my hony

حبيبي واحلي حاجه فى حياتي

ضحكته بتنسيني كل حاجه

ساعات ببقي نفسي اضربه من شقاوته

بس اول ما بيضحك بنسي كل حاجه

هو يمكن مش احلي ولد

ولا اجمل طفل

ولا هايبقي اذكي عبقري فى زمانه

بس هو ابني حبيبي

بموت فيه

my son

السلام عليكم ورحمه الله وبركاته
ازيكم يابشر
اخباركم ابيه؟؟؟؟
يارب كلكم تبقوا كويسين واحسن ما سبتكم يارب
انا _ لو حد بيسأل علي اخباري يعني _كويسه الحمد لله
تمام يعني
وصوره الكتكوت الامور اللي منوره فوق دي
صوره my son
عليٌ الدين
احلي اخواته اللي لسه مجوش
بس ولد ايه
عفريت يعني
لانهار بينام ولا ليل بيغمضله جفن
كأن حد مسلطه عليه
يلا فداه
المهم
دي كانت اخر اخباري ومستنيه اخبار اى حد

أس أس ....السلام عليكم

هاي عليكم ورحمه الله وبركاته

عاملين ايه ياأولاد ؟

والنبي ليكم واحشه

انا تمام الحمد لله

اتجوزت بقي وخلاص

هنعمل ايه

الجواز علينا حق

بس والله يابنات حلو مش زي مابيقولوا

اللي يقولك ماتحسيبش ان الجواز راحه يبقي بيضحك عليكي

لو ان شاء الله ربنا كرمك واتجوزتي واحد بتحبيه هايبقي راحه

اوووووي

المهم ماطولش عليكم

ولا اطول

انا معنديش جهاز طبعا

بس الخطه الخمسميه الجايه

ان شاء الله

هايبقى عندي

وساعتها هاهريكم ضرب

ومفيش شتيمه

باااااااااااااااااي

باقِ من الزمن ....شهرين

مش عارفه

حاسه انى عايزه اكتب

بس نسيت الكتابه

حاسه ان نفسي اعيط

بس دموعي مش راضيه تنزل

حاسه اني مبسوطه اوي

وخايفه ازعل

فيه واحد صاحبنا هايدخل يقولي يابنتى افرحي شويه

وبلاش تنكدي علي نفسك

ده كلهم شهرين

بس وما ادراك ما الشهرين دول

شهرين وحلم حياتنا انا وهو هيتحقق

شهرين وهانبقى فى بيتنا

شهرين ومش هانسيب بعض تاني

شهرين ودبلته هاتبقى فى الشمال

(مع انها فى الشمال من يوم كتب كتابنا )

شهرين والناس هاتقتنع انى بجد بقيت مراته

المهم بقى فى الشهرين دولايه اللى بيحصل

خايفه ومش عارفه هابقى قد المسئوليه ولا لأ؟

خايفه مقدرش اسعده زى ما يستحق

(بكره ده لسه حكايه بعيده لسه فى علم الغيب )

ده محمد منير فى مداخله مع افكاري

هاتجنن خلاص

انا بجد الحمد لله مبسوطه اوي بيه

يارب هو كمان يبقى حاسس بكده

وحشنى اوي البلوج بتاعى

وحشنى اقعد بالليل افكر اكتب ايه

كاني كنت بكتب جواب لحبيبي

بس حبيبي دلوقتى بقى معايا

بفكر اعتبر البلوج ده واحد من اولادي

واكتبله لحد ما ربنا يكرمني بنونو صغير

ياررررررررررررررررب

ويطلع حلو زى بابا

يارب

العمليه فى النملية

على غرار الافلام العربيه القديمه اوى

والقديمه نص نص

انتشر تجار المخدرات تقريبا على طول امتداد طريق مصر الفيوم الصحراوي

وبقى مشهد عادى جدا وانت راكب عربيتك وماشى فى امانه الله

انك تلاقي على ايديك اليمين والشمال على السواء

عربيتين احدث موديل ونازل منهم ناس جوه الصحرا شويه

وماسكين ما يخيل ليا انهم شنط

واكاد اجزم انهم بيقولوا

العمليه فى النمليه

او الازازه فى البزازه

او رائعه سميره سعيد والشاب مامي

يوم ورا يوم...حبيبي

ماجانى نوم...حبيبي

الله اعلم بمدي تطور كلمه السر يعنى

المهم انهم زمان كانوا بيقفوا بالليل بس

دلوقتى بقوا فى وضح النهار

ومحدش بيهمه حاجه

ومع غياب كامل لاجهزه الامن بقى الموضوع عادى

وتطور كمان للهجوم ساعات على عربيات الناس المسافرين وسرقتهم

بيقولوا يامؤمن انهم زمان كانوا بالليل

قوم جات قوات الامن وعملت حملة وقفلت الطريق الصحراوى وبيقولوا برضه انها صفتهم

بس تقريبا ارواحهم وعفاريتهم اللى بقوا يقفوا فى عز النهار

يلا خير ان شاء الله

والله انا قولت للسواق بتاعنا ادخل رعش النور ليهم فى الضلمه

يمكن حد يديلك شنطه وهما مش واخدين بالهم

عادى بقى

هاكونا .... ماتاتا

هاكونا ...ماتاتا
حكمه نغمها لذيذ
هاكونا... ماتاتا
أرمي الماضي اللى يغيظ

بجد عجيبه جدا الدنيا دى لما تقعد تبص عليها كده من بعيد
تحس انك لاول مره بتتفرج على حياتك
بس من مكان الناس التانيين
مقاعد المتفرجيين يعني
* قعدت كده فى قوقعتي حبيبتى افكر وأفتكر فى نفس ذات الوقت
فى ناس عرفتهم ومكنوش يستاهلوا
وناس خسرتهم وخسرت معاهم كتير
حاجات عملتها وتقريبا كنت مش عارفه بعملها ليه
وحاجات كان المفروض اعملها ومعملتهاش
حسيت ان عندى 100 سنه
بس انا مش كبيره للدرجه دى
ومعتقدش انى هاوصل للسن ده
*قعدت افكر انى من سنه بالظبط كنت عامله ازاى؟
كنت من غير حماده...أحلي حاجه فى عمرى كله
كنت تايهه وعلى وشك انى اخد قرار غير كل حاجه فى حياتى
كنت اكتشفت ان الناس مش زيي ومش هايبقوا زيي
كنت عرفت قد ايه انا عبيطه والناس بتستعبطنى
كنت داخله عالم جديد...الشغل يعنى
عرفت كتير اوى منه
*فتحت كشكول قديم عندي حسيت كأني فعلا بتفرج على فتره من حياتى كرهتها
تعبت فيها ومنها اوى
حسيت ان كل اللى حسيتها وقتها رجعلى تانى
عرفت لتانى مره يعنى حد او حدايه بمعنى اصح يغدر بيك ويخونك وفى نفس الوقت يضحك فى وشك
يقولك انت اغلى صديق
وانت فى الحقيقه ارخص من ارخص حاجه عنده

***** تحديث علشان الجهاز نشر من غير ما اكمل ****

الفكره بقى انك مش بتبقى عارف هما بيعملوا كده ليه

او السبب اللى ممكن يخلى حد مش طايقنى يضحك فى وشى كل يوم

لمجرد انه يضحك عليا

* واهم حاجه بقى

مش شرط الناس اللى بنحبهم يبقوا معانا علشان مننساهمش

هنفضل فاكرين كل حاجه على راي عبدالحليم

ولاننسى

ولانقدر فى يوم ننسي

حبايبنا ...أعز الناس

*****

انا طبعا بقالى كتير اوى منقطعه عن التدوين

لظروف وجوابات وكده

بس رجعت اهو بقى

وجيت لاقيت العناكيب والتراب مبهدلين المدونه

هاقعد انضفها شويه

والف عليكم شويه

وارجع تانى وبقوه ان شاء الله

شئ فى صدري

اطفالنا الاحباء

اتمسوا بكل خير

احنا عايزين النهارده بالصلاه على النبى نناقش موضوع جامد جداً يهم كل طفل فيكم

خيراللهم اجعله خير كده يارب

كنت قاعده بتفرج على الجهاز العجيب الغريب اللى بيسموه التليفزيون

لاقيت كده اعلان فيه طفل امور من الاطفال اللى بتطلع مع ماما سوزان

ماسك شويه اعلام لدول مختلفه وعمال بيلزقها على حاجه اعتقد انها خريطه للوطن العربي

ام هند يعنى

الاعلان ده عن دوره مش عارف ايه العربيه لمش عارف كام دوله لمش عارف كام لعبه

حاجه كده يعنى من الافشخانات اللى بيعملوها يعنى

بس اخر حاجه فى الاعلان اتكتبت قبل ما الاعلان يجيب اخره

(الرئاسه الشرفيه للمهرجان)

(فخامه الرئيس محمد حسنى مبارك )

وده استوقفنى شويه كده افكر

وانا لما بفكر يااطفال ببقى وحشه اوى يعنى

لان مخى التخين لما بيشتغل بيوصل لنتائج عبيطه زيه

المهم يعنى

الجرايد الحكوميه لما بتنافق الريس بيبقى من بابا المثل اللى بيقول

ان كان لك عند الكلب حاجه قوله يا.....وانتوا فاهمين بقى

بس الدوره دى يعنى مكنش فيها رئيس دوله عدل يعنى يمسك الرئاسه الشرفيه

ولا يعنى اللى كان هايمسكها كان هياخد بنبونى يمكن ولا حاجه

لا ولا تبقى مصيبه كمان لو كانوا مسكوه الرئاسه الشرفيه دى علشان يعنى ميبقاش محرج انها تبقى فى مصر ويبقى هو يعنى زى كيس الجوافه (لاسمح الله)يعنى من الاخر كده هايبقى زي دوره الامم الافريقيه اللى انا مقتنعه اشد الاقتناع انهم كسبوها مجامله كده يعنى

ومش عارفه ليه يعنى

يمكن اكون انا ظالمه ولا حاجه بس هو شئ فى صدري

وفيه شئ كمان

الظالمه المفتريه اختى لسه لحد دلوقتى شايله لماما سوزان مقولتها الشهيره فى حوارها مع العربيه

ان الريس زى الفل

صحته يعنى تقصد

فيها ايه يعنى

طب ما انا لما حد بيسألنى عامله ايه بقوله

حلوه الحمد لله

او زى الفل

هل معنى كده انى بيئه

لا خالص

يبقى ليه نظلم الست

مش كفايه بنظلم جوزها

ده احنا فعلا نستاهل اللى بيعملوه فينا

ماعلينا

عجبنى اوى اوى مقال ابراهيم عيسى النهارده

ربنا يزيده ويكرمه ويطعمه ما يحرمه يارب

محدش يقول على كلام بيئه بس انا بحاول ابقى زى الفرست لايدى بتاعتنا

لعل وعسى ينفخ فى صورتى وابقى زيها

**********

امبارح شفت حله من المسلسل الجامد جدا اللى بيجى على mbc4

commender in chife

بجد جامد جامد جامد وعجبنى اوى

مش تقولى قضيه رائ عام ومش عارف ايه

مامتى كان عاجبها الدالى اوى

اللى هو قعدنا لحد الحلقه ال 35 علشان نفهم هما بيتكلموا على مين

عادى بقى

المهم يااطفال

تقوموا دلوقتى تشربوا اللبن

وتغسلوا رجليكم

وتناموا على طول

اتمسوا بكل خير