شئ فى صدري

اطفالنا الاحباء

اتمسوا بكل خير

احنا عايزين النهارده بالصلاه على النبى نناقش موضوع جامد جداً يهم كل طفل فيكم

خيراللهم اجعله خير كده يارب

كنت قاعده بتفرج على الجهاز العجيب الغريب اللى بيسموه التليفزيون

لاقيت كده اعلان فيه طفل امور من الاطفال اللى بتطلع مع ماما سوزان

ماسك شويه اعلام لدول مختلفه وعمال بيلزقها على حاجه اعتقد انها خريطه للوطن العربي

ام هند يعنى

الاعلان ده عن دوره مش عارف ايه العربيه لمش عارف كام دوله لمش عارف كام لعبه

حاجه كده يعنى من الافشخانات اللى بيعملوها يعنى

بس اخر حاجه فى الاعلان اتكتبت قبل ما الاعلان يجيب اخره

(الرئاسه الشرفيه للمهرجان)

(فخامه الرئيس محمد حسنى مبارك )

وده استوقفنى شويه كده افكر

وانا لما بفكر يااطفال ببقى وحشه اوى يعنى

لان مخى التخين لما بيشتغل بيوصل لنتائج عبيطه زيه

المهم يعنى

الجرايد الحكوميه لما بتنافق الريس بيبقى من بابا المثل اللى بيقول

ان كان لك عند الكلب حاجه قوله يا.....وانتوا فاهمين بقى

بس الدوره دى يعنى مكنش فيها رئيس دوله عدل يعنى يمسك الرئاسه الشرفيه

ولا يعنى اللى كان هايمسكها كان هياخد بنبونى يمكن ولا حاجه

لا ولا تبقى مصيبه كمان لو كانوا مسكوه الرئاسه الشرفيه دى علشان يعنى ميبقاش محرج انها تبقى فى مصر ويبقى هو يعنى زى كيس الجوافه (لاسمح الله)يعنى من الاخر كده هايبقى زي دوره الامم الافريقيه اللى انا مقتنعه اشد الاقتناع انهم كسبوها مجامله كده يعنى

ومش عارفه ليه يعنى

يمكن اكون انا ظالمه ولا حاجه بس هو شئ فى صدري

وفيه شئ كمان

الظالمه المفتريه اختى لسه لحد دلوقتى شايله لماما سوزان مقولتها الشهيره فى حوارها مع العربيه

ان الريس زى الفل

صحته يعنى تقصد

فيها ايه يعنى

طب ما انا لما حد بيسألنى عامله ايه بقوله

حلوه الحمد لله

او زى الفل

هل معنى كده انى بيئه

لا خالص

يبقى ليه نظلم الست

مش كفايه بنظلم جوزها

ده احنا فعلا نستاهل اللى بيعملوه فينا

ماعلينا

عجبنى اوى اوى مقال ابراهيم عيسى النهارده

ربنا يزيده ويكرمه ويطعمه ما يحرمه يارب

محدش يقول على كلام بيئه بس انا بحاول ابقى زى الفرست لايدى بتاعتنا

لعل وعسى ينفخ فى صورتى وابقى زيها

**********

امبارح شفت حله من المسلسل الجامد جدا اللى بيجى على mbc4

commender in chife

بجد جامد جامد جامد وعجبنى اوى

مش تقولى قضيه رائ عام ومش عارف ايه

مامتى كان عاجبها الدالى اوى

اللى هو قعدنا لحد الحلقه ال 35 علشان نفهم هما بيتكلموا على مين

عادى بقى

المهم يااطفال

تقوموا دلوقتى تشربوا اللبن

وتغسلوا رجليكم

وتناموا على طول

اتمسوا بكل خير

لم يحدث ابداُ ان أحببت بهذا العمق

مش عارف كده حاجه غريبه

لا دى عجيبه

ممكن الواحد يسمع عن قصص حب كتيراو ناس حبت واتحبت كتير

ممكن اقعد احكيلك عن حاجات شفتها وحاجات عرفتها وحاجات عشتها كمان

بس فعلا صعب انك توصف احساس زى اللى عندى ده

انا اه مكنتش اعرفه قبل كده

اه شفته كتير بس مكنتش اعرفه

اه سمعت عنه كتير بس عمرى ماكنت اتكلمت معاه

غريب احساسى لما اتخطبت....بصراحه مكنتش فاكره انه هايبقى كده

بجد حاجه حلوه ...بس حلوه زيه

وهو قاعد قدامى بحس انى شايفه دنيتى بعد كده هاتبقى عامله ازاى

لما بكلمه بحس انى عارفاه من زمان اوى

يمكن الدم بيحن زى مابيقولوا

بس هى فعلا حاجه جامده جدا

وياه بقى لما اول صوت تمسعه يوم العيد يبقى صوته

وياه لما بسافر وابعد عنه

اه هو السفر والبعد عنه وحش اوى

بس يعنى لما تحس انك وحشت حبيبك اوى او انه قاعد مستنيك وبيكلمك كل شويه علشان بس يطمن عليك

ولما برد عليه ويقولى (ايوه ياحبيبى ) ببقى مثلا هاطير خلاص

والمشكله انى مش بعرف اقوله حاجه من اللى جوايا

ببقى قاعده قدامه زى البطه البلدى

اه ساعات بحاول اوصله اللى جوايا بس ساعات كتير مش بعرف

يارب يارب يارب يقدرنى واسعده

علشان بجد هو يستاهل كل خير