Wednesday, November 01, 2006

يعنى عمو محمد يعين عمو جمال وانا معينش ابنى...اخص الله يكسفكم

انا كل ما اقول التوبه ياابويا...يرمينى التعليم فى دهاليزه تانى
البوست المره دى مخصوص اوى واسيبشيال اوى اوى بمناسبه خناقات (انتخابات سابقا ) اتحادات الطلبه والمقامه حاليا فى جميع جامعاتك يامصر...البوست ليكم يا صيدله بنى سويف
فى غياهب النسيان ودروب الزمن المظلم ومتاهات التاريخ فى مصر بس بالمناسبه ترتبط بداخلنا اى انتخابات تجرى بالمظاهرات والمشاجرات والاحزمه والهروات وكل الاسلحه البيضاء والصفراء الخضراء والحمراء وكل ما يمت بصله لتعريض البشر للاذى ...دوما ترتيط الانتخابات بداخلنا بانتصار الباطل على الحق ضربا بكل موروثتنا القديمه بان الحق من ينتصر عرض الحائظ ...اكنت يوما طالبا او طالبه محترماً فى احدى الجامعات الكثيره اوى ورغبت شأنك شأن زملائك ان تترشح لانتخابات اتحادات الطلبه وبدون سبب وجيه او بسبب تم شطب اسمك؟
اكنت يوما طالبا ذو توجه سياسى او دينى ادى الى تربص الامن واداره الجامعه بك؟
اشهدت يوم الانتخابات فى جامعتك او كليتك وصدمت لما رايت؟
اكرهت يوما حقيقه انتمائك الى تلك الفئه الطلابيه والتى تتخذ شعارها فى الحياه...الانتخابات اللى تجيلك منها الريح ...طنشها واستريح؟
حسنا انا كنت مثلكم تماما لا علاقه لى بما يجرى فى الكليه خاصه والجامعه عامه...حتى عندما كان طلبه الاخوان يعتصمون رفضا لشطبهم من الانتخابات الطلابيه كان اول ما يتبادر الى ذهنى _يعنى جات على اتحادات الطلبه مهى اصلا ماشيه معاهم بالعكس على طول _حتى انهم يوما اشتروا كوسه...ايوه كوسه مستغرب ليه؟...وقاموا بتعليقها على مداخل مبنى كليتنا تجاره بنى سويف دليلا على تكويس الانتخابات بس الحقيقه احنا عمرنا ما سمعنا ان فيه انتخابات ولا ترشيحات ولا حتى عرفنا اسم رئيس اتحاد الطلبه ايه...بس الغريب انى اه مش ذات توجه دينى زيهم بمعنى انى مش اخوانيه ولا تياريه لانى برفض زى اى حد فيكم ان الدين يبقى تيار بس كنت شايفه انهم من تعاملهم مع الطلبه كسبوا تعاطف ناس كتير اوى لانهم قبل كل حاجه كانوا ذوق جدا خدومين اوى واهم حاجه محسناش عمرنا يعنى انهم بيتفضلوا علينا بدينهم...بالرغم من رفضى لسياسه المظاهرات والاعتصامات اللى متبعينها لانها غالبا بتخلينا نفقد تركيزنا فى المحاضرات اللى اصلا مش فاهمينها ده غير انها بتكون تحت رعايه الكليه اولا والجامعه ثانيا يعنى برضه بتبقى على مزاج الامن ...بس كتجربه لطلبه الاخوان فى بنى سويف نجحوا نجاح تام فى انهم يكسبوا اصدقاء كتير....مش بالترهيب زى ما بسمع بس بالعقل وكمان علاقتهم بالطلبه المسيحين كانت كويسه...بس اقدر اخد عليهم حاجه واحده بس ...رفضهم لكلام معين لاى دكتور والزامه لو هو دكتور محترم يعنى بانه يسحبه فى المحاضره التاليه
المهم بقى البوست ده مناسبته حاجه عرفتها النهارده عجيبه عجيبه الحقيقه
انتخابات اتحاد الطلبه فى صيدله بنى سويف...اتكوست تكويسه جامده جدا...ازاى بقى
شوف ياسيدى العميد بجلاله قدره وعلو شأنه وارتفاع منزلته....ظبطها لابنه علشان ياخدها بالتزكيه او الكوسه او فيه باميه لو تحب...المهم يعنى انه هايخلى ابنه طالب تانيه صدليه حديث اللى اصلا مش بيحضر ومش بيجى ومحدش يعرفه وغالبا مش بيقوم من النوم رئيس اتحاد الطلبه...بدل من طالب تانى الكليه كلها عارفاه
لحد كده الموضوع عادى بس اللى مش عادى بقى رده على الموضوع ده او تبريره ليه
"يعنى عايزين عمو محمد يعين عمو جمال وانا معملش لابنى حاجه" اخص الله يكسفكم طلبه هم الراجل بيعمل لمصلحه ابنه
الراجل بيعمل اسوه برئيسه يعنى لو الريس قال ذيع هانذيع...اقصد يعنى لو الريس قال توريث يبقى احنا هانهيص
انا من مكانى هنا...كرسى المكتب كالعاده...بقول لابويا كده يابابا تسيب المرور من غير ما تخلينى عسكرى فيه؟؟؟؟اما مقهوره
وخلاه رئيس الجميعه العلميه ...ودى تقريبا حاجه كده زى الاسر فى باقى الكليات بس يعنىالطلبه عاملين ليها شغل جامد جدا وندوات ودورات ...ده على كلام الدكتوره اختى انها حاجه حلوه وهما فرحانين بيها وبيعلوا فيها تشاط كويس...خلاه رئيسها كده من الباب للشباك الواد اللى لسه نايم فى بيتهم او عنده اهتمامات اخرى غير الكليه يعنى...عينى عليك يازمن
المهم يعنى لو انت شفت العاشره مساءاُ النهارده وشفت اللى بيحصل فى جامعه القاهره ولو انت شفت العاشره مساءاً اول امبارح وشفت اللى حصل فى جامعه عين شمس هاتعرف البلد دى رايحه فين...لو انت مشفتش انا هاقولك
كالعاده اتشطب طلبه الاخوان والطلبه المستقلين من كشوف الترشيح فى مقابل وجود طلبه مواليين للحزب الوثنى...وقامت خناقه وامن مركزى وامن مش مركزى وتشوف التليفزيون ياجدع تقول دى خناقه فى سوق مش اعتصام لطلبه اتهدر حقهم
طيب بلاش كل ده...نفترض ان الاخوان دول وحشين زى ما الدوله عايزه تفهمنا او مثلا زى راى حضرتك بعيدا عن الدوله...مش برضه الطلبه هما اللى بيتعاملوا معاهم وليهم الحق انهم يقرروا مين يمثلوهم او مين يشطبوهم ولا كالعاده الدوله عايزه تاخدلنا نفسنا كمان ...هو ده اللى ناقص
طيب بلاش عمرك انت كطالب قديم ومخضرم...حلوه مخضرم دى...فى سلك التعليم عمرك اتحاد الطلبه عملك حاجه دى حتى فى كليتى الرحلات الاسر العاديه هى اللى كانت بتطلعها ورئيس اتحاد الطلبه وباقى اعضاؤه كان كل همهم اللهم انهم يتظبطوا من العمال والاداريين فى الامتحانات ...بس تحب تشوف ميزانيه الاتحاد.....هع عجب ياراجل...كوره لزوم اللعب 150 جنيه فقط لا غير....اخص عليهم جابوا كوره من ام فقط لاغير...طيب انا مليش فى الكوره ولا بفهم فيها بس انتوا كشباب قولولى فى كوره فعلا من اللى بيتلعب بيها فعلا ب 150 جنيه فقط لا غير ...طب ولو هى فعلا كده كل سنه هاتجيب كوره ب 150 فقط لا غير يعنى الكوره مش بتسخدم غير سنه واحده فقط لاغير؟ سؤال يطرح نفسه
الى طلبه صيدليه بنى سويف
معلش هى الدنيا كده ...كل من عليها finish
بس مش لازم تبقوا فى سلبيتنا وقت ما كنا مكانكم اثبتوا على موقفكم ودافعوا عن حقكم...اللى بيفرط فى حقه مره سهل يبيع وطنه والقضيه كلها ويبقى كائن انوى ملوش طلب او لازمه
بالنيابه عنى نفسى واصدقائى البلوجريه بنقولكم...ايه يعنى ابن العميد...اللى هايقدر على ابن العميد هايقدر على ابن الرئيس
فيكوا تنسوا
صور حبايبكم
فيكوا تنسوا
صور حبايبكم
فيكوا تنسوا
لون الورد وورق رسايلكم
فيكوا تنسوا
نفس المكان اسامى الايام والمجد اللى الكم
لا تمسوا اثار
لاتنسوا وطنكم
انا اللى بيسمونى الملكه
بالغار متوج زمنى
مملكتى ما فيها بكى
وجبينى ولا مره حنى
شعبى ذهبى فرحى وغضبر
بترك صوتى ومابترك وطنى
لا تنسوا وطنكم
ده منتدى الجمعيه العلميه لطلبه بنى سويف للتضامن اتبرع ولو بكلمه
http://www.bspsa2.tk/
كالعاده رنا حسام...كرسى المكتب


6 comments:

Diyaa' said...

ملقيتش مكان معين اتبرع فيه بالكلمة دي ..
بس ممكن تكتبي علي لساني هناك لو لقيتيه يعني
اكتبي تعليقي كله أو نصه أو حتي ربعه
المهم يحسوا أنهم مش لوحدهم ولولا الفقر اللي الواحد فيه كان شغل نفسه بالسياسة زيهم لحد ما اخد استمارة 6 من الدنيا دي
قوليلهم ان ربنا ممكن يكون واضع فيهم سره ...كونهم قريبين منه ودماغهم نضيفة بالشكل اللي شفته في المنتدي والسايت ده معناه أنهم بيفهموا ويستاهلوا مش بس اتحاد طلبة لأ يستاهلوا عمادة الكلية بدل ال**** اللي عايز يعين التافه ابنه في أي حاجة ادامه أهو يعمل منه بني أدم بعد ما فشل في كده في ال 20 سنة اللي فاتوا ..
ما هو زي ميمي ..حط جيمي في اللجنة بعد ما الواد عمل 35 سنة كان بيقول فيها للحرامية الكبار يا أونكل وبياخد منهم العيدية كل عيد ..دلوقتي بقوا يقولوله يا أونكل ويستأذنوه يدوا العيدية لمين قبل كل عيد
شايفة الفرق طبعاً
يا شباب اللي بيعوز حاجة بيضحيلها ..وزي ما ريسنا حماه الله ..عنده اعتقاد بيحركه ..انه كل ما يتنازل للشعب عن حق من حقوقه اللي أصلاً مش محتاجة تنازل هيطمع الشعب ويطلب تنازل تاني وتالت ..مش هيخلص يعني و ممكن يطلبوا منه يرجع فلوس البلد اللي نهبها من سويسرا ..
واحتمال يطلبوا منه يعمل محاكمة عادلة في موضوع قتل السادات ويجيب الروس الكبيرة ..رغم أني مش بحب السادات بس متأكد أن مبارك ليه في الموضوع
عذراً للأستطراد
قوليلهم أنهم حتي لو مخدوش حقهم ...هيعملوا خطوة لأدام ..للسنة الجاية أو اللي بعدها ..للجيل الجاي ..هيحسسوا الناس ان مش الأكل والجنس هما الدافع الرئيسي اللي بيحرك الناس
في حاجات تانية أكبر من كده
وأكيد هيعرفوا يوصلوا لحقهم أو يفضحوا عميد الكلية في كل الجرايد ...علي الأقل
وياه لو سجلوا الحكمة اللي قالها دي
يعني عمو محمد يعين جيمي وأنا معينش ..يحرام
يعينك عزرائيل في جهنم يا بعيد
والسلام ختام وويلكم باك ياروني
ومتعصبيش نفسك
وشفتي البنت مني الشاذلي امبارح بتحرق الدم ازاي ؟!
قال ايه الجامعة مهما كانت مؤسسة تعليمية وليها هيبة ...يعني الجامعة منتشر فيها الجواز العرفي والمخدرات وجمعية جيل المستقبل ومش بيعملولهم حاجة ..الجامعة اللي عبارة عن مكان كبير للمواعيد الغرامية وجلسات النميمة ..ومكان ضئيل للعلم ...
احترام ايه وهيبة ايه بس
ربنا ياخد اللي كان السبب
السلام ختام تاني

Anonymous said...

من أكثر الأشياء اللي بتطلع عفاريتي الأسلوب الصمامي ، يعني أني أمنع حاجة لما تحصل من شخص معين ، وأرحب بيها لما تحصل من شخص تاني في نفس ظروف الشخص الأولاني..

يعني الأحزاب ممنوع دخولها الجامعة ، ماشي يا سيدي ، لكن بأي منطق أدخل الحزب الوطني مكانها؟

مش همة دول اللي صدعونا بالقول بأنهم حزب حكومة مش حكومة حزب ، يعني ليهم العمل السياسي دون استغلال موارد الدولة الممولة بأموال دافعي الضرائب لحسابهم الخاص؟

بالمناسبة .. أكيد سمعتي عن بطاقات التهنئة اللي بيوصلها الحزب الوطني بالبريد مع بطاقة الترشيح بتاعة التنسيق .. الموضوع جه في موقع عشرينات من كام شهر..

وسلم لي على سياسة تلبيس الزبون العمة ، وبيع اللحمة العجالي على إنها كندوز!

Anonymous said...

thanx 3la el support

ما نجليكوش ف حاجه وحشة

امضاء:

الصيادلة الأحرار

mariam said...

ياه دة الكلية عندنا كانت ثكنة عسكرية والأمن محاصرها اية. و حاجات تانية كتير. كنت تعالى شوفى

rony said...

قلم جاف
هو بقى فى حاجه فى الدنيا دى ماشيه مظبوط...واهمهم طبعا التعليم
وبعدين احنا السبب احنا اللى مش بنشغل دماغنا يقولونا الاخوان وحشين واحنا بنقول امين....الحزب الوطنى كويس واحنا نقول عليهم الصلاه والسلام.. بس بعون الله هنصحى فى يوم من الايام
-------
اتحاد الصيادله الاحرار
ويلكم بيكم فى دنيا الظلم الواسعه
------
mano
احنا كانت بتبقى ثكنات وقت المظاهرت علشان فلسطين والعراق بس اول مره تبقى حاميه كده علشان الانتخابات
اهو انا سبت التعليم وهو مش عايز يسيبنى

مـحـمـد مـفـيـد said...

والله وببساطه هذا هو الوطن العقيم الذي نعيش فيه
اللهم ارحمنا