حد يسمعنى اجمد زغروده

أحم أحم أحم

يااولاد النهارده انا جايه مبسوطه جدا وعايزه ابسطكم معايا اوى

من زمان وطول عمر اى واحده فى الدنيا دايما احلى حلم فى حياتها انها تلاقى حد يحبها ويخاف عليها واكيد طبعا يبقى حنين وكويس معاها ومع اهلها ومع كل الناس اللى بتحبهم

ولما تلاقيه طبعا لازم تكون اسعد واحده فى الدنيا

مش شرط يكون اغنى واحد

ولا يكون احلى واحد ( بس هو فى نظرى احلى واحد ) ومش شرط برضه انها تكون عارفاه قبل كده علشان بجد احلى حاجه انك ترتاح للى قدامك من اول مره

تحس ان انت احلامه وكل حاجه كان بيتمناها من كلامه من عينيه من خوفه عليك

من كل حاجه بيعملها وكل نفس بتاخده

ونفس اللى جواك يقدر يوصله

لما تحس انك معاه انك على راحتك مش بتحافظ على كلامك او بتتكلف فيه

تحس انك منه وهو منك

حتى الناس تاخد بالها انكم شبه بعض وانتوا مكنتوش تعرفوا

وياسلام بقى لما تبقى معاه وتحس انك طاير فى السما

او تبقى ماشى جنبه ومش عارف تدارى فرحتك بيه

قد ايه ممكن تبقى حاسس انك فخور وانت ماشى جنبه

مش شرط ان تكون عدت فتره كبيره علشان تقدر تعرف كل ده

بس على الاقل عارف ان فى يوم هاتكونوا لبعض كل حاجه واحلى حاجه واغلى حاجه

*************

الخبر بقى الجامد جدا اللى انا اتأخرت كتير اوى فى انى اعلنه للدنيا كلها او بمعنى اصح فى مدونتى العزيزه هو ان

التاريخ خلاص بحروف من دهب زى الحلوين اللى فوق دول كتب يوم 26-7-2007

يوم خطوبتى

هو اه انا اتاخرت كتير فى انى اقول بس يعنى مكنتش مصدقه شويه ومكنتش فاضيه بصراحه ادخل شويه كمان وبرضه تقدروا تقولوا عين الحسود فيها عود ياحلاوه

المهم يعنى انه كان يوم حلو اوى

لبست دبلته وهو لبس دبلتى

اسمه منور على صباعى

وخلاص الناس بطلت تقولى باسمى

الكل بقى بيقولى ياعروسه

او خطيبة محمد (خطيبي ) وعلى فكره احساس حلو اوى ان الناس اختصرت كل اللى جواك فى كلمه واحده

المهم يعنى كان معايا يومها كل الناس اللى بحبهم

واهمهم (محمد) طبعا

كان يوم حر شويه كتير

بس كان حلو

يمكن هو كل مايجيب سيره اليوم ده يقول كان حر وفظيع والناس كلها بصراحه بتقول كده

بس انا مش بفكر زيهم علشان مش مهم كان حر ولا برد

المهم انه كان يومى انا ...خطوبتى انا

بس بقى

ودلوقتى نيجى للكلام المهم

اللى يدخل هنا يقول مبروك ويرقع زغروده جامده جدا

ومش هاقبل اقل من كده

واحلى زغروده هانديها جايزه على البوست الجديد

يارب عقبال كل حد لسه مقررش يدخل دنيا (ها يامحمد ياجمعه ) يشوف السعاده اللى ممكن يعرفها لو لاقى حد يحبه

ادعولى يااولاد

كانت معكم

رنا -كرسى المكتب

القراءه لعدم اللامؤاخذه الجميع

أحلى حاجه فى الدنيا ياأولاد فعلاً فعلاً يعنى انك تقعد تقرأ الجرايد وتضحك على الدنيا ماشيه ازاى

النهارده مثلا اجمد خبر قريته فى حياتى كان فى اخبار اليوم

عن قصه حب بين حصان وحماره وحشيه نتج عنها حصان مخطط شكله تحفه

سبحان الله بجد شكله حصان بس جلده مخطط

ودى طبعا اخره المشى البطال

ويماثل الهوايه دى جوايا برضه الفرجه على اعلانات ماما سوزان ومهرجان القراءه للجميع

اللى بتطلع فيه يسرا وكريم عبدالعزيز وابوتريكه ومتعب وباقى الناس الحلوين دول

وكلهم بيحثونا على القرايه وانها غذاء الروح اللى هى للى مش عراف موجوده جوه الجسد اللى مش لاقى ياكل

قوم بقى قعد افكر فى سؤال وجودى جداً وهو انى دايما بلاقى يفط مهرجان القراءه للجميع

وعمرى ما شفت فى محافظتى _الفيوم _ اى حاجه تدل على المهرجان ده

لا فى المكتبات العامه ولا الخاصه ولا المدارس ولا حتى عند بتاع الجرايد اللى بروح عنده

تفتكروا ليه؟

هل معنى ده ان مهرجان القراءه للجميع حاجه زى بقيه الحاجات اللى فى مصر؟ بنسمع عنها مش بنشوفها؟

ولا يمكن ماما سوزان كان قصدها العيال الكتاكيت الامامير اللى بيطلعوا معاها فى الاعلان؟

بس بصراحه بوستر المهرجان السنه دى الصراحه حاجه

موز ...موز....موز

على راى عماد اديب

ام هند برضه

حاجه جامده جدا

الريس واسرته احتفلوا بعيد الثوره اللى هو 23 يوليو يوم 19 يوليو

تفتكروا معنى كده اننا هانحتفل بشم النسيم يوم العيد الكبير والعيد الكبير فى العيد الصغير

ولا دى كانت صدفه وانا اللى نظريه المؤامره معششه فى مخيخى؟

انا قولت هانقضى يوليو كله احتفالات وهانتفرج على افلام خالده وعظيمه

زى الرصاصه لاتزال فى جيبى...مع انى بغسل هدومى

والطريق الى ايلات...فظيع الفيلم ده والله

واخيرا وليس اخرا

اغنيه على الممر...هما كانوا بيحاربوا ولا بيغنوا

عادى يعنى كله عند العرب صابون

وده كان اخر حاجه فاكراها من كل حاجه كان نفسى اتكلم فيها

المره الجايه هايكون رغى طبعا

اكتررررررررررررررررررررررر

أنا جه ياأولاد

أس...أس...السلام عليكم

ازيكم ياااولاد

والله والله والله وحشنى جدا انى اقعد استربع على الكرسى واخد الكيبورد فى حضنى والبس النضاره واقعد اكتب اكتب اكتب غالبا كلام انا سخصيا مش فاهماه بس طبعا انتوا كأصدقائى بتقبلوه منى

والله بجد وحشنى اوى الموضوع ده

بس هى كانت شويه ظروف وجوابات والحمد لله راحت البوسطه خلاص

والحمد لله الحياه بقى لونها بمبى شويه

ام هند يااولاد

انا مبسوطه اوى الايام دى

يارب ديمها نعمه واحفظها من الزوال

انا اتنكدت فى حياتى كتير ومش ناويه اتنكد تانى ابدا

وقوم بقى انا كنت فى دوره تدريبيه وخلصتها وبدات فى دوره تدريبيه تانى هاخلصلها وابتدى فى الدوره التدريبيه التالته

تحسهم مثلا مش طايقنى فى الشغل

بس خلاص بعون الله ارجع للتدوين وبكل قوه تانى ان شاء الله

بس انتوا قولوا يارب

وبجد شكرا لكل حد عدى وحط كلمه

وكل واحد وواحده قلقوا عليا

وكل واحد وواحده عدوا وملاقوش حاجه

مقالوش حاجه

رنا ....تانى

كرسى المكتب

يوميات موظفه مقهوره...3

ولما كانت البيروقراطيه والروتين الوظيفى هو المهمين والمسيطر علي حكومتك يا مصر ..فمن الطبيعي جداً انه يجيلى ضغط وسكر ومش بعيد شلل ثلاثى فى اطرافى الاربعه والاربعين علشان بس اخلص ورقى

المفروض طبعا انهم كانوا قالولى على عنوان معين اروح اقدم فيه الورق...وطبعا طلع العنوان ده غلط

قالولى على عنوان تانى برضه وطلع....غلط كالعاده

(تحسهم مثلاً مش عارفين بعض وانى بتكلم عن ناس مش موجوده )

المهم قالولى بقى العنوان الحمد لله المضبوط بعد لف فى شوارع المحروسه من ضريح سعد باشا زغلول لحد لشارع باب اللوق اللى كنت طول عمرى اعرف انه ميدان وفى الاخر طلع فى شارع البستان تقريبا

رحت بقى لشخص بعينه علشان ياخد منى الورق

لاقيت الشخص ده حد مهم كده هناك والسكورتيره بتاعته هى اللى قالتلى اروح فين علشان اخلص الورق

ورحت فعلا فى نفس الدور مكتب واحد كده محترم اوى

قعد يهزر معايا بقى هزار موظفين وانا كنت خلاص جبت اخرى ومش طايقه ماما اللى كانت ماشيه معايا اساساً

*هزار الموظفين ده بقى من عينه امضي الورقه ده منى ومن الاستاذ اللى قاعد قدامي وبعدين امضيها من استاذ فى اخر الدنيا وبعدين ترجعى هنا تانى علشان تختمي الورقه

وفعلا عملت كده اكروبات والله ياجماعه

وبعدين قالولى تنزلى بقى من هنا تروحي شارع مش فاكره اسمه بس باين كان رمسيس علشان اعمل الكشف الطبى فى مستشفى التأمين الصحى...وده مشوار تانى خالص بقى

وطبعا وقفنا فى حوالى 12 ألف اشاره مرور وملقناش اى مكان للعربيه خالص لدرجه انى نزلت المستشفي والسواق قعد يلف بالعربيه لغايه مارجعت

وبعدين برضه رجعت تانى لمبنى شئون العاملين اللى كان فى شارع البستان طبعا بجرى خايفه يكونوا مشيوا وخلصوا

وسلمت الكشف الطبى هناك وقعد برضه الموظف المحترم يهزر معايا هزار الموظفين تانى

وقتها حسيت بالدم فار من عروقى وعدى مرحه الغليان وقولتله يعنى ماتقعدوا كلكم جنب بعض

ايه فايده ان كل واحد يقعد فى طرف من اطراف المبنى واتمشور انا بينكم واخس النص وانا اساسا مش ناقصه

واخيراً

وليس اخراً

استملت الامر الادارى باستلامي العمل من تانى يوم

تحديداً 27 /2 /2007

يوم مشهود طبعا

ومشيت وانا فرحانه وعاقده كل الامال والاحلام انى هاشتغل بقى شغل فظيع جدا وهاحبه وشويه احلام ورديه الهى يارب ماحد يعدمها الا لما يشتغل

اول يوم شغل المره الجايه

يوميات موظفه مقهوره ....2

ولما كانت الردود مشجعه جدا الحمد لله

ولما كانت الخنقه كل يوم بتزيد ومفيش حد حاسس

قررت اسفه انى اكمل اليوميات علها تنزل فى يوم فى كتاب ويتحط عليها اسمي بالنيون

ويكون اسم الكتاب

"كتاب حياتى ياعين "

********

المهم يعنى انا ستبكم المره اللى فاتت وانا خارجه من باب القسم

المره دى هاتيجوا تلاقونى داخله القسم تانى بس معايا اختى الكبيره

اصلها ياحرام كانت امنيه حياتها انها تدخل القسم

دخلت للراجل الصول برضه بتاع كل مره بس من غير السواق المره دى

انا اوختى بس

وسألته على الفيش بتاعى اللى هو باسمى

راح رد عليها باستغراب كده وقالى

هو حضرتك بنت فلان باشا _بابايا يعنى _ ؟

قولتله

ايوه سيادتك انا بنته

قالى لما انتى بنت سياده الباشا مش كنتى تقولى كنا جبنا الفيش لغايه البيت

ده اصغر ....ملوش لازمه بيعمل كده لاهله البعاد قبل القريبين

قولتله بارك الله فيك ...هو الفيش خلص..؟

قالى لأ لسه مجاش بس اول ما يجي هانبعته البيت

قولتله ربنا يكرمك ومشيت

_واخده وضعى بقى فى القسم _

استلمت الفيش يومها بالليل والمفروض تانى يوم انزل بقى اجيب كعب العمل واجيب شهاده الخدمه الاجتماعيه اللى هو زى التربيه العسكريه للاولاد بس الفرق اننا مش بنعملها

ورحت بقى مديريه الشئون الاجتماعيه عند ناس من اللى هى لابترحم ولا بتسيب رحمه ربنا تنزل (استغفر الله العظيم )المكان اساسا غير صالح للاستخدام الادمى والموظفين من عينه 1 +1 = استنوا لما اطلع الاله الحاسبه احسبها وأسال فيها الريس بتاعى كده يعنى

المهم لله الحمد خلصت الموضوع بعد ما اتخانقت كده خناقتين على الماشى كده

مكنش فيه دم الحمد لله ولا استغلال للسلطات ولا اى حاجه

وكان فاضل بقى انى انزل مشوار لقاهره المعز علشان اسلم اوراقى هناك

وده بقى فى بوست لوحده ان شاء الله

********

فات بقى انى احكيلكم عن رد فعلى لما عرفت ايه هو شغلى

المفروض ان مامتى بتقولى هاتنزلى تعملي الفيش وتكتبى فيه

"وزاره الماليه"

وطبعا اختكم الهبله بسلامه نيه ردت وقالت

هاشتغل وزير ماليه ولا ايه...لأ ياماما مش للدرجه دى

انا لسه غرُ ساذج مش فاهمه الدنيا

ماما كانت ماسكه فى ايدها الكبشه بتاعه الاكل وشكلها كده كان ناوي يضربنى بيها

بس انا جريت على اخر لحظه واخدت ساتر

وللحديث بقيه ان شاء الله

يوميات موظفة مقهورة ....1

انا كنت قاعده فى بيتنا كافيه خيرى شرى ولا كان بيطلعلى حس ولا صوت ولاخبر ولا اى حاجه خالص _اينعم كنت بزهق واينعم برضه كنت بتمنى اشتغل بس فى حاجه تناسب عقلى وشخصيتى مش اى حاجه وخلاص_

ولما كان بابا وماما واخواتى والجيزان اشتكوا منى ومن قرفى تكرم وتعطف بابايا العزيز بانه يوجدلى فرصه شغل زى اى أب خايف على بنته من الجنان وفى نفس ذات الوقت زهق من ركنتها فى البيت وقرر انه يطلقها على الناس علهم يتعظوا من بلوته _اللى هى انا طبعا _ ويعرفهم انى اخره اللى ميسمعش كلام الست الوالده

المهم انه فى يوم من ذات الايام لاقيت بابا بيتصل وبيقولى

(رنا ياحبيبتى تروحى بكره القسم علشان تعملى الفيش والتشبيه )

رديت وبراءه الاطفال فى عينينا

(ليه يا بابا ؟؟؟ انت زهقت منى وقررت تودينى بنفسك للقسم يخلصوا هما منى بمعرفتهم )

قالى ( لا ياناصحه هاتروحى تعملى الفيش علشان الشغل )....سكت انا شويه

وهما يعنى مش واثقين فى كلامك يابابا لما تقولهم انى مليش سوابق ولا ايه

طب ده حتى انت شخصيه مرموقه فى البلد

المهم يعنى اخدت ديلى (مجازاً ) فى اسنانى والسواق فى ايدى ورحت رحله للقسم

وهنا قابلتنى جحافل من البشر كلهم بيعملوا الفيش او بيعملوا حاجه تتعق بالتجنيد تقريبا المهم ان كلهم كانوا شباب زى الورد الصراحه

وطبعا العبده لله ماشيه متخفيه ورا نضاره الشمس مش خوفاً من الشمس انما خوفاً ان حد يتعرف عليا اكون ضربته فى اى موقعه من مواقعى قبل كده

وطبعا السواق بتاعنا ماشى قدامى بيوسعلى الطريق.....كوسه بقى

واللى يكلمه يقوله انت مش عارف دى مين...وقبل مايقولهم يخافوا ويمشوا

دخلت الاوضه بتاعه الفيش لاقيت صول كده انيق ومبتسم للحياه السواق طبعا تعامل معاه وانا برضه مش راضيه اتكلم

وبعدين قالى اتفضلى

وقام ماسك ايدى كانه هايقبض عليا

وراح مغرقها فى بتاع مقرف كده _زى كل حاجه هناك _وحطها على الورق كانه بينتقم منى لسبب لا يعلمه الا الله

وخلاص بهدلى ايديا الاتنين قمت انا بسلامه نيه بطلع من شنطتى wipes

او للناس اللى مااخدتش عربى قبل كده مناديل معطره وفيها شويه صابون

طبعا طلعتها على اساس انى هانضف ايدي بعد القرف اللى هى مش متعوده عليه

لاقيت برضه الصول المعجزه بيقولى

ياابله !!! كده هاتوسخى المنديل

وقام كما الهمام المغوار مدينى ورقه جرنال امسح فيها ايدى

نهار ابيض ...بقى انا انضف ايدى من القرف بقرف اكتر منه

قولت يلا الراجل كويس وعايز يساعدنى

قولتله لا يافندم المناديل دى معموله علشان تتوسخ

واخدت الوصل منه ومشيت

وانا خارجه بقى واحد لطيف وظريف من الجحافل اللى ماشيه بييستظرف وبيقولى

( وانتى جايه برضه علشان الجيش )

وقفت بقى وبصلته من فوق لتحت

وقولتله ...ليه وهو انا زيك؟

ومشيت طبعا وراسى مرفوعه انى فتحت عكه

وخرجت من القسم ودى كانت اول مرحله من مراحل عذاب الشغل

واللى من ويالاتها بقول

****انا اللى جبت ده كله لنفسى ****

ملحوظه صغيره جداً

احداث اليوميات دى غالبيتها حصل وبعضها من نسج خيالى وبعضها كنت اتمنى انه يحصل

يتخلها نقد صريح ومحايد تماما للبيروقراطيه والضحك على الدقون الموجود فى حكومتنا الالكترونيه

انا هنا مش بفضح

انا بقول سلبيات وايجابيات

اخلاقيات كان نفسى الاقيها فى وسط مهم جدا فى حياتنا

واخلاقيات اتصدمت انى لاقيتها

كانت معكم

رناااااااااااااااااااا....كرسى المكتب

البلد بتولع يارجاله.....تاااااااااااااااانى

"وقد اغلقت عده مدارس فى الجيزه بسبب انتشار الحصبه الالمانيه بين طلبتها"

"وقد اعلنت منظمه الصحه العالميه جمهوريه مصر العربيه كبؤره من بؤر مرض الايدز بعد اكتشاف من 36 الى 39 حالات الاصابه بالمرض خلال شهر مارس فقط"

"ظهور 1032 نخله مصابه بسوس النخيل فى الشرقيه وحده والمرض يهدد بالقضاء على كل نخيل مصر لانه ينتشر من خلال الهواء "

"ومضات من الشهب المحترقه فى سماء مصر حتى 25 ابريل"

لو حد متابع كويس اوى للاحداث دى هايعرف انه خلاص

مصر بتحتضر يارجاله

انفلونزا الطيور واخدت كل الطيور

البقر وجاله الحمى القلاعيه

كده مش فاضل فيكى يامصر غير فيرانك ونملك وصراصيرك

ودول بقوا ثروه قوميه هانتغذى عليها المرحله الجايه

علشان كده انا من مزنقى هذا _كرسى المكتب

بنادى واطالب بان اى حد يشوف فار او صرصار او حتى نمله يعاملها معامله كويسه

دول اللى فاضلين لينا

بعد جنون البقر وهرب الجديان وجنون النسوان

ربنا يستر علينا

اعتقد انه خلاص مفيش حاجه تانى فى العالم سوا امراض او كوارث محلتش علينا

اللهم لا اعتراض طبعا

بس مش دول يبقوا مترفينا اللى فسدوا فينا

يبقى ده غضب ربنا

ويبقى مفيش فى ايدينا الا اننا ندعى

اللهم ارفع غضبك ومقتك عنا

يارب

فى عينيكِ عنوانى

وقالت :

سوف تنسانى

وتنسى اننى يوماً

وهبتكُ نبضَ وجداني

وتعشقُ موجةً أخري

وتهجرُ دفء شطآنى

وتجلسُ مثلما كنا

لتسمعَ بعض ألحانى

ولاتعنيكَ أحزانى

ويسقط كالمنى اسمى

وسوف يتوه عنوانى

ترىُ ستقول ياعمرى

بأنك كنت تَهوانى ؟

*****

فقلت :

هواكِ ايمانى

ومغفرتى وعصيانى

أتيتك والمنى عندى

بقايا بين أحضانى

ربيعٌ مات طائرهُ

عل انقاضِ بستانٍ

رياح الحزن ِ تعصرني

وتسخر ُ بين وجدانى

أحبك واحةً هدأت

عليها كلً احزانى

أحبكُ نسمهً تروى

لصمت الناسِ ألحانى

أحبك ُ نشوهً تسرى

وتشعلُ نارَ بركانى

أحبكِ أنت ِ يا أملاً

كضوءِ الصبح يلقانى

أماتَ الحب ُ عشاقاً

وحبكِ انتِ احيانى

ولو خيرتُ فى وطنٍ

لقلتُ هواك أوطانى

ولو انساك ياعمرى

حنايا القلبِ تنسانى

اذا ما ضعتُ فى دربٍ

ففى عينيكِ عنوانى

*****

جلست افكر فى هذه المعانى التى تزخر بها هذه القصيده الاكثر من رائعه ووجدتنى افكر جاده ليس فى الزواج من فاروق جويده _وكاننى لا افكر فيها _ ولكننى قررت الا ارتبط بشخص فى يوم من الايام لا يفهم معانى تلك القصيده

لايحس بكلماتها معى ولا احس بالامان الذى تتحدث عنه معه

اعتقد انه من ابسط حقوقى ان اجد من يحبنى هذا الحب واكثر

الا يكون مابداخله مجرد كلمات ينطقها لسانه ولا يحسها قلبه ولا يعمل بها عقله

لقد قررت اننى سأكف عما كنت افعله دوما وهو الاستبشار خيرا فى بشر لايعرفون للخير معنى

ان اكف عن انتظار الحب من اشخاص اعتادوا الاخذ والاخذ فقط منهجهم

قررت ان اكف عن محاوله البحث عن حب فى دنيا فقدت ابسط معانى التألف والموده بين بشرها

لقد قررت ان افقد الامل فى ان تستعيد حياتى رونقها سوى بمعجزه من الخالق يضعها فى دربى وقتما يشاء وكيفما يشاء

اصبحت امضى الليالى فى انتظار فارسى المجهول عله يحس بوجودى فى هذه الدنيا

فيأتى وينتشلنى من بحر احزانى

لقد اعتدت الان شيئا

ان اشكو فقط

بثى وحزنى الى الله

فلن اجد ارحم من الخالق بخلقه

" ولم اكن بدعائكِ ربى شقياً"

حافيه القدمين

انا ابتديت اشك فى (أحمد -مبرمج حر) غالبا هو ساب البرمجه واشتغل مباحث

وغالبا شغل المباحث بيطلع عليا انا

بعتلى تاج للمره الالف بعد الالفين وطبعا مش هاقدر اكسفه واقوله

مكنش انعذر ولا باع جزر ولا قال اسف اوعتذر

بالعكس خالص هجاوب عن التاج ده واى تاج تانى سيادته بيحبه

والسؤال هو

تكلم عن هوايه لما بتمارسها بتستغرق فيها وتنفصل عن عالم الواقع لفتره من الوقت ائناء ممارستها

بص ياسيدى وما ستك الا انا وسيد العباد ربنا

القراءه طبعا طبعا طبعا الهوايه الوحيده اللى بتاخدنى من عالم الواقع ترمينى فى عالم تانى خالص

بس سبحان الله نفس الحاجات اللى اخدتك فى القرايه اخدتنى برضه

يعنى انا ابتديت تقريبا اقرا رجل المستحيل وملف المستقبل وانا فى رابعه ابتدائى وكانوا عالم عجيب بالنسبه ليا بما انى كنت بقرا كتب المدرسه بكل الطلاسم اللى فيها

يعنى انا فاكره اول مره قرينا فيها انا واختى الكبيره قصه "الحرباء" رقم 101 فى سلسله ملف المستقبل كنا خايفين من اى حاجه صغيره ولو حتى صرصار احسن تتقلب وتبقى الحرباء

وفاكره اول مره بنت خاتلى جمعتنا وقعدت تحكيلنا "العنقاء" من سلسله كوكتيل 2000 اننا خفنا من صوت الفراخ وهى بتحرك جناحتها الفجر وصوت الديك وهو بيدن ومقدرناش نقوم نصلى الفجر من الخوف _ ايام البرءاه بعيد عنك _وبرضه اول مره قعدت تحكيلنا "حلقه الرعب " من سلسه ما وراء الطبيعه وكم الاثاره اللى كنا حاسيين بيها وقتها

وكبرت بقى انا وكبر جوايا حبى لنبيل فاروق وكل حاجه بيكتبها ونهمى انى ادور على كل حاجه ليه واقراها لدرجه انى كنت بجيب مجله الشباب علشان اقرا قصص الجاسوسيه اللى بيكتبها

بس برضه انا بحب "نور الدين وفريقه " اكتر من "ادهم صبرى" لان عقلى الضعيف مكنش قادر يستوعب فكره شخص بيضرب باطرافه الاربعه وهو بيضحك فى نفس ذات الوقت

بس مع تقدمى فى السن بقى بقيت بحب كوكتيل 2000 ودراساته الجميله اللى بيكتبها فيه ومؤخرا بقيت بقرا ماوراء الطبيعه (تغير برضه) مع انى حاسه انها ساعات بتكون غريبه شويه

بس انا فاكره فى مره كنت فى تالته اعدادى وكنت كأى طالبه مجتهده فى حصه العربى قاعده فى اخر بنش بقرا تحت الديسك اى قصه اجيبها انا واصحابى

يومها كنت بقرا روايه "دموع كيوبيد " من سلسله زهور وقعدت اعيط لدرجه ان الاستاذ افتكر ان فيه حد مات وانا بعيد عليه

من ضمن الهوايات اللى بنسى فيها الدنيا اغنيه "حافيه القدمين" لكاظم الساهر

ودى بالنسبه للناس اغنيه وبالنسبه ليا هوايه انى اسمعها واحس فيها كل مره احساس جديد ومختلف

اتمنى انى اكون عند حسن ظن سيادتك يااحمد باشا

كل تاج وانت طيب

وتقريبا هو مررله لكل البلوجر سفير بس اللى عايز يجاوبه يتفضل بالهنا والشفا

تاج كماااااااااااااااان

هاى عليكم
عاملين ايه ياشعب مقهور وطلعان عينيه
الحمد لله كويسين....فضل ونعمه
والله ياشباب الواحد محرج جدا من (مبرمج حر ) مررلى تاج من زمان اوى وانا مكنتش لاقيه وقت ارد فيه عليه
الشغل بقى وعندنا ورديات زياده اليومين دول لزوم خدمه الشعب
المهم يعنى التاج اهو
**********
هل كنت طالب شاطر فى المدرسه؟
نعم...؟ احنا هنهزر ولا ايه
طب لو انا كنت شاطره فى المدرسه ايه اللى كان هايرمينى فى كليه تجاره
بص ياسيدى وما ستك الا انا وسيد العباد ربنا
انا كنت شاطره لحد تانيه ثانوى وبعدين
الشيطان كان فاشل وافشلنى معاه
ايه كانت احب ماده واكره ماده فى المدرسه والكليه؟
بص بقى ياعم الحاج
انا من يومى وانا بحب الرياضه وشاطره جدا فيها
وبخترع طرق حل للمسائل كمان وبالذات لو كانت هندسه
لحد ما قابلت الهندسه الفراغيه وكرهتها ولعنت اليوم اللى دخلت فيه علمى رياضه
بس طول عمرى بحب الانجليزى فى المدرسه وكنت بكره الفرنساوى
وفى الكليه كنت فى كليه تجاره وشعبه محاسبه ومكنتش بكره قد المحاسبه وبجيب درجات منيله فيها
وبحب اداره الاعمال وبجيب درجات زى الفل فيها
ومحدش يسالنى طب دخلت محاسبه ليه
علشان محدش عرف يجاوب على السؤال ده
كنت عايز تطلع ايه وانت صغير؟
لحد ثانويه عامه الكل كان شايف انى هابقى مهندسه كويسه جدا
وهافلح فى الرياضه بطريقه عجيبه
وطبعا خيب املهم وصحيتهم مخبوطين على صخره الواقع
وفى الكليه كان نفسى اوى اشتغل فى اداره الاعمال والتسويق والكلام ده
بس برضه اتخرجت واشتغلت حاجه تانى خاااااااااااااااااااالص
ولا كان اللى كانت بتحلم الفتره اللى فاتت دى حد غيرى
بس معلش
محدش بياخد كل حاجه


انا بمرر التاج ده لكل واحد عندى اللينك بتاعه
وده اجبارى
انا اجلت البوست بتاعى عن التعديلات الدستوريه شويه لحد ما اجمع كلام هايبقى حلو ان شاء الله
استنووووووووووووووه

لمن يجرؤ ....فقط ؟

يلزم للاجابه على هذا السؤال المحرج معرفه....من يجرؤ على ماذا ؟!! وهو سؤال وجودى بحت نحتاج الى قرون من الزمان واطنان من الاوراق وبحور من الاحبار فقط لتناول المعنى الموجود فى السؤال

الكلمات السابقه قطعاً قد تخرج من فم عالم قدير او مثقف جليل او حتى شخص يصطنع كل هذا...ولكن " فيفى عبده " اختلف الامر لديها كلياُ وجزئياُ

بدايه احب ان اسجل اعتراضى على كل برامج التليفزيون التى يخرج فيها علينا الساده الممثلون والسيدات الممثلات بتصريحات فظيعه وافكار هدامه _كأنه لايكفيهم ان يسمموا عقولنا واخلاقنا بمسلسلاتهم وافلامهم و طبعا اغانيهم

شاهدت برمو حلقه برنامج "لمن يجرؤ فقط_فيفى عبده " على قناه ميلودى ارابيا وهالنى مارأيت لدرجه اننى قررت اسفه ونادمه على وقتى الضائع ان اجلس لمشاهده هذه الحلقه " تحسباً لحدوث ضجه اعلاميه اخرى كالتى حدثت لنكبه سرحان " والحمد لله اننى لم اشاهد هذه الحلقه من بدايتها _هذا من فضل ربى _والا كان اصابنى ضيق تنفس وفقدان شهيه اكتر من اللى فاقداها وضغط عصبى واحمرار فى العينين واصفرار فى الشفتين وتوابع زلزال 92

جلست والخوف بعينى اتأمل تليفزيونى المنكوب انا والست الوالده علشان نعرف يعنى الدنيا فيها ايه واهو ثقافه برضه ومحدش عارف يمكن الكلام ده يبقى بفلوس بعد كده

المهم يعنى لاقيتها على قدر عالى جدا من الجهل الا ان ده ميمنعش انها تكون على قدر على برضه من السخافه والسماجه وتقل الدم

الامر مكنش يخلو من شويه كلام على شاكله

انا فيفى عبده مبخفش من حد

انا.....جدعه (رقابتى حزفت الكلمه دى) ومحدش يقدر يكلمنى

دينا مين دى...معندناش حد فى الرقص الشرقى اسمه دينا

انا مهنتى ليها شرفها ولازم اعتز بيها

لحد ما اموت هافضل اقول لربنا انى بحب الرقص

وهلم جرجر وكله كلام منقى ياخيار الحقيقه

وانا طبعا اجى فين فى الست فيفى عبده وفى كلامها الجهبذ

بس انا اعتراضى على حاجه واحده بس

هو احنا اخرتنا اننا نعمل برنامج عن خناقات الرقصات؟

بعيد عن ان دينا غلطت او لا

او ان فيفى عبده نصبت نفسها متحدثه رسميه باسم الرقصات

بغض النظر عن رايى الشخصى فى الرقص واللى بيرقصوه

بس يعنى احنا خلصنا كل حاجه فى الدنيا وحلينا كل المشاكل علشان نروح ندخل بين اتنين زى دول

انا بحاول اظبط كلامى ومغلطتش فى حد علشان انا وعدت قبل مااكتب الموضوع ده انه نقد بس من غير تجريح

بس فعلا مش لاقيه كلام يتقال

وفى نفس الوقت بلعن ابو الزمن اللى وصل واحده زى فيفى عبده انها تبقى كده

وتتكلم بالطريقه دى

وتوصل للى هى فيه

افففففففففففففف

انا فعلا زهقت وبفكر اهاجر بقى

واسيبها لفيفى عبده ودينا يحلوا مشاكلهم فيها براحتهم

************

Dear mum...

on mother's day i wont give u a gift , i wont tell you happy mother's day coz i know how much u hate this thing

but i'll say alittle prayer for u

" may god keep u for us

may u forget any thing i did annoy u

may u shine my days as u always did

may u be forever with me

i know its too much for ask

but thats how i really feel

yah we had afight today

yah i become upset verey fast

but still i want u near me

love u mum

and really need ur embrace now

may god always be with u"

لأ ...لأ...ياملوع لى قلبى دقه دقه

لأ تيرارارا لأ تيرارارا

يا ملوع لى قلبى

دقه ....دقه

كنا قاعدين فى ساعه صفا نادره انا واخواتى

كل واحده فينا بتتكلم في حاجه غير التانيه خالص

وبعدين اذ فجأه مامتى حبيبتشى سألت سؤال من نوعيه الاسئله المحرجه

ماما بس كانت مشغوله الفتره اللى فاتت شويه

ومتعرفش نكته التعديلات الدستوريه

فسألت....هى ايه التعديلات اللى بيصوتوا عليها فى مجلس الشعب (بكسر الشين )؟

سرحت كده شويه

وقعدت افكر

افكر

افكر

افكر

انا لسه برضه بفكر ارد عليها اقولها ايه

ما انا برضه خايفه على مامتى من الصدمه اللى هاتحصلها لما اقولها التعديلات الجديده

وقد ايه هى مؤثره فى حياتنا من الالف للياء المربوطه

لاقيت اختى الصغنونه...هى مش صغنونه اوى بس اصغر منى بتقول

عايزين نروح فى التعديلات دى لما يعملوا الاستفتاء بتاعها علشان نقول لا

فا انا بقولها نروح نبوظ الورقه احسن

واهو كله فى سبيلك يامصر

قالتلى لأ ازاى

ده انا لازم اروح اقولهم

لأ ...لأ...لأ

واخدتها الجلاله فى الكلام وحسيت انها شويه كمان وهتقول

بالروح بالدم نفديك يامبارك

المهم يعنى

قولتها لأ انتى اختى ولازم اوعيكى ياشابه

الحكومه عندها حاجه اسمها تقادم ثلاثى

قالتلى يعنى ايه؟

قولتلها لو ليكى دين عند الدوله هايسقط بعد 3 سنين واهو اللى عند الحكومه مبيروحش

قالتلى يعنى ايه برضه

قولتلها بقى توضيحا وشرحا لوجهه نظرى

ان السيد الرئيس بقاله 25 سنه ماسك البلد كلها

منهم لحد ما انتى كملتى 18 سنه مكنش ليكى حق الانتخاب

يعنى ده من تلات سنين

يعنى حقك فى انك تقولى لا سقط ياحلوه من 3 سنين

يعنى دلوقتى لو رحتى قولتى

لأ..لأ...لأ

هاتبقى عند الحكومه

اةةةةةةة

صح ولا ايه

وبعدين انا اروح ابوظ الورقه احسن واكتب فيها تعديلات من عندى

واهو كله بثوابه

ولا انا بفكر ادخل اكتب اغنيه صباح رحمه الله عليها

الرحمه تجوز على الميت والحي

والعاقل والمجنون طبعا

لأ...لأ....لأ

ياملوع لى قلبى

دقه ....دقه

ولا انتوا ايه رايكم....؟

*************

جاءنا البيان التالى

5 طلاب فى جامعه بنى سويف اتفصلوا ومحدش عرف عنهم حاجه

ومرجعوش الا لما زمايلهم اعتصموا

طبعا هما كانوا طلبه من الاخوان المسلمين كالعاده بس المره دى سبب الفصل عبيط جدا

جدا يعنى

ولد من كليه تربيه علق فى الترم الاول ورقه عن الاقصى فى كليته

عادى يعنى

العميد (حنفي امام ) طلع قرار بفصله

وعلق القرار فى الكليه

زمايل الولد ده اخدوا ورقه من اللى كانت متعلقه بقرار الفصل من على الحيطه علشان الولد يشوفها

قام هوب العميد فصلهم

عادى برضه

وفى الاخر اعتصموا الطلبه

600 ولد

300 بنت

ورئيس الجامعه رجع الخمس طلاب المفصولين

راح العميد معلق وريقه تانى فى الكليه اسمها لائحه حنفى امام والى يخالفها يتفصل

وجارى الان محاوله الحصو على النسخه المذكوره علشان تفرحوا بيها

اه وكمان

العميد قاعد للدكاتره على الباب

اللى بيجى متأخر مش بيدخله وبيكتبه غياب

ولا تعليق

شفت بعينى...محدش قالى

يؤسفنى من كل قلبى ومن بيت الكلاوى كمان انى احكى موقفين حصلوا معايا من حوالى 3 اسابيع وبسبب ظروف كده اهمها انتحار الكمبيوتر اتأخرت فى انى احكيها وفضلت تكبر تكبر تكبر

لحد ما كنت هانفجر

وهانفجر فيكم دلوقتى

**********

اولا

الموقف الاول بالظبط يوم 22-2-2007

المكان المعادى

بالتحديد عند شركه الكهربا

من ساعه ما سمعت عن سفاح المعادى والحكايات عنه كتيره ومتباينه

بس اللى الناس اجتمعت عليه فى الاخر

انه طويل وضخم واسمر

واهم حاجه انه مجروح فى وشه من الممرضه اللى ضربته فى وشه

ده يخلينا كلنا لما نيجى ندور عنه ...هاندور ازاى؟؟؟

اولا غالبيه الاولاد دلوقتى بيوحوا جيم وبينفخوا عضلاتهم وحاجات كده

يبقى الاوقع اننا ندور على المجروحين فى وشهم ونشتبه فيهم

لو انا غلطانه حد يوقفنى يقولى

!!!!!!!!!!!

المهم قبل مااروح المعادى واحده صاحبتى اوى وبثق فيها موت حكيتلى انهم مقفلين المعادى وبيفتشوا كل الناس علشان بيدورا على السفاح

انا بصراحه قولت دى بتبالغ لحد ما شفت بعينى

اللى حصل بالظبط انى كنت واقفه جنب العربيه بتاعتنا بتكلم فى التليفون

وماما جوه العربيه

وولدين خارجين من محطه الميه تقريبا كانوا بيخلصوا ورق ولا حاجه ومعاهم موتوسيكل

المهم فجأه متعرفش منين طلعت عربيه بوكس سايقها ظابط مغوار

قفل عليهم بحركه امريكانى وهما اصلا كانوا لسه مركبوش الموتوسيكل

المهم يعنى راح معلى صوته اوى وزعق فى العساكر اللى معاه

وفى ثانيه الشارع اتكهرب

وانا واقفه بتفرج بعينى لسه

بس دخلت جوه العربيه

راح مزعق فيهم وقال

بطايقكمممممممممممممممممممممممممممممممممم

تحس انه كان بيكلم ناس مش بتسمع

الولد لسه بيطلع البطاقه وبيقوله بالراحه ياباشا

وده زغرله زغره حلوه اوى

وقاله انت كمان مش عاجبك

طب والله العظيم (باعتبار ان الظابط طبعا يعرف ربنا ) لا تبات النهارده فى الحجز

وانا لسه بتفرج

وراح مزعق فى العساكر وقالهم ارموهم فى الزباله اللى ورا

قصده البوكس يعنى

الولدين اترموا فعلا فى البوكس

الناس حاولت تكلم الظابط بس طبعا على مين

راح منادى ولد فيهم وقاله يبعد الموتوسيكل عن الطريق

وحطه فى البوكس تانى

ومشى

وطبعا فى المواقف اللى زى دى بيبقى نفسى اقول

عماااااااااااااااااااار يامصر

مش بالذمه احنا كده بندور على سفاح وبنخلق الف غيره

؟؟؟؟

**********

الموقف التانى بقى اكيد كلكم شفتوه قبل كده وعارفينه

وانا النهارده بالذات بحكى مش بحط وجهه نظر او استنتاجات شخصيه من خيالى المريض

ثانيا

لحسن الحظ انه كان تانى يوم

الجمعه 23-2-2007

كنت فى رحله مع كليه اختى

وكانت اول محطه لينا

الاهرام

واحب انوه ان دى كانت اول مره اروح الهرم

وطبعا كنت فرحانه اوى

بس بصراحه لما وقفت قدام الهرم محسيتش بالعظمه اللى كنت بسمع عنها

يمكن علشان موقف الظابط اللى كنت لسه شايفاه

المهم يعنى جريت انا واصحاب اختى واختى طبعا

كنا عايزين نتصور جنب كل حته وكل حجر نقدر نقف عيه

فرحانيين بقى

تقولش عيال صغيره

بس قابلتنا مشكله صغيره

ان احنا كلاب ولانسوى

هاتسالنى ليه هاقولك طبعا

الاجانب ياعم الحاج ليهم الحق انهم يمشوا فى كل حته ويقفوا على كل صخره ويطلعوا كل حجر

واحنا بقى لما نعمل كده

تلاقى فجاه عسكرى طلعلك من نو وير يقولك

منننننننننننننننننننننننننوع

انزلى ياابله من عندك

لا كنا عارفين نقعد

ولا عارفين نمشى

ولا لاقيين حته ضل نقف فيها

المهم خلاص كنا ماشيين بقى

قولنا نلحق نطلع على صخره جنب هرم خوفو نتصور جنبها علشان يبقى اثبات اننا رحنا الهرم

لقينا واحد جاى من بعيييييييييييييد بيزعق لينا برضه

انتوا مفيش فايده فيكم

وفضحنا وقعد يزعق والناس كانت ناقص تيجى تقوله معلش ياكابتن

واللى يغيظك بقى يامؤمن ان الاجانب كانوا بيرحوا ويجيوا براحتهم خالص

**********

بس خلاص

انا كده اللى كانوا واقفين فى زورى قولتهم

واللى عنده تعليق يقوله

واللى زيى اتحرق دمه

يبطل يروح يزور اماكن سياحيه

وعادى بقى

اعترفات ع الصبح

اس اس ...السلام عليكم
ازيكم ياجماعه ...عاملين ايه
يارب تكونوا كلكم كويسين
معلش بقى اتأخرت عليكم اوى (لو كان حد اخد باله يعنى) الجهاز اعصابه انهارت ...ضرب الويندوز ورفض يتحط عليه واحد غيره
المهم يعنى ان فيه سبب تانى للتأخير انى.......اشتغلت
اشتغلت ان شاء الله من يوم الاربع اللى فات وبقيت موظفه قد الدنيا فى الحكومه
عقبال اللى لسه مشتغلش واللى مخلصش دراسه لسه يحصلنا ان شاء الله
المهم بقى ان من الناس اللى افتكرونى وسألوا عليه وبعتولى تاج كمان...مبرمج حر
انا طبعا بعتذرله لانى لسه شايفاه امبارح والله وصحيت بدرى اهو علشان اجاوب عنه

اسم مدونتك؟؟؟
اسمها...هو انت مش بتعرف تقرأ ولا ايه
اسمها ياسيدى وما ستك الا انا وسيد العباد ربنا
امبارح كان عمرى عشرين
لماذا اخترته ...ماذا تقصد به ؟
اخترته لانى بحب اغنيه محمد منير اللى بالاسم ده
امبارح كان عمرى عشرين
واقصد بيه انى كبرت بسرعه لان الاسم بيعنى كل واحد او واحده عدوا حاجز العشرين ...فجأه
ولا انت ايه رايك..؟
هل فكرت فى اغلاق المدونه...والسبب؟
الحقيقه اه
فكرت فى كده مره وبعدين عدلت عن التفكير
واسمحلى احتفظ بسببى فى اغلاقها واقولك السبب انى مقفلتهاش
انى حسيت انها المكان الوحيد اللى بيسمع كلامى ويستحملنى من غير ما يحس بضيق او انا احس انى مكسوفه قدامها وانا بعترف ليها باللى جوايا
مفيش فرق بينى وبين مدونتى
صورتك فى المدونه...رمزيتها؟؟
الصوره لبنوته صغيره
ايوه هى اللى على ايدك اليمين وانت داخل
مش حلوه بذمتك
انا بحب كل حاجه صغيره
الاطفال الصغيرين...القطط الصغيره..بحس انها لسه بريئه...مش زينا
ويعنى يمن ربنا يكرمنى واجيب بنوته تشبهها لا سمح الله طبعا
طبيعه كتاباتك فى المدونه بشكل عام سياسه..قصه...كلام فاضى؟
اولا انا ضد ان اى واحد ينحصر فى جزء معين من الكتابه
اقولك ليه بقى
علشان مثلا اللى بيكتب قصص عاطفيه مثلا مش عايش فى البلد ويقدر يكتب قصه سياسيه تناقش الاوضاع العامه فى البلد يبقى معنى كده انه يقدر يتكتب عاطفى وسياسى وكتابه ساخره كمان لو يقدر
انما بقى الكلام الفاضى فكتر خيرك اوى
سكتناله دخل بحماره باين ولا ايه؟
المهم يعنى انى بكتب اللى بحس انه جوايا ونفسى اقوله
لماذا تدون اصلا؟
وانت مالك اصلا
اسئلتك كترت اوى ياباشمهندس
بدون علشان منفجرش من الكتمه والكبت اللى عايشين فيهم
وبعد سؤالك ده
انا بدون علشان اخنق عليك
احلى جمله قيلت لك فى وصف مدونتك؟
ممكن اقلب السؤال واقولك
ان احلى حاجه فى مدونتى ان الناس لما بتعلق بحس انها بتضحك فعلا
مش زعلانه وكئيبه ولو انا قدامها كانوا اعدمونى رميا بالقباقيب
التعليقات بالنسبه لك...اهميتها؟
اهميتها انى محسش انى بكلم نفسى
او انى بكلم الحلل فى مطبخنا
وانها برضه مش راضيه ترد عليا
احلى بوست كتبته ...ضع اللينك...ثم اذكر لماذا؟
بص يا باشمهندس
كلهم ولادى ومقدرش اقولك مين كويس ومين وحش
وبعدين كل واحد حر فى اختياره وقراره
دى مدونه حره فى فضاء انترنتى حر
افضل مدونه قرأتها ...يمكن اختيار عده مدونات؟
اه انت شكلك كده داخل توقع بينى وبين الناس هنا
كل مدونه دخلت فيها وعلقت تبقى افضل مدونه فى رايى
الا من رحم ربى طبعا ودخلت اتخانقت فيهم يبقى دول مش الافضل ولا حاجه
افضل بوست قرأته ...يمكن اختيار اكثر من لنك؟
افضل بوست قريته
وانت مالك بيه
وبعدين انا مش بحطلك لنكات علشان انا زهقت منك بصراحه
هل خسرت صديق بسبب كتاباتك هنا؟
لا طبعا
وانا اخسر صديق ليه
كل واحد حر فى رايه
ولازم الكل يحترم راى الاطراف الاخرى طول ما هى مش بتتعدى الخطوط والحدود المعروفه
حد قل ادبه فى التعليق..ايه رد فعلك؟
لا الحمد لله
محصلتش لحد دلوقتى
وبعدين هايقل ادبه ليه
انا مش بغلط فى حد على قد ما اقدر
ومش بتكلم فى حاجه عيب او حرام
اسوء مدونه ...الاجابه اجباريه...يمكن اختيار عده مدونات...هى كتير اصلا؟
بص اسوء مدونه الحمد لله اتقفلت
وهى كانت لواحده ربنا يشفيها ويهديها ان شاء الله
ومش هاقولك اسمها طبعا علشان دى اعراض ناس وعلشان محدش فى الشباب الكويس هنا ينحرف لا سمح الله
بس انا لاقيتها صدفه وصعقت من كم الاقبال والتعليقات اللى عندها
اسوء بوست؟
اسوء مدون؟
بص ياعم الحاج
انا مقدرش اقولك اسوء مدون او اسوء بوست لانى بصراحه صعقت من ردود الناس عنده
ودفاعهم عنه وعن حريته
وهو اصلا يستاهل الحرق
مكتبش حاجه عدله فى حياته حتى فى نقد الاوضاع من حواليه
غلط فى حاجات كتير
وارتد عن حاجات اكتر
ولو حتى هاتقولى حريه التعبير هاقولك فيه مسلمات ميصحش ان حد يقربلها

وكفايه عليك اوى لحد كده
هاتأخرررررررررررررررررررر
مع السلام عليكم

naughty

هاى عليكم

والله انا كنت داخله بفكر اكتب عن حاجه حلوه بس ملقيتش حاجه تتكتب او بمعنى اصح اللى لاقيته ملقيتش كلام يعبر عنه

الدنيا بقت ماشيه غلط خالص من كل ناحيه ...حاسه انها بقت ضلمه وهى منوره

الناس بقت بتاكل بعضها بسبب ومن غير سبب

مفيش حد مرتاح واللى المفروض يكون مرتاح عايز اكتر

فيروز بتغنى يامرسال المراسيل

مثلا مثلا خليكم معايا فى شويه افكار او تساؤلات مهمه جدا لاى حد بيشغل الاختراع اللى اسمه العقل اللى عندنا ايوه اللى جوه جمجمتك ورا عينيك ده

*اول مره فى حياتى اشوف جاسوس بيعترف على نفسه ...مش بيحاول ينكر ...واضح انهم كهربوه كويس اوى اللى يخليه يعترف بالسرعه دى وبعدين اسرائيل متدخلتش لانقاذه ليه زى ما عملت مع عزام عزام من قبله؟

ده سؤال محتاج حد من المخابرات يجاوب عنه

*ايه حكايه قناه الاهلى اللى هايبدأ بثها التجريبى مش عارف امتى دى مش كفايه علينا الايه ار تى سبورت بكل قنواتها والنيل الرياضيه ولا مثلا الجزيره الرياضيه

كنا ناقصين مثلا؟

*حد شاف او سمع السيده الفاضله هيفاء وهبى وهى تشدو برائعتها ( نوتى ) يارب اجيب مراره منين لكل الاغانى دى ولا بلاش الاغانى لكل حاجه بتحصل فى الدنيا؟

احنا كنا نقصين هيفا تعملنا شريط للاطفال فعلا

*والكبيره بقى والمسيطره على ساحه الاحداث الفتره اللى فاتت

كارثه هاله سرحان

بغض النظر انى مش بحب الست دى ومش بحب برامجها ( للامانه انا مش بحب برامج التليفزيون خالص) وبستهيف اخواتى لما يتفرجوا عليها او لما يصادف انى اسمع حوارها مع اى حد ومحاولتش مره اسمعها خالص الا مره واحده ايام حلقات زنى المحارم ومن ساعتها حرمت

بس يعنى اى حد عاقل بيفكر لازم يحس ان الموضوع فيه انه

يعنى مثلا ايه اللى عرف البنات دول طريق البرنامج لو هما فعلا كويسين؟

هما بيقولوا واحد اسمه رضا من البرنامج اتصل بيهم وقالهم وهما وافقوا

طب يعرفوا رضا ده منين؟

هو طبعا علمهم عند ربنا بس يعنى انا بفكر بصوت عالى

طب طلعوا ومثلوا زى ما بيقولوا زعلانين ليه؟

يعنى انتوا رضيتوا على نفسكم ان يتقال عليكم كده ولو كدب زعلانين ليه بقى؟

احنا اتفاقنا البوست اللى قبل اللى فات ان الغايه لاتبرر الوسيله

يعنى مش علشان انا محتاجه فلوس اروح اذل نفسى والا استاهل اللى يجرالى

انا بقول انا اروح انام بقى وخلاص

بلا تفكير بلا نيله

بس اوعدكم المره الجايه هاتبقى حاجه حلوه تفرح ان شاء الله

tomorrow i have to present a presentation about the youth problems i havent got any ideas .... i think i'll have to tell the master that me myself is a walking problem

take care all

good night

*******

ماجده الرومى بتغنى يقول انى امرأه

تسمحولى اغنى معاها

يقول انى امرأه

يغار منها النهار

واننى لؤلؤه

تعدو اليها البحار

يقولى انى اةةة انى

يقولى انى امرأه

*****

ويحسب الازهار لونى

وبسمتى نبع الصفاء

والعطر ابحارا بثوبى

ونظرتى وجه الضياء

يقول ان كل اللغات

تحار دائما بوصفى

واننى له الحياه

والحب امضائى وطيفى

يقول لى نهر الجمال

والله كم يهوى الجمال

ولفته الدلال منى

والناس يغويها الدلال

*****

اغنيه من قلبى

اصدائها فى صوتى

كرسول الحب

وعاشق لو يأتى

اييييييييييييييه التاج علينا حق

ولأن المرء منا لا يستطيع ابدا ان يرفض اى طلب لشخص عزيز او عزيزه عليه يعنى مهما كان الطلب صعب ومحرج شويتين
العزيزه مانو بعتيتلى تاج انما ماشاء الله سؤال واحده
الحقيقه دى دخلت عندى وقالتلى عليكى تاج وانا قولت التاج علينا حق ...قوم دخلت عندها وانا مشمره ايديا علشان اشوف التاج ده واقعد امخمخ فيه وافحصه وامحصه لاقيت العجب
التاج سؤال واحد
بتقولوا مين يااولاد
سؤال واحد
كام...سؤال واحد
بس طبعا بما ان خير الكلام ما قل ودل فان السؤال ده فيه الشفا
السؤال بقى اللى جاى ده
write down the three lines after the first five lines on page 123 from any book u'r reading now?
الترجمه بقى
اكتب التلات سطور اللى بعد اول خمس سطور فى صفحه 123 فى اى كتاب انت بتقراه دلوقتى؟
وللاجابه عن المعضله الحسابيه دى قعدت احسب لاقيت اللى هاكتبه الاتى
"والخط النحاسى فى سان سولبيس كان ذكرى اول خط طولى اساسى للعالم وبالرغم من ان جرينيتش جردت باريس من هذا الشرف عام 1888 , الا ان الخط الوردى الاصلى لا زال موجودا حتى اليوم"
والكلام ده من روايه شفره دافنشى
بس انا بعتذر انى كتبت من اول السطر التالت لانى لو كتبت من الخامس محدش كان فهم حاجه

وكا معلومه اضافيه من الروايه
"كوكب فينوس يحدد نجمه خماسيه كامله كل اربع سنوات لدى دورانه فى السماء وقد كانت دهشه القدماء لملاحظتهم لهذه الظاهره شديده لدرجه ان فينوس ونجمتها الخماسيه اصبحت رمزا للكمال والطبيعه الدوريه للحب , وتقديرا لسحر فينوس قام اليونانيون باستخدام دورتها ذات الاربع سنوات اساسا لتنظيم دوره العابهم الاولمبيه واليوم القليل من الناس يعرف ان برنامج الاربع سنوات للالعاب الاولمبيه الحديثه لازال يتبع دوره فينوس, واقل منهم يعرف ان النجمه ذات النقاط الخمس كادت ان تكون الطابع الرسمى الاولمبى ولكن تم تعديلها فى اللحظه الاخيره _ حيث تبدلت نقاطها الخمس بثلاثه دوائر متقاطعه لتعكس روح الالعاب المتسمه بالتناغم والوجود الجماعى"
كوكب فينوس عندهم طبعا اللى هو الزهره عندنا
تحديث
وكمان سلاطينو (احمد سلطان بيه ) رجع من شهر العسل حامى اوى وبعتلى تاج هو كمان وطبعا منقدرش منردش ابدا
والسؤال هو
خمسه اشياء لايعرفها عنك احد
طب وليه الفضايح دى طيب
امممممم اقولكم طيب وانتوا عدوا
1- مهما اتنرفزت وزعلت واتضايقت وخاصمت اصحابى او ماما مثلا او اى حد فى الدنيا مش فاكره مره انى صحيت من النوم تانى يوم فاكره انا ليه زعلت منهم...ممكن اقعد فتره مع نفسى ساكته ومش راضيه اكلم حد خالص بس بنسى فعلا سبب الزعل فعلا وممكن حد يجيى يصالحنى واكون فعلا ناسيه احنا اتخانقنا ليه بس زى ما تقولوا كده مش برضى احرجه
2-عبيطه جدا وانا بعترف بكده واى حد ممكن يضحك عليا باى حاجه ولو حتى شيكولاته جالاكسى واصحابى فى الكليه كانوا بيستغلونى اسوء استغلال
3-ياسلام لما اكون متضايقه واقف اكلم نفسى فى مرايه الحمام ولما ازعل اوى وصوتى يعلى وانا بعيط وتيجى ماما تخبط على الباب فاكرانى بكلم حد جوه
4-بكره اسمى علشان سهل اوى وصغير وبحس انه اسم عيال صغيرين
وكل ما اقول لحد اسمى رنا يقولى ...ياختى ياحلوه
5-وده بقى اعتراف محدش يعرفه
وانا طفله بريئه فى kg1
كنت ابتديت البس نضاره وكنت بحب النضاره دى اوى كان الفريم بتاعها لونه ابيض ومرسوم عليه شرايط لونها روز كنت بحبها اوى وفى يوم وانا فى المدرسه كسرتها واحده معايا فى الفصل واحنا بنلعب وانا قعدت اعيط وفكرت بعقلى البرئ لو قولتلهم انا اللى كسرتها هايزعقوا ولو قولتلهم صاحبتى اللى كسرتها هايزعقوا اكتر فقررت اقولهم انى انا اللى كسرتها واول ماروحت البيت والله البنت اختى اللى اصغر منى بسنه ما ستنتش لما اعيط شويه علشان اصعب عليهم وراحت قالت لبابا اول مارجع من الشغل وطبعا بابا زعقلى علشان دى كانت تالت نضاره اكسرها
المهم انا دخلت الاوضه بتاعتنا وقعدت اعيط واخدت حاجه من حاجتها ورمتها فى الشارع عند فيها يعنى
بس المشكله انا مش فاكره انا رميت ايه
:)
المهم بقى
ام هند يعنى انا بهدى التاجين دول
لبابا وماما واخواتى واحمد ابن اختى وعمى وعمتى
اقصد يعنى بهدى التاج الاول للناس اللى محلتوش والتانى برضه للناس اللى محلتوش
استاذ محمد مفيد
saso
و ضياء...ولو انى مش هو فين دلوقتى
وno fear
وكل الناس الحلوه اللى عندى
وكل سنه وانتوا طيبين
وسؤال يطرح نفسه دلوقتى
هو انا ممكن اعمل تاج لنفسى واجاوب عليه وابعته لناس ولا ايه...؟
ياريت اللى يعرف يفيدنى

هل انت ميكافيللى؟؟؟؟

هل خطر ببالك من قبل ان تسأل نفسك عن كونها ميكافيلليه او لا؟
هل تعرف اصلا ما هى الميكافيلليه؟
حسنا البارحه كنت فى فى سيارتنا انا اواسرتى وكنا تائهين (كالعاده فى شوراع المحروسه ) ويصادف حظى العاثر ان استمع الى الاذاعه العميقه التفكير عاليه الاحساس واضحه المنهج والاسلوب والغرض ذات الرساله العاليه ( نجوم اف اخ ) وكان البرنامج المذاع وقتها ( مش فاكره اسمه والله من كتر الاعلانات ) وكان سؤال الحلقه البارحه هو ..هل انت ميكافيللى التفكير ...او هل تؤمن بالميكافيلليه فى التعامل ...او هل انت من انصار ميكافيللى؟
وللى ميعرفوش ميكافيللى هو صاحب المقوله البشعه
الغايه تبرر الوسيله
وكان المذيع المثقف يوضح للمستمعين ما هو الهدف من هذه المقوله...وبالطبع يتخلل كل جمله سيل من الاعلانات والاغانى
المهم يعنى بغض النظر عن مدى سطحيه الردود والاراء والرسايل والمداخلات من عينه
"وبهدى سلامى لسوسو حبيبتى وبقولها متزعليش منى ياعمرى "
هو فعلا الغايه تبرر الوسيله؟
مهما كان نبل الهدف او الغايه مسموح لينا فعلا نعمل اى حاجه فى سبيل اننا نحقق الغايه دى
طب خليك معايا شويه وحياه والدك فى اللى جاى ده
*هدف الولايات المتحده الامريكيه من حرب فييتنام والقنابل الذريه على اليابان والحرب على افغانستان والغزو العراقى وتهديد كوريا الشماليه ومؤاخرا سوريا وايران كان نبيل لانها بتحمى مصالحها من وجهه نظرها طبعا وفى سبيل تحقيق الغايه دى عملت ايه...؟
واحد ..اتنين ..تلات الاف... سبعين الف... مليون ونص... خمسه مليون...تقريبا على اقل التقديرات ماتوا ما بين كل وسائل الحرب المباحه والغير مباحه
* هدف اسرائيل من سحل وسجن وضرب واباده اشعب الفلسطينى والمصرى فى فتره من الفترات واللبنانى والسورى ساعات انها توصل لهدفها
دوله اسرائيليه من المحيط...ايوه اللى هناك عند المغرب ده ...للخليج...ايوه مظبوط اللى ناحيه البحرين ده
طب ما هدفها نبيل اهو من وجهه نظرها برضه حد يقدر يعترض بقى
* اللى بيحصل فى العالم كله من انقلابات واغتيالات وضربات جويه وبحريه واى بلوه تحصل فى العالم من وجهه نظر منفذيها انها هدف نبيل يبقى احنا بنعترض عليها ليه
واخيرا وليس اخرا
* اللى حكومه نظيف بتعمله بتوجيهات من سيادته وابن سيادته وحرم سيادته من وجهه نظرهم هدف نبيل وفى مصلحه مصر ولو حتى ادى ده لموت كل الشعب المصرى_ عادى بقى _مهو كله فى سبيل الهدف النبيل
المهم بقى ياجماعه فى الاخر بقى احنا وصلنا لحاجه جامده جدا
احنا اساسا الهدف النبيل عندنا نسبى يعنى مفيش حد معين يقدر يخرج علينا ويقول ان ده هو الهدف النبيل طب ازاى الاستاذ ميكافيللى قدر يخرج بالكلام الجامد اللى بيقوله ده
طب الغايه تبرر الوسيله ...اى غايه تبرر اى وسيله؟
هاتفرق بقى مع مين غايه ايه ووسيله ايه مهو كله بقى محصل بعضه
علشان كده انا احب اطمنكم اننا كلنا جزء من هدف نبيل واحنا الوسيله لتحقيقه
ابشروا بقى يا شباب انتوا بتعملوا حاجه وانتوا مش عارفين
والناس اللى بتتضرب وبتتسحل وبتتعذب كلهم جزء من هدف نبيل
واخيرا
يسعدنى اقولكم ان هدفنا نبيل واننا كلنا طلعنا ميكافيللين فى وطن ميكافيللى بالدرجه الاولى


بى اس:
انا قريت فى الدستور مقال بيسأل الظباط الكويسين الطيبين او بمعنى اصح الاسوياء فين
انا احب ارد على السؤال ده واقول
موجودين سيادتك بس فى مواقع مش ظاهره او مش باينه او بمعنى اصح لاقوهم طيبين اوى ومفيش امل يبقوا مرضى نفيسيين يبقى خليهم فى مواقع مش محتاجه مرضى

كانت معكم
الميكافيلليه اوى
رنا
كرسى المكتب

فراشه احمودى

احمودى بيعيط اوى ومش راضى يسكت علشان كده قررت اغنيله اغنيه كنت بحبها اوى وانا صغيره

كان فيه فراشه صغنططه

مفرفشه ومزقططه

لابسه بلوزه منقطه

على جونله مخططه

منقطه ومخططه

*********

وسط الجنينه لمحتها

وهى طايره فى الهوا

ناديتها بصت تحتها

قولتلها تيجى نلعب سوا

قالتلى طيب يااسمك ايه

انا هاستخبى واختفى

فى اى مطرح هاتلقى

وان كنتى شاطره تعرفى

*********

قولتلها طب يلا العبى ياام جناحات ملونه

يلا ياحلوه جربى

هاتروحى فين منى انا؟

طارت وغابت فى الشجر

وعند اشجار الليمون

غابت تمام عن النظر

ولونها تاه بين الغصون

********

بصيت بعينى مشوفتهاش

بين الشجر معرفتهاش

كان الورق ستر وغطا

انا قولت لأ مبدهاش

مديت ايديا للغصون

وبسرعه هزتها اوى

لاقيت جناح بألف لون

بينفرد وينطوى

فضلت كتير متنططه

وهى طايره مزقططه

اما فراشه صغنططه

لابسه بلوزه منقطه

على جونله مخططه

يلا بقى ياحماده نام ياعسل وكل يوم كده هانغنى شويه لحد ما تنام
تصبح على خير ياحبيب خالتو

عقبااااااااااااااااالى يارب