينه من فمى والكم هذا الطبيب فى انفه ليس لاننى اشعر بألم فى اسنانى ولايزال الالم مستمرا من يومها ولكن ليتركنى استمتع بهذا الخطاب الاسطورى وصوت الرئيس وهو يشدو بتلك الكلمات المعبره والتى جعلتنى انا واعضاء مجلسى الشعب والشورى والوزراء والصحفيين واى حد كان معدى قدام المجلس نرتجف حبا وولعا بهذا الرئيس الذى ولله الحمد لن يتنازل عن الوطن مادام فى الصدر قلب ينبض وفى الرئتين نفس يتردد...والله كنت فاكره ان البنكرياس هو اللى بينبض

سياده الرئيس

اود ان اعتذر منك عن طول الفتره الماضيه (واحد وعشرون عاماً وتلاته اشهر بالتحديد )والتى ظلمت فيها سيادتكم ظلما بيناً باعتقادى انك يمكن ان تبيع ما بقى من مصالح الوطن او انك لم تكن تهتم بالصعيد طوال مده حكمكم المديده والتى نسال الله تعالى ان يكملها علينا بمده حكم ابنكم البار واحفادكم المقبلين باذن الله

واود ايضا ان اعترف باانى اصبحت مؤمنه اشد الايمان بالفكر الجديد والعبور الى المستقبل ولكننا فقط نعتب عليك كشعب انك لم تنبهنا الى اننا كشعب فى مرحله العبور بأننا سنكون المعبر الذى تعبر عليه الامم شعوبا وقبائل لتخطو خطواتها الواثقه نحو المستقبل

سيدى الرئيس

يعجز لسانى عن النطق بكلمات الاعجاب بشخصكم ومدى تحملكم لمسئوليه هذا الشعب على مدى نصف قرن كامل اهدرتم فيه صحتكم وعمركم وايامكم ولكن نحسب اجركم عند الله...فان ماعنده لا يضيع

ولكننى اود فى النهايه ان استحفلكم بتراب هذا الوطن اللى سفناه ومياه النيل اللى لوثناه والهواء الذى سودناه...ان تجعل من باقى ايامكم مكرسه فقط لمتابعه ما فعتله ايديكم الكريمه بهذا الوطن العظيم والتمتع بما وصل اليه من مكانه خارج مكانه الكواكب فى تلك المجره

ادام الله عزكم...يارب....وسلط عليكم من اعمالكم...قصدى يعنى اثابكم من جنس اعمالكم....يعنى الدعاء كويس بس انا مش عارفه اقوله ازاى

مواطنه مصريه ...ستلقى فى غيابات السجون قريبا

هذا كان بعض من كل تخاريفى الفتره السابقه

ونوافيكم بالمزيد

انا جييييييييييييييييييييييييييييييت

انا جيت اهو بعد طول غيبه عليكم بس معلش كانت ظروف خارجه عن ارادتى ...جهازى بعيد عنكم جاله امراض كتيره اوى وكل دكاتره السيبرات فشلوا فى علاجه لحد مهو عالج نفسه الحمد لله
والله كتير اوى كان بيبقى جوايا كلام نفسى اقوله وادخل اكتبه واطلعه علشان الحقيقه كان بيتعبنى اوى بس معلش اهو برضه صاحبت الورق والقلم شويه وكتبت كل اللى فى نفسى بس للاسف مش هاينفع يتكتب هنا
المهم انا بقول النهارده ادخل عليكم دخله خفيفه كده واقول اخر اخبارى الفنيه ...لا مش زى ماانتوا فاكرين مش هنزل السى دى بتاعى دلوقتى انا لسه بشفق عليكم ومش هاسمعكم صوتى علشان الامراض والحاجات دى ...بس اللى هاقوله دلوقتى اخر خبر فعلا
وبقوله علشان no fear
كان ناوى يذلنى بيه بس على مين انا بقوله للامانه العلميه مش اكتر
كنت كتبت مره قبل كده بوست اسمه (على فكره ماعندك فكره ) كان رايى فى المجتمع من حواليا وقولت فى اخره ان اختى الكبيره هاتجيبلنا بنوته هاتبقى اول الاحفاد وهتاخد دلع محدش ادلعه
يؤسفنى اقولكم ان البنت استوت وهاتبقى ولد ان شاء الله ومحدش يسألنى ازاى لان احنا شخصياً مش عارفين
هى الدكتوره فضلت اربع شهور تقولنا انها بنت ويوم الخميس اللى فات بالصدفه البحته عرفنا انها ولد مش انها بنت ...الحمد لله طبعا على كل حاجه وهايدلع برضه ان شاء الله
عموما دى اخر اخبارى انا واخر اخبار الدنيا حواليا زى ما انا شايفاها من بكره نقولها ان شاء الله
تصبحوا على خييييييييييييييير
رنا

هو فيه ايه....؟

اولا انا احب اهنئ نفسى قبل ما اهنيكم طبعا كلكم تنحتوا _ايه اللى داخله على المساء دى تهنينا وتهنينا مين والناس نايمين؟؟ طبعا ليكم كل الحق انكم تستغربوا بس والله الموضوع كبير...كبير
كنت قاعده برضه لا بيا ولا عليا بتفرج على القناه الاولى الارضيه...بابا جه بقى ومشغل الجزيره باين...المهم يعنى واذ بى فجأه الاقى برنامج عظيم الحقيقه اسمه...هو فيه ايه؟؟؟من الاول كده تحسهم ناس مش فاهمه حاجه فى الدنيا
انا طبعا مش هحاول اعرف اسم المذيع اللطيف ولا المذيعه المرحه اللى بيقدموا البرنامج لانى قررت متفرجش عليه تانى اصلا ...بس اللى حكيه ده حصل وربنا وكانوا شهود عليه ضيوف البرنامج...اللى انا للاسف مش عارفه اساميهم كامله بس هما اتنين بنات حلوين كده وينتموا لفئتنا البلوجريه
البلوجز وصلت للتليفزيون المصرى يارجاله...وبقينا حاجه كده ناشيونال ...يعنى اعتقد ان دى اول فقره فى برنامج تتعمل على فكره المدونات وطبعا انا اخدتنى الجلاله اول ماقعدت وفرحت بنفسى بقى انى بعمل حاجه الناس بتتكلم عليها...هما اه مقالوش اسم مدونتى على الهوا بس كفايه انهم بيتكلموا على ناس شفتهم يعنى شفت مدوناتهم وكده واهو هاستعبط واقول كانهم قالوا عنى...كل المشاعر الحلوه دى كانت جوايا لحد ما عرفت السبب الخفى من انهم بيتكلموا عن المدونات...طبعا بيهاجموها وبيقولوا اننا بنسوء صوره مصر البايظه اصلا وان المدونين بينقلوا كلام محصلش
طبعا فضلت متنحه وعلامات الصدمه مشرقه على وشى...هو الموضوع كده يا اولاد..الناس الكويسه...اه ياقهرتى
طلع الفيلم كله اللى اتعمل عليا وعلى البنتين اللى كانوا مستضيفنهم علشان يطلعوا المدونين غلطانين فى عرضهم لاحداث وسط البلد اللى حصلت يوم الوقفه واول ايام العيد بالصوره دى...علشان اصلا الكلام ده محصلش...وزاره الداخليه قالت كده...اللواء احمد ضياء الدين تقريبا مساعد وزير الداخليه للشئو القانونيه جه فى برنامج حلو كده برضه اسمه القصه ومافيها بتاع رولا خرسا...وقال ان اصلا القانون مفيهوش حاجه اسمها تحرش...القانون فيه تعرض ,هتك عرض, مواقعه بالاكراه,اغتصاب, وخطف انثى_يعنى انا ساعه ما اكون ماشيه فى الشارع وواحد يجيى يعاكسنى اساله الاول لو سمحت حضرتك ناوى تعمل ايه علشان لما اروح ابلغ ابقى عارفه...؟ _ماشى يابنىادمين
المهم يعنى التليفزيون المصرى والجرائد الحكوميه بيقولوا مفيش حاجه حصلت ...والبنات والستات واصحاب المحلات واللى بيشتغلوا فيها وفى اولاد كمان بيقولوا انهم شافوا الموضوع ده بعينيهم السنين اللى فاتت...بيقولوا ان الموضوع ده حصل وبيحص وهايحصل دايما ...بس كالعاده البنات بتخاف من الفضيحه ومش بتبلغ والستات بيخافوا العار وبيتعقدوا كلهم وبيبطلوا ينزلوا الشارع والحكومه برضه بترفض تصدق او تتحرك
المهم نرجع لموضوعنا المذيعه الفظيعه بجد كانت رهيبه...قعدت تتفزلك وتقول اننا المفروض نتحرى الكلام قبل ماتتشره _ياستى حد قالك تفتحى نت اصلا _والبنت تقولها الموضوع حصل ...يقوم المذيع الجبار يسالها حصل معاكى..وقبل ماتتكلم يقولها حصل معاكى فى وسط البلد ..اكيد بتقوله لا وقبل ماتقول انه حصل فى اوقات واماكن تانى يقاطعها ويقولها مشوفتيهوش يبقى متتكلميش _جتك نيله يابعيد _يعنى انا المفروض لما لا سمح الله واحد تسوله نفسه ويقولى ياجميل قبل مااخرم عينه اسحبه على مبنى الاذاعه والتليفزيون واجيب المذيع من ودانه واقوله بص شوف ده اخره اللى يعاكسنى
طب بلاش كده لو هو اخته ولا مراته اتعرضت للموقف ده هايقف يقولها صورتي اللى عاكسك او اعتدى عليكى علشان محدش يكدبنا ولا هايجرى بيها على اقرب قسم او دكتور نفسى يعالجها
ياخراااااااابى بجد اتضايقت
الراجل قاعد والست التانيه دى معاه ولا كأن اللى اتحرشوا بالبنات دول اولادهم ولا من بقيه قرايبهم...تقولش يااخويا ان النخوه اتعدمت فيه وفى عيلته من الالف الى الياء
معلش ياجماعه على طريقه كلامى بس انا اصلا مخنوقه من موضوع وسط البلد ده من زمان ربنا يجازى اللى قالى خير...وجه البرنامج ده كمل عليا
محاولوش بقى يقولوا ان المدونات دى حاجه بنخرج فيها اللى جوانا وبتجمعنا فى حاجه كويسه سواء على فكره او اغنيه او اى حاجه بس نحس اننا عايشين
لا كل اللى همهم انهم يصورونا بصوره اننا بنسئ للسياحه ولمصر واننا بنتكلم كلام خارج وخادش للحياء...قال يعنى الكلام ده مش بنسمعه فى مسلسلاتهم ولا فى اغانيهم
واللطيف بقى واحده فى البنات تحاول تفهمها ان الدنيا كلها فيها الكويس والوحش وانتى اللى تقررى تقراى ايه ومتدخليش على مدونات مين...ولا الهانم فاهمه حاجه الحقيقه كانت ناصحه اوى هى والجلف اللى كان قاعد جنبها
بجد اعذرونى انا مش بحب اشتم او اهين حد بس دمى فار ...بقيت شبه ميكى ماوس
يلا خير...معلش بس انا صبرى قليل على راى الاخت شيرين
شويه برامج تانيه زى اللى كل شويه ادخل احكيلكم عليها واولع فى التليفزيون كله
واعمل عمليه انتحاريه وافجر تليفزيونات الجمهوريه كلها
ادعولى ربنا يتوب عليا من التليفزيون وبلاويه واللى بيجرى فيه
تصبحوا على خير

Thinking Of You All The Time

أفكر دوما به عندما اصاب بالاكتئاب ممن حولى او من دنياي عموما...افكر به كملاذى الوحيده ومرفأ الامان لروحى المعذبه ونفسيتى التعيسه
عندما يستبد بى ظلم من حولى وتشتاق نفسى الى همسه
عندما اشعر بالوحده فأتذكر ابتسامته
عندما احتاج اللى اكمال ذاتى بوجوده فأجده يلوح لى بمستقبل رائع معه
عندما اجلس بمفردى اتذكر ماضياً مؤلماً وحاضراً تعسياً وفجأه يشرق بابتسامه رضا لمجرد تفكيرى بانه يوماً سينتشلنى من ضياعى بدونه....عندما احادثه فى مرآتى فيتهمنى كل من حولى بالجنون ولكنهم لا يفهمون...كيف تستقيم حياتى وهو ليس موجوداُ بها ولا يشكل دعائم وجودها
عندما تنزل دموعى نتيجه لاحساسى بمدى حاجتى اليه ومدى بعده عنى ...اجد يده دوما تمتد تمسح احزانى وتشفى ضيقى بمجرد ابتسامه من شفاهه تشرق بها دنياى
عندما اكون على يقين بانه سيظل دوما يحبنى بعيوبى قبل مميزاتى
سيحتمل عصبيتى التىلا احتملها انا حباُ فى وجوده بجوارى
عندما يشعرنى بمدى مسئوليه وجودى فى حياته وانه أسلم لى كل مقاليد اموره
عندما يخبرنى كم يحتاجنى ليحتمى بى من عصف الدنيا بنا او بحبنا
عندما يضحك ويخبرنى كم انا مجنونه وكم يحب جنونى
عندما يغصب لانى اغار عليه واكتم هذه الغيره بداخلى
عندما اقف لاعد الطعام وافكر كم سيكون جميلاً ان نكون سويا نتبادل الحديث اثناء الطعام
عندما اتذكر اننى سأوقظه ليلاً لاخبره بخبر عرفته ونسيت اخباره به...ثم سيكون على اخباره انه خبراً ليس مهماً ولكننى اشتقت الى حديثنا سوياً
عندما اكون مريضه فلا يكف عن السؤال عنى وتذكيرى بان نفسى امانه لدى حتى يسترها منى
عندما يخبرنى بانه لايريد ان يرانى احد سواه
وانه لن تستقيم حياته الا بوجودى فيها
عندما اشعر باننى ملكت الكون بنظراته التى تتدفق حناناً وحباً
عندما يخبرنى انه بالرغم من هدوئه الشديد يعشق شقاوتى
عندما يطلب الا اكف عن الحديث استمتاعاً بما اقول
عندما افكر فى كل هذا احس اننى سأفقد عقلى انتظاراً له ...عندما تطوق نفسى الى لقائه وتأبى الدنيا ان تجعلنى حتى اراه
عندما يخبرنى ...عندما ياتى ....عندما يصارحنى بحبه...وقتها
ستتدفق مشاعرى انهارا وتصير مقاومتى للحب اشلاءاً...سأحبه فقط احبه
عندما يأتى

بحبك ياحبيبى اكمنى
بهواك وبحس انك منى
سامعنى ده انا بروحى بغنى
ده انا بحكى لكل الدنيا عليك
بحب الحب اللى جمعنا
بحب الشوق اللى وجعنا
وعمرى بجد ملوش معنى
ولا تحلى الدنيا فى يوم غير بيك
بحب هواك وعينيك انما
لو قد الارض وقد السما
هكون اكتر منهم مغرمه
وهكون اقرب من نفسك ليك
بحب اخرج من نفسى واجيلك
واسيب احساسى يغنيلك
كفايه يكون قلبى باقيلك
وكفايه اشوف الكون بعينيك
اه علىاللى انا حاساه
واللى انا عايشاه
من حنينى واه
اه كل يوم بيفوت
فيك بعيش وبموت
برضه احلى حياه
بحب كلامك فى شفايفك
وبحب القلب يكون شايفك
جوايا حنين حاساك عارفاك
لو حتى ما بين ملايين الناس
بحب ومش متهيألى
انا عايشه فى حلم اتحققلى
انا حاسه ان انت بتشتا قلى
انا دايبه من الشوق والاحساس
بحب النسمه اللى تعدى
على رمشك مره وعلى خدى
وناخد فى الحب وندى
ونعيش انا وانت فى احلى غرام
بحبك انت بحبك بس
وحبك اجمل شئ يتحس
وبسمع منك اجمل همس
وبشوف فى عيونك احلى كلام
(جنات....بحبك)

أحبائى...أحبائى

أجربت يوما الاحساس بالذل؟
اذقت يوما مراره الانكسار؟
أأحسست يوما بانك اصبحت صفراً على الشمال...لأا اهميه لك ولا معنى لوجودك؟
دوما استمعنا الى عبارت من نوعيه...اننا كبار المنطقه.وان ريادتنا تزين عروبتنا, معرفش ازاى....والاهم من كل هذا قصص البطوله دوما كانت حكراً علينا نحن المصريين كما كان يصورها لنا اعلامنا الجامد جدا
ولكن دوما ارتبطت الشجاعه والبطوله بداخلنا بالتصالح مع النظام او بمعنى اصح بان تكون هذه البطوله من صنع النظام
مثالا ً على ذلك مسلسلات رأفت الهجان...ودموع فى عيون وقحه...مروراً بالطريق الى ايلات ...ووصولا الى الحفار ويوم الكرامه السادات وناصر 56...وهلم جرجر
ولكن ماذا لو كانت البطوله ضد النظام فى صالح البلد
بمعنى ان تكون البطوله جزءاً من المقاومه المشروعه فى سبيل الحريه...والحقيقه الاتنين معدومين عندنا فى بلدنا
جلست افكر موخراً فى تجربه العدوان على لبنان وسطوح نجم "حزب الله" فى سماء المقاومه والبطوله فى قاموسنا وكيف انه تجسدت كل احلامنا فى العروبه القويه بعيداُ عن اختلافات الديانات والمذاهب فى السيد "حسن نصر الله " كيف تكاتفت وراءه كل قوى الشعب والمنظمات الاهليه وطاوعته انظمه الحكم اللبنانى بالرغم من اختلافها معه فى سبب المقاومه او طريقه بدء الحرب ولكنها ابت ان تجعل من خلافاتها الداخليه سبباً فى زياده العدوان عليها بدعوى انها بلد مفكك وان "حزب الله " غير مرغوب فى وجوده داخل لبنان....وعلى العكس تماما يحدث فى باقى بلادنا العربيه...تدخل الغريب قبل القريب فى كيفيه ادراتنا لبلدنا ...او بمعنى اصح نشرنا نحن غسيلنا..على الملأ علشان اللى مايشترى يتفرج
وجعلنا من الاخوان المسلمين سبباً فى كل النكبات التى حدثت وتحدث وستحدث لمصرنا الحبيبه...الامر الذى يدعونى ثانيه للتفكر فى مصيرنا بعدما اصحبت سياستنا الداخليه اكثر انفتاحيه من سياستنا الخارجيه فكل دول العالم العظمى بلا استثناء تتدخل فى كيفيه قمع الارهاب وكيفيه التعامل مع المتظاهرين ومن تسجنه الدوله ومن تفرج عنه
جلست اتابع احدى قنوات الاغانى...فضا بعيد عنكم...ووجدت ما زاد من اكتئابى..الاولى اغنيه " طير الرماد" لمجموعه من المغنين اللبنانيين والسوريين
عندما تتابع كلماتها تجدهم لم يخشوا ان يذكروا "حزب الله" ان يتغنوا بفضله فى كسر شوكه العدو ومنعه من الاستمرار فى ضرب بلادهم بل وتكبيده خسائر لم يكن يحلم بها
بعكسنا...لقد اصبحنا نخاف فى حياتنا العاديه ان نقول حتى "جزاك الله خيراً" خزفاً من ان يحسبنا احداً من الاخوان واستعضنا عنها ب شكرا او ميرسى او اى من هذا القبيل
واكثر ما أثر فى...أغنيه أحبائى لجوليا بطرس
رائعه وتجعلنى اشعر بالفعل بمدى انهزامنا وانكسرنا واستحقاقنا للموت من الاخر يعنى
بجد انا اكتئبت اوى خلاص بقى وزهقت وعايزين نخلص
حد يشوفلنا حاجه تخلصنا
**************

أحبائى......أحبائى

استمعت الى رسالتكم

وفيها العز والايمان

وانتم مثلما قلتم

رجال الله فى الميدان

ووعد صادق انتم

وانتم نصرنا الاتى

وانتم من جبال الشمس

عاتيه على العادى

أحبائى.....أحبائى

بكم يتحرر الاسرى

بكم تتحرر الارض

بقبضتكم...بغضبتكم

يصان البيت والعرض

بناه حضاره انتم

وانتم نهضه القيم

وانتم خالدون كما

خلود الارز فى القمم

وانتم مجد امتنا

وانتم انتم القاده

وتاج رؤسنا انتم

وانتم انتم الساده

أحبائى....أحبائى

اقبل نبل اقدام

بها يتشرف الشرف

بعزه ارضنا انغرست

فلا تبكوا وترتجفوا

بكم سنغير الدنيا

ويسمع صوتنا القدر

بكم نبنى غداً احلى

بكم نمضى وننتصر

انا كرهت نفسى خلاص....بجد حاسه انى صغيره جدا جدا جدا جدا جدا

حد شايفنى؟

انا مش شايفه نفسى الحقيقه خلاص

يعنى عمو محمد يعين عمو جمال وانا معينش ابنى...اخص الله يكسفكم

انا كل ما اقول التوبه ياابويا...يرمينى التعليم فى دهاليزه تانى
البوست المره دى مخصوص اوى واسيبشيال اوى اوى بمناسبه خناقات (انتخابات سابقا ) اتحادات الطلبه والمقامه حاليا فى جميع جامعاتك يامصر...البوست ليكم يا صيدله بنى سويف
فى غياهب النسيان ودروب الزمن المظلم ومتاهات التاريخ فى مصر بس بالمناسبه ترتبط بداخلنا اى انتخابات تجرى بالمظاهرات والمشاجرات والاحزمه والهروات وكل الاسلحه البيضاء والصفراء الخضراء والحمراء وكل ما يمت بصله لتعريض البشر للاذى ...دوما ترتيط الانتخابات بداخلنا بانتصار الباطل على الحق ضربا بكل موروثتنا القديمه بان الحق من ينتصر عرض الحائظ ...اكنت يوما طالبا او طالبه محترماً فى احدى الجامعات الكثيره اوى ورغبت شأنك شأن زملائك ان تترشح لانتخابات اتحادات الطلبه وبدون سبب وجيه او بسبب تم شطب اسمك؟
اكنت يوما طالبا ذو توجه سياسى او دينى ادى الى تربص الامن واداره الجامعه بك؟
اشهدت يوم الانتخابات فى جامعتك او كليتك وصدمت لما رايت؟
اكرهت يوما حقيقه انتمائك الى تلك الفئه الطلابيه والتى تتخذ شعارها فى الحياه...الانتخابات اللى تجيلك منها الريح ...طنشها واستريح؟
حسنا انا كنت مثلكم تماما لا علاقه لى بما يجرى فى الكليه خاصه والجامعه عامه...حتى عندما كان طلبه الاخوان يعتصمون رفضا لشطبهم من الانتخابات الطلابيه كان اول ما يتبادر الى ذهنى _يعنى جات على اتحادات الطلبه مهى اصلا ماشيه معاهم بالعكس على طول _حتى انهم يوما اشتروا كوسه...ايوه كوسه مستغرب ليه؟...وقاموا بتعليقها على مداخل مبنى كليتنا تجاره بنى سويف دليلا على تكويس الانتخابات بس الحقيقه احنا عمرنا ما سمعنا ان فيه انتخابات ولا ترشيحات ولا حتى عرفنا اسم رئيس اتحاد الطلبه ايه...بس الغريب انى اه مش ذات توجه دينى زيهم بمعنى انى مش اخوانيه ولا تياريه لانى برفض زى اى حد فيكم ان الدين يبقى تيار بس كنت شايفه انهم من تعاملهم مع الطلبه كسبوا تعاطف ناس كتير اوى لانهم قبل كل حاجه كانوا ذوق جدا خدومين اوى واهم حاجه محسناش عمرنا يعنى انهم بيتفضلوا علينا بدينهم...بالرغم من رفضى لسياسه المظاهرات والاعتصامات اللى متبعينها لانها غالبا بتخلينا نفقد تركيزنا فى المحاضرات اللى اصلا مش فاهمينها ده غير انها بتكون تحت رعايه الكليه اولا والجامعه ثانيا يعنى برضه بتبقى على مزاج الامن ...بس كتجربه لطلبه الاخوان فى بنى سويف نجحوا نجاح تام فى انهم يكسبوا اصدقاء كتير....مش بالترهيب زى ما بسمع بس بالعقل وكمان علاقتهم بالطلبه المسيحين كانت كويسه...بس اقدر اخد عليهم حاجه واحده بس ...رفضهم لكلام معين لاى دكتور والزامه لو هو دكتور محترم يعنى بانه يسحبه فى المحاضره التاليه
المهم بقى البوست ده مناسبته حاجه عرفتها النهارده عجيبه عجيبه الحقيقه
انتخابات اتحاد الطلبه فى صيدله بنى سويف...اتكوست تكويسه جامده جدا...ازاى بقى
شوف ياسيدى العميد بجلاله قدره وعلو شأنه وارتفاع منزلته....ظبطها لابنه علشان ياخدها بالتزكيه او الكوسه او فيه باميه لو تحب...المهم يعنى انه هايخلى ابنه طالب تانيه صدليه حديث اللى اصلا مش بيحضر ومش بيجى ومحدش يعرفه وغالبا مش بيقوم من النوم رئيس اتحاد الطلبه...بدل من طالب تانى الكليه كلها عارفاه
لحد كده الموضوع عادى بس اللى مش عادى بقى رده على الموضوع ده او تبريره ليه
"يعنى عايزين عمو محمد يعين عمو جمال وانا معملش لابنى حاجه" اخص الله يكسفكم طلبه هم الراجل بيعمل لمصلحه ابنه
الراجل بيعمل اسوه برئيسه يعنى لو الريس قال ذيع هانذيع...اقصد يعنى لو الريس قال توريث يبقى احنا هانهيص
انا من مكانى هنا...كرسى المكتب كالعاده...بقول لابويا كده يابابا تسيب المرور من غير ما تخلينى عسكرى فيه؟؟؟؟اما مقهوره
وخلاه رئيس الجميعه العلميه ...ودى تقريبا حاجه كده زى الاسر فى باقى الكليات بس يعنىالطلبه عاملين ليها شغل جامد جدا وندوات ودورات ...ده على كلام الدكتوره اختى انها حاجه حلوه وهما فرحانين بيها وبيعلوا فيها تشاط كويس...خلاه رئيسها كده من الباب للشباك الواد اللى لسه نايم فى بيتهم او عنده اهتمامات اخرى غير الكليه يعنى...عينى عليك يازمن
المهم يعنى لو انت شفت العاشره مساءاُ النهارده وشفت اللى بيحصل فى جامعه القاهره ولو انت شفت العاشره مساءاً اول امبارح وشفت اللى حصل فى جامعه عين شمس هاتعرف البلد دى رايحه فين...لو انت مشفتش انا هاقولك
كالعاده اتشطب طلبه الاخوان والطلبه المستقلين من كشوف الترشيح فى مقابل وجود طلبه مواليين للحزب الوثنى...وقامت خناقه وامن مركزى وامن مش مركزى وتشوف التليفزيون ياجدع تقول دى خناقه فى سوق مش اعتصام لطلبه اتهدر حقهم
طيب بلاش كل ده...نفترض ان الاخوان دول وحشين زى ما الدوله عايزه تفهمنا او مثلا زى راى حضرتك بعيدا عن الدوله...مش برضه الطلبه هما اللى بيتعاملوا معاهم وليهم الحق انهم يقرروا مين يمثلوهم او مين يشطبوهم ولا كالعاده الدوله عايزه تاخدلنا نفسنا كمان ...هو ده اللى ناقص
طيب بلاش عمرك انت كطالب قديم ومخضرم...حلوه مخضرم دى...فى سلك التعليم عمرك اتحاد الطلبه عملك حاجه دى حتى فى كليتى الرحلات الاسر العاديه هى اللى كانت بتطلعها ورئيس اتحاد الطلبه وباقى اعضاؤه كان كل همهم اللهم انهم يتظبطوا من العمال والاداريين فى الامتحانات ...بس تحب تشوف ميزانيه الاتحاد.....هع عجب ياراجل...كوره لزوم اللعب 150 جنيه فقط لا غير....اخص عليهم جابوا كوره من ام فقط لاغير...طيب انا مليش فى الكوره ولا بفهم فيها بس انتوا كشباب قولولى فى كوره فعلا من اللى بيتلعب بيها فعلا ب 150 جنيه فقط لا غير ...طب ولو هى فعلا كده كل سنه هاتجيب كوره ب 150 فقط لا غير يعنى الكوره مش بتسخدم غير سنه واحده فقط لاغير؟ سؤال يطرح نفسه
الى طلبه صيدليه بنى سويف
معلش هى الدنيا كده ...كل من عليها finish
بس مش لازم تبقوا فى سلبيتنا وقت ما كنا مكانكم اثبتوا على موقفكم ودافعوا عن حقكم...اللى بيفرط فى حقه مره سهل يبيع وطنه والقضيه كلها ويبقى كائن انوى ملوش طلب او لازمه
بالنيابه عنى نفسى واصدقائى البلوجريه بنقولكم...ايه يعنى ابن العميد...اللى هايقدر على ابن العميد هايقدر على ابن الرئيس
فيكوا تنسوا
صور حبايبكم
فيكوا تنسوا
صور حبايبكم
فيكوا تنسوا
لون الورد وورق رسايلكم
فيكوا تنسوا
نفس المكان اسامى الايام والمجد اللى الكم
لا تمسوا اثار
لاتنسوا وطنكم
انا اللى بيسمونى الملكه
بالغار متوج زمنى
مملكتى ما فيها بكى
وجبينى ولا مره حنى
شعبى ذهبى فرحى وغضبر
بترك صوتى ومابترك وطنى
لا تنسوا وطنكم
ده منتدى الجمعيه العلميه لطلبه بنى سويف للتضامن اتبرع ولو بكلمه
http://www.bspsa2.tk/
كالعاده رنا حسام...كرسى المكتب

كم جميلا لو بقينا اصدقاء

دوما كنت اعتقد ان الاصدقاء كنز لايفنى...بل كنت اعتقد انهم اقرب الى من اهلى وعائلتى...اصدقائى كانوا دوما بالنسبه لى ملاذى من الدنيا وبدونهم لاتستقيم حياتى ...تحملنا معا كثيرا وعانينا اكثر...كنا دوما لبعضنا فى اوقات الفرح قبل الضيق...كنا نخرج سويا لننسى الدنيا وما فيها
ولكن لست ادرى سبب انتقاء الدنيا لاصدقائى بالذات لتبعدهم عنى ...حسنا اليكم ما كنت دوما افكر فيه
دوما كنت احلم بان يكون اخوتى اصدقائى ولكن هذا لم يحدث واعتقد انكم تعلمون جميعا ان هناك فارق رهيب بين ان تون صديق احدا وان يكون احد صديقك...واليكم الفارق لمن لا يعرف
ان اكون صديقتك اى اكون قريبه منك تستطيع ان تحكى لى جميع مشاكلك واساعدك فى حلها ولكن مشكلتى انا انه من الصعب عليا جدا ان اخرج ما بداخلى لاى شخص مهما كان وسبب هذا خوفى من ضعفى امام الناس ...لذلك كنت دوما اضع اصدقائى فى منزله بمفردهم بداخلى احسبهم دوما نفسى فى المرآه والتى لا اخشى ان اتحدث امامها عما يزعجنى ...ولكننى لفتره ما ابتعدت عن جميع الناس لظروف خارجه عن ارادتى ولكننى عدت اليهم لاجد منهم من بقى على حاله منهم من غيرته الايام والليالى منهم من لازال يريدنى فى حياته ومنهم من بات يكرهنى كاألد اعدائه ...والاسباب واضحه نفوس الناس فى زماننا هذا
اعرف ان متطالباتى فى شريك ذاتى ان يستطيع ان يكسبنى كصديقه قبل ان اكون له حبيبه ...ان يجعلنى بدون ان اشعر اخرج ما بداخلى من احزان والالم سببها دنيا اصبحت امقتها وامقت العيش فيها...خسرت اناس كثيرون فيها وسأخسر اكثر..كل ماذكرته يجعلنى احس باستحاله العثور عليه
يقولون اننى السبب ...عصبيتى وانفعالاتى او تلقائيتى وسرعه تأثرى بالاقوال والافعال...واننى غالبا لا اميز الجد من الهزل ولكن الا يكفيهم مكانتهم فى قلبى الا يكفيهم انهم اصدقائى من لا اكف عن السؤال عنهم او القلق عليهم...الا يغفر لى عندهم شعورى الدائم بمسئوليتى تجاههم
حسنا اليهم اصدقائى
عودوا فلا حياه لى بدونكم...ولا مكان لك سوى قلبى لتنعموا فيه حتى ياتى من يشارككم اياه وقتها اعرف انكم ستبتعدون لست ادرى لماذا ولكننى اعرفكم لن تريدوا ان يشارككم احد قلباً ملكتموه ولكنها سنه الحياه...واعتقد انكم لن تكرهوا لى الخير
بداخلى تتردد تلك الكلمات

وعدى العمر مش خايف على عمرى
لكن قد اللى فات عمرى
ما حسيت انه فات عمرى
كأنى معشتش الماضى
جيت ابدأ من جديد عمرى
شعرك حنى بريق الماس
والقلب باقيله كتير احساس
فى ناس شافتنى وحبيتنى
وناس نسيتها افتكرتنى
وناس عشانها نسيت الناس
فى الشده بعدت وسابتنى
لسه الحياه مش عاجبانى
امشى ولا واقف فى مكانى
جايز خدتنى وودتنى
لا بعدت عنها ولا سابتنى
بس السؤال اللى يحير
عشت الحياه ولا عاشتنى؟
***********
العمر مش عايش ليا
وبعيش لناس غدرت بيا
فى حزنهم ياما اتألمت
وفى فرحهم ضحكوا عليا
مستغرب الدنيا وهى
عماله تلعب اوى بيا
من كتر ما انا شايف منها
مبقيتش خايف احزانها
كل اللى مكتوبلى بشوفه
وانا حسبى ربى...عالم بيا

العلاقه السفسطائيه بين الجنيه والميه

جلست اتصفح جريده الدستور والتى صدرت لحسن حظى يوم الاحد بمناسبه العيد...يعنى اقراها الاربع والحد ورا بعض احمدك يارب...وجدت انها افردت صفحات كثيره بداخل عدد الاربعاء والاحد عن مشكله تلوث المياه فى الدقهليه وكيف ان وزاره الصحه كالعاده غرقت فى شبر ماء ملوثه كالعاده وانها لم تعرف للان السبب الرئيسى او بالاحرى الحقيقى وراء حالات الوفاه والتسمم ...عجز الاطباء والعلماء وكبار الممرضين والممرضات عن معرفه السبب الحقيقى مع انه ظاهر جدا
ربما سيلقى الذنب على الاهالى وانهم وراء الاهمال فى الحفاظ على نظافه المياه الغير نظيفه خلقه وربما سيلقى ايضا الذنب على ابرهه الحبشى كما سخر منهم الكاتب الفظيع_ بلال فضل_ ولكن السبب الاكبر يسُأل عنه اساتذه الاقتصاد والاعمال...تنحتوا...مش فاهمين حاجه من كلامى ...طب انا قررت فى اخر ليالى رمضان اتبرع بمعلوماتى الجامده جدا عن سبب تلوث المياه ورزقى ورزقكم على الله
باعتبار اننى خريجه طازه من كليه التجاره شعبه المحاسبه...درست فى السنه الاولى والثانيه والثالثه مواد الاقتصاد..والنقود والبنوك..والماليه العامه...بنفس ترتيب السنوات...وشلت منهم الاقتصاد والماليه العامه بمعنى اننى اتفوق على اقرانى باننى ذاكرت كل كتاب منهم مرتين ...وبالطبع كان يدرس لنا الجهبذ الدكتور سامى السيد وكيل كليه الاقتصاد والعلوم السياسيه على ايامى...كان راجل كويس والله...المهم يعنى كل المؤهلات اللى ذكرتها دى تخلينى على من اكثر الناس علما بخبايا الاقتصاد المصرى وذلك كما يقول المثل القديم..العلم مش فى الراس ولا فى الكراس بل فى الكتب الجامعيه واسألوا مجرب... ولهذا من واقع خبرتى فى التعليم عامه والاقتصاد خاصه احب ان ازف لكم البشرى التاليه
السبب الرئيسى الوحيد والاوحد فى تلوث المياه سواء النيل او المياه الجوفيه او البحرين المتوسط والاحمر وفى اسوان بحيره ناصر هو سبب بسيط جدا كنت اعتقد انه لن يحتاج عبقريه مثلى لكى تراه العين واضحا ساطعا كسطوع الشمس فى اليوم السادس من الشهر الثامن...عيد ميلادى يعنى
حسنا هذا السبب وبلا فخر ولا مط ولا اطاله ولا رغى وانا رغايه هو ......تعويم الجنيه المصرى
حد يسألنى ليه؟
انا اقولكم من غير ما تسألوا...تعويم الجنيه بدايه لمن لا يعرفه هو من الاخر وبالبلدى جعل الجنيه لا قيمه له امام العملات الاجنبيه ...بمعنى الدولار سعره يرفع تلاقى الجنيه سعره فى الارض...تلاقى برميل البترول سعره بقى اغلى الجنيه ينزل تحت الارض...وهلم جرر...وعلى فكره اللى يقولك ان تعويم الجنيه غير كده يبقى مش فاهم اى حاجه ويجى عن الخبيره تعرفه
طيب دلوقتى ايه العلاقه بين الجنيه وتلوث الميه.؟؟؟
العلاقه باينه واضحه ...الجنيه بنعومه فى ايه...أكيد ميه...امال هانعومه فى بنزين مثلا ده حتى سعره ارتفع هو التانى...بس ما احنا معومين الجنيه من زمان اشمعنى دلوقتى الناس ابتدت تشتكى من التلوث...أقولكم برضه
زمان الجنيه كان مقرف كده ولونه منيل الحقيقه والناس كانت بتستخدمه فى كل حاجه من كروت المعايده لكروت السبوع ل..احمد ومنى للابد...وتحت السجر ياوهيبه ياما كالنا برتجال...وبقى ينضفوا بيه اسنانهم او يبلوا ايديهم بحاجات مقرفه كده علشان يعدوا الفلوس...بس مع كل ده يامؤمن عمرنا ما سمعنا عن حالات تلوث...علشان قرف الناس كان منها فيها يعنى الناس تعامل الجنيه اسوء معامله ولما تشرب الميه اللى اتعوم فيها مكنتش بتفرق معاها يعنى مكناش بنطلع خيرنا بره....بس ايه الجديد دلوقتى
اقولكم برضه
الجنيه بقى معدن يارجاله
الناس لاهى عارفه تكتب عليه ولا عارفه تبل ايديها عليه علشان تعده ولا عارفه تنضف بيه اسنانها...ده غير طبعا انه مش سامح باى معامله مش ادميه ليه ...والسبب الاعظم بقى ان المعدن بيصدى فى الميه يعنى لما نيجى نعوم الجنيه المعدن فى الميه هينزل منه حاجات مش مننا يارجاله ولما الحاجات دى نشربها اكيد هاتضرنا...هاتبقى ميه معدنيه واحنا مش واخدين على الحاجات دى...احنا نشرب من القله ..الزير...الحاجات التراثيه دى مش تقولى ميه معدنيه ومتكرره...كدابين علشان انا مأخدتهاش فى المدرسه
انا كده افصحت بمكنونات صدرى وعلى اى واصل منكم يقول للساده الممسوسين على الحل اللى ابسط مما كانوا يتخيلوا...بس هانقول ايه يوضع سره فى ارفع خلقه
رمضان خلص...والعيد جه...والعيد فرخه زى مابيقولوا
كل سنه وانتوا طيبين
الا صحيح ...انا حاسه نفسى بكتب مواضيع كتير فى وقت قليل...انا اه طبعا عارفه نفسى رغايه بالكهربا...بس يعنى انتوا ليكم مطلق الحريه انكم تقولولى هدى اللعب شويه...انا البلوج بتاعى كله ديموقراطيه مهو مش معقول هابقى انا والحزب الوطنى عليكم
تصبحوا على خير وكل سنه وانتوا طيبين

حل الفزوره

طبعا كلكم بتقولوا اكيد انى اخدت الطاسه الذهبيه واهرب ولا طمعت فى العربيه وقولت انا اعرف الحل اخدها واهرب بس احب اقولكم ...لست انا هذا الرجل...انا بس حبيت اديكم اكبر وقت ممكن علشان تفكروا فى الحل...ويؤسفنى اقولكم ان محدش قرب من الحل ولا من المكان بس طبعا انا اقدر اعذركم علشان اللى هاقوله كحل للفزوره ..شئ لا يصدقه عقل ...على راى شويكار ربنا يمسيها بالخير...أقولكم الحل بقى
المنظر الطبيعى الخلاب ده الباك جراوند بتاع مبنى مهم وحيوى جدا عندنا فى الفيوم
العشوئيات اللى كلكم شكرتوا فيها دى عباره عن بيوت العرب لو حد يعرفهم من سكان المحافظات او الاقاليم لانى اعتقد انهم مش موجودين فى القاهره بس علشان منحرمش حد من حاجه هاقولكم مين هما العرب
العرب هما بدو قرروا انهم ينزحوا على المدن علشان يلاقوا اكل عيشهم بيمشوا فى الشوارع بالمعيز والخرفان علشان الناس يشتروا منهم لاوقات العيد مثلا او لاى سبب وطبعا دول يعتبروا ساكنين فى عشش مش بيوت زى ماانتوا شايفين جنب الموتوسيكل كده ودول عقبال املتكم بعد الشر طبعا عايشين تحت خط الفقر بكتير ولو فى خطوط فقر بالسالب يبقوا هما عايشين فيها
انا طبعا لسه شايله مفاجاه المكان وهاكتبه باكبر خط عندى علشان محدش يشك فى نظره زى ما انا شكيت فى نظرى اول مره شفت الصور
مكان الصور دى المستشفى الجامعى للفيوم ....اه وربنا مستشفى جامعه الفيوم هو اللى عامل كده
طبعا انا عندى صور كتبر عن المنظر ده من كل الاتجاهات بس للاسف الجهاز بتاعى معاق حبتين ومش راضى يقبل الصور...خايف يفضحهم اكتر من كده...بس على مين بعون الله هافضحهم
المهم بقى المستشفى دى حكايتها حكايه...عندى صور لصيدليه المستشفى فاضيه...بمعنى فاضيه...صيدليه طويله عريضه وبيشتغل فيها 11صيدلى ومفيهاش لا بنج ولا تحاليل ولا حتى قرص اسبرين ...بس علشان الامنه فيها صفايح فازلين بالكيلو بمعنى انك ممكن تتدخل تهز طولك وتقول للصيدلى...نص كيلو فازلين لو سمحت
المستشفى سورى فى الكلمه بس مش لاقيه الحقيقه وصف تانى ليها...بتضرب فيها المجارى فيها بمعدل مرتين فى الاسبوع واداره المستشفى ولا هى هنا
وطبعا انا قولتلكم ان اعشاش العرب ورا المستشفى فا مفيش مانع انك تلاقى مثلا معزه ولا خروف بيجرى فى المستشفى مهى زى بيتها برضه ده طبعا غير الفراخ والطيور اللى بترعى فى المستشفى وسلملى بقى على انفلونزا الطيور
وبيقال بقى الحقيقه والله اعلم ان السر فى ميزانيه الجامعه انها قليله بس انا رحت بنفسى وشفت مستشفى جامعه بنى سويف اللى ليها نفس الميزانيه والمستشفى هناك مستشفى بجد مش زى اللى عندنا سورى يعنى مقلب زباله بس برضه والله اعلم بيقولوا ان اداره الجامعه بتخصص فلوس للصيدليه علشان يجيبوا فيها ادويه وبعيدن يخدوا الفلوس يعملوا بيها قاعه اجتماعات للجامعه علشان طبعا ميقدرش الدكاتره ويجتمعوا فى مبنى او قاعه قديمه لا سمح الله
بس تخيلوا بقى مدى بؤس الناس اللى بتجيى المستشفى دى ومش لاقيه حتى كيس القطن اكيد زى ناس كتير من اهالى المحروسه فى كل حته
يلا حرقت دمكم قبل العيد ...معلش واهو على راى كيارا بنت سيمبا فى كارتون الاسد الملك
اللى يعيش ياما هايشوف
يفهم حاجه يلاقى الوف
ميفهمهاش
انا كده هادى الطاسه الذهبيه لمدير المستشفى وعميد كليه طب الفيوم ورئيس الجامعه علشان هما بجد يستاهلوا
والله انا كل مااقول انا خلاص سبت التعليم ومليش اى علاقه بيه الاقى قدامى حاجه تخلينى اكره التعليم واللى بيتعلموه واللى بيعلموه كلهم بلا استثناء
يلا كل سنه وانتوا طيبين بمناسبه العيد طبعا اللى مش عارفين هايطبخوه ويخلوه امتى
فى تتر حدائق الشيطان بيقولوا حاجه جامده جدا
قالوا لفرعون ياظالم
ايش فرعنك
قال عبيدى
تفتكروا بعد كل ده العيب هايطلع فينا؟؟؟
سؤال يطرح نفسه
كانت معكم ...رنا حسام...من كرسى المكتب ...بيتنا...شارعنا...محافظتنا