العلاقه السفسطائيه بين الجنيه والميه

جلست اتصفح جريده الدستور والتى صدرت لحسن حظى يوم الاحد بمناسبه العيد...يعنى اقراها الاربع والحد ورا بعض احمدك يارب...وجدت انها افردت صفحات كثيره بداخل عدد الاربعاء والاحد عن مشكله تلوث المياه فى الدقهليه وكيف ان وزاره الصحه كالعاده غرقت فى شبر ماء ملوثه كالعاده وانها لم تعرف للان السبب الرئيسى او بالاحرى الحقيقى وراء حالات الوفاه والتسمم ...عجز الاطباء والعلماء وكبار الممرضين والممرضات عن معرفه السبب الحقيقى مع انه ظاهر جدا
ربما سيلقى الذنب على الاهالى وانهم وراء الاهمال فى الحفاظ على نظافه المياه الغير نظيفه خلقه وربما سيلقى ايضا الذنب على ابرهه الحبشى كما سخر منهم الكاتب الفظيع_ بلال فضل_ ولكن السبب الاكبر يسُأل عنه اساتذه الاقتصاد والاعمال...تنحتوا...مش فاهمين حاجه من كلامى ...طب انا قررت فى اخر ليالى رمضان اتبرع بمعلوماتى الجامده جدا عن سبب تلوث المياه ورزقى ورزقكم على الله
باعتبار اننى خريجه طازه من كليه التجاره شعبه المحاسبه...درست فى السنه الاولى والثانيه والثالثه مواد الاقتصاد..والنقود والبنوك..والماليه العامه...بنفس ترتيب السنوات...وشلت منهم الاقتصاد والماليه العامه بمعنى اننى اتفوق على اقرانى باننى ذاكرت كل كتاب منهم مرتين ...وبالطبع كان يدرس لنا الجهبذ الدكتور سامى السيد وكيل كليه الاقتصاد والعلوم السياسيه على ايامى...كان راجل كويس والله...المهم يعنى كل المؤهلات اللى ذكرتها دى تخلينى على من اكثر الناس علما بخبايا الاقتصاد المصرى وذلك كما يقول المثل القديم..العلم مش فى الراس ولا فى الكراس بل فى الكتب الجامعيه واسألوا مجرب... ولهذا من واقع خبرتى فى التعليم عامه والاقتصاد خاصه احب ان ازف لكم البشرى التاليه
السبب الرئيسى الوحيد والاوحد فى تلوث المياه سواء النيل او المياه الجوفيه او البحرين المتوسط والاحمر وفى اسوان بحيره ناصر هو سبب بسيط جدا كنت اعتقد انه لن يحتاج عبقريه مثلى لكى تراه العين واضحا ساطعا كسطوع الشمس فى اليوم السادس من الشهر الثامن...عيد ميلادى يعنى
حسنا هذا السبب وبلا فخر ولا مط ولا اطاله ولا رغى وانا رغايه هو ......تعويم الجنيه المصرى
حد يسألنى ليه؟
انا اقولكم من غير ما تسألوا...تعويم الجنيه بدايه لمن لا يعرفه هو من الاخر وبالبلدى جعل الجنيه لا قيمه له امام العملات الاجنبيه ...بمعنى الدولار سعره يرفع تلاقى الجنيه سعره فى الارض...تلاقى برميل البترول سعره بقى اغلى الجنيه ينزل تحت الارض...وهلم جرر...وعلى فكره اللى يقولك ان تعويم الجنيه غير كده يبقى مش فاهم اى حاجه ويجى عن الخبيره تعرفه
طيب دلوقتى ايه العلاقه بين الجنيه وتلوث الميه.؟؟؟
العلاقه باينه واضحه ...الجنيه بنعومه فى ايه...أكيد ميه...امال هانعومه فى بنزين مثلا ده حتى سعره ارتفع هو التانى...بس ما احنا معومين الجنيه من زمان اشمعنى دلوقتى الناس ابتدت تشتكى من التلوث...أقولكم برضه
زمان الجنيه كان مقرف كده ولونه منيل الحقيقه والناس كانت بتستخدمه فى كل حاجه من كروت المعايده لكروت السبوع ل..احمد ومنى للابد...وتحت السجر ياوهيبه ياما كالنا برتجال...وبقى ينضفوا بيه اسنانهم او يبلوا ايديهم بحاجات مقرفه كده علشان يعدوا الفلوس...بس مع كل ده يامؤمن عمرنا ما سمعنا عن حالات تلوث...علشان قرف الناس كان منها فيها يعنى الناس تعامل الجنيه اسوء معامله ولما تشرب الميه اللى اتعوم فيها مكنتش بتفرق معاها يعنى مكناش بنطلع خيرنا بره....بس ايه الجديد دلوقتى
اقولكم برضه
الجنيه بقى معدن يارجاله
الناس لاهى عارفه تكتب عليه ولا عارفه تبل ايديها عليه علشان تعده ولا عارفه تنضف بيه اسنانها...ده غير طبعا انه مش سامح باى معامله مش ادميه ليه ...والسبب الاعظم بقى ان المعدن بيصدى فى الميه يعنى لما نيجى نعوم الجنيه المعدن فى الميه هينزل منه حاجات مش مننا يارجاله ولما الحاجات دى نشربها اكيد هاتضرنا...هاتبقى ميه معدنيه واحنا مش واخدين على الحاجات دى...احنا نشرب من القله ..الزير...الحاجات التراثيه دى مش تقولى ميه معدنيه ومتكرره...كدابين علشان انا مأخدتهاش فى المدرسه
انا كده افصحت بمكنونات صدرى وعلى اى واصل منكم يقول للساده الممسوسين على الحل اللى ابسط مما كانوا يتخيلوا...بس هانقول ايه يوضع سره فى ارفع خلقه
رمضان خلص...والعيد جه...والعيد فرخه زى مابيقولوا
كل سنه وانتوا طيبين
الا صحيح ...انا حاسه نفسى بكتب مواضيع كتير فى وقت قليل...انا اه طبعا عارفه نفسى رغايه بالكهربا...بس يعنى انتوا ليكم مطلق الحريه انكم تقولولى هدى اللعب شويه...انا البلوج بتاعى كله ديموقراطيه مهو مش معقول هابقى انا والحزب الوطنى عليكم
تصبحوا على خير وكل سنه وانتوا طيبين