معلش زياده غلاسه

معلش اكيد بتستغربوا انا ليه بكتب اكتر من بوست فى اليوم الواحد بس معلش ده جه بظروفه
والله انا كنت ناويه والنيه لله ادخل انام وابعد عن التليفزيون واغنيله بس تقول ايه فى شوشو _الشيطان بتاعى بس انا بحب ادلعه_المهم يعنى ساقنى القدر انى اقلب على القناه الاولى المصريه فى ساعه صفا او حظ والله مافاكره كانت اى واحده فيهم المهم يعنى واذ بى افاجأ بالسيد المحترم جمال مبارك فى برنامج اسمه وجهه نظر ..والله انا حبيت الراجل ده لله فى لله....قعد يتكلم كلام كله منطقى ولانه طالع من القلب دخل بيت الكلاوى عندى على طول وقولت هو ده اللى كنت بدور عليه طول عمرى مش علشان ازاحم الانسه خديجه عليه لا سمح الله بس بجد قولت هو ده اللى تسلمله البلد وانت مطمن...بتسالنى ليه هاقولك
اولا كلامه كله محاور هو اه مقالش 26 يوليو ولا حاجه تانى بس احنا نفهم يعنى واتكلم عن الدعم وازاى انهم هايتشرطوا على الاسر الفقيره اللى هتاخد الدعم انهم يدوا البلد قد ما هاياخدوا سالتنى ازاى..هاقولك انت ممل اوى سيبنى اكمل يامؤمن وهاتعرف لوحدك
بيقولك احنا هانديهم الدعم وهما عليهم يساعدونا فى اننا نخرجهم من دائره الفقر...شوف الكلام الجميل...يعنى الدوله تديهم رز وهما يروحوا فصول نحو الاميه...الدوله توفرلهم الدوا وهما يروحوا الوحده الصحيه...الدوله هاتوفر لاولادهم المدارس والاولاد يروحوا يتعملوا فيها...والله يا جماعه اقشعر بدنى لما عرفت اننا شعب معندوش دم ومش مقدرين النعمه
بس تعالى بقى على الكلام الجميل...قالك فى مشكله النقل انهم هايحلوها هايحلوها ولو بعد حين او 24 شهر زى الوزير ما قال...بس المشكله مش فى السكك الحديد بس لان عندنا نقل برى وبحرى وجوى ونقل بيستعبط وكله عايز يتطور ...ايدينا على كتفك ياجمال بيه ...يا ابن الراجل الطيب
والكلام الاجمل بقى...المذيع اللطيف بيسأله سؤال علشان يحرجه يعنى بس على مين رد ولا عنتر فى زمانه
ساله المذيع عن مشكله التعليم وعن ان الوظائف المطلوبه فى مصر مش بتتناسب مع التعليم الموجود...بافتراض حسن النيه ان فيه تعليم يعنى...وده بيؤدى الى اننا بنستورد خبرات خارجيه ونسيب خيره شباب البلد للتعليم...رد السيد الموقر حفظه الله بحق جاه النبى ان التعليم هايتغير هايتغير تغير كلى وجزئى وان الطالب هايحس بالفرق لانهم ابتدوا يعملوا كده فعلا ...أبتدوا يصلحوا التعليم الحمد لله اخيرا وهايتطور وهايبقى 100 فل و25 علشان خاطرى
والله لو كانوا فاتحين الهوا فى البرنامج ده لا كنت اتصلت وقولتلهم شعر فى الراجل الكريم ابن الامراء ده وبرضه كان نفسى اساله سؤال فى الجون
هايحس بالكلام ده الطالب اللى لسه بيتعلم ...طب واللى اتعلم وادمر واطحن وربنا يتولاه بقى يعمل ايه...تفتكروا اعيد التعليم من اول وجديد املا فى فكر جديد وعبور الى المستقبل ولا انتوا ايه رايكم؟؟
ده كان سبب البوست التانى وياريت لو حد فيكم يحب نص الحلقه يقراها فى شريط الاخبار بتاع القناه الاولى او يستعوض ربنا فى رصيده ويشترك فى الخدمه ومش بعيد لو بعتوا الحلقه للجماعه اللى ربنا فاتحها عليهم وعندهم لايف
انا كده جبت جاز وخلصت كلامى
اصبح على خير طبعا