ازيكم....وحشتكم...والله وانتوا كمان
النهارده كنت قاعده بضرب المصاصه بتاعه بالليل اصل ده كيف بعيد عنكم قولت لازم ادخل عليكم بحاجه جامده جدا علشان كده جايباكم فزوره انما ايه حاجه رائعه فعلا
خليكم معايا
حد شايف الصوره اللى فوق...اكيد طبعا كلكم شايفنها ولا شكلكم لابسين نضاره زيى ...هى اه النضاره متعيبش البنى ادم بس نقول ايه فى الدماغ الشمال
المهم يعنى الفزوره بقى بتقول
لو انت غلبان
واكيد تعبان
ونفسك ترتاح فى وطن محتاج
عايز غذا
عايز دوا
عايز الوف مؤالفه
ليه ياترى
علشان طبعا ولا الحوجه للحكومه وبلاويها واللى بيجرى فيها
طيب ايه ياحلوين...طب ايه ياشطار
تفتكروا معايا كده المنظر الطبيعى اللى فوق ده يبقى ايه
المنظر ده من محافظتى....أيوه محافظتى الفيوم...باريس الصعيد...متستغربوش هما بيقولوا عليها كده الفيوم ببحيره قارونها وشلالاتها وسواقيها بس ده الوش التانىمنها
محدش يفتكر انى بفضحها انا بس بفضح حكومه مفضوحه
بس عليكم تعرفوا المنظر ده بالذات ليه نشرته هنا وبفضح بيه اى مؤسسه فى الدوله
كل اللى عليك تقرا الفزوره وتحزر
وطبعا على راى الاخت نيللى....العارف لا يعرف واللى مش عارف يتصرف
اتصرف
اه نسيت اقولكم على الجواير
الفزروه قويه وجوايزها مغريه...شقه وعربيه والجايزه الكبيره....الطاسه الذهبيه
كل اللى عليك تعمله تكتب وتقولى الصوره دى بتعبر عن ايه
معاكم يومين وبعدين اقولكم الحل
اى خدمات
10 comments:
حلوه اوى الفكرة
انا مش بشوف فوازير بس انتى محرمتنيش من فوازير رمضان ع البلوج المتميز دا
تحياتى لسياتك
اقلك بقا
بعد الصورة مكبرت حسيت انى شفت المشهد دا كتير جدااااااااا
شفته فى المنصورة بما انى من ابنائها .. وشفته ف طنطا بما انى بروحها وشفته ف القاهره وشفته ف المنوفيه طبعا .. دا اللى اقدر اكاد اجزم انى شفته فيه .. الاخوة اللى من اى محافظه تانية خلاف دول احتمال كبير بردو يكون شافه
انا مسفرتش بره عشان اقول مش هتشوفيه غير فمصر بس .. بس اعتقد ان امضاء عصر التدهور المصرى واضح جدا
البيوت التعبانه جدا اللى تقريبا دورين بس عليها دش
الله يا بلد .. نبقا مش لاقيين ناكل ونجيب دش .. طبعا فى موتوسيكل جميل لأحد وجهاء المنطقه دى .. اكيد هو بيحس انه مختلف لما يلاقى حمار امور لونه اختلط بالاسود ونسى لونه الاساسى من قرون واقف قريب من موتوسيكله
الارض بقا .. لدرجة انى شايف كتير فيها مش قادر اوصف .. فى مدونة اسمها نديميات تقريبا .. مكتوب فيها المجتمع زى الرصيف عايز يتكنس .. فى ناس بتعرق ع العيش وناس بتعرق م التنس
اظن مكتوب كدا
انا شايف القمامة والحيوانات والعيل اللى مخدش حقه .. جمب الدش والموتوسيكل والنخل
انا شايف بلد دايخه وسكرانه مش عارفه تجمع جملتين على بعض .. ووجود الولد بيقول انها هتفضل سكرانه لسنين جاية
الا لو ربنا اراد حاجه تانية
تحياتى وبعتذر عن التطويل
انا حاسس أنها قريبة من مكان مهم يعني في تناقض أو كده
يمكن برضه بسبب النخلة اللي طالعة في اماكن غريبة
يمكن وجود الدش جنب المنظر اللي بيدل علي بؤس شديد
مش عارف الصراحة
مستني الحل عموما
و بتمني جيمي ينزل هناك أكيد هيضبطوا المنطقة دي في ثانية
تحياتي علي الفكرة
انا محتارة. بس اشوف الطاسة الأول و بعدين اقولك
روني اوعي تكوني متضايقة علشان في دش فوق مبني معرش من دور واحد
ولا متضايقة من ولد بيمشي وسط البط والفراخ مع تحيات وزارة الصحه ومكافحة انفلوانزا الطيور
ولا الحمار اللي عنده جفاف مع اننا مش شاطرين غير في زراعة البرسيم
ناقص حاجة للمشهد
ايه..ايه.. فكري كده
:) مظبوط
محطة تقوية لموبينيل
اكيد طبعا انتى قصدك وزاره الاسكان والتعمير
علشان المنظر ده اصبح موجود كتير اوى اوى فى معظم المحافظات
وهما كل شويه يقولوا احنا قضينا على العشوائيات
ييجوا بقى يتفرجوا
وعموما اذا كان كلامى ده صح او غلط
الفكره اكتر من رائعه
lol @ saso
perfect answer
7ta lw msh fy nmozg elegaba
i liked it
تعالو بسرعه ادعو معايا
الحق اليوم الاخير ليله القدر
وادعى معايا
وقول امين
fenk
kolna missed u
2olty yomen w d7kty 3lena
المصريين كلهم بيتابعو التغطيه
الاعلاميه المكثفه لمكافحه انفلونزا الطيور
عادي جدا زعلانه ليه
Post a Comment