انا كنت قاعده فى بيتنا كافيه خيرى شرى ولا كان بيطلعلى حس ولا صوت ولاخبر ولا اى حاجه خالص _اينعم كنت بزهق واينعم برضه كنت بتمنى اشتغل بس فى حاجه تناسب عقلى وشخصيتى مش اى حاجه وخلاص_
ولما كان بابا وماما واخواتى والجيزان اشتكوا منى ومن قرفى تكرم وتعطف بابايا العزيز بانه يوجدلى فرصه شغل زى اى أب خايف على بنته من الجنان وفى نفس ذات الوقت زهق من ركنتها فى البيت وقرر انه يطلقها على الناس علهم يتعظوا من بلوته _اللى هى انا طبعا _ ويعرفهم انى اخره اللى ميسمعش كلام الست الوالده
المهم انه فى يوم من ذات الايام لاقيت بابا بيتصل وبيقولى
(رنا ياحبيبتى تروحى بكره القسم علشان تعملى الفيش والتشبيه )
رديت وبراءه الاطفال فى عينينا
(ليه يا بابا ؟؟؟ انت زهقت منى وقررت تودينى بنفسك للقسم يخلصوا هما منى بمعرفتهم )
قالى ( لا ياناصحه هاتروحى تعملى الفيش علشان الشغل )....سكت انا شويه
وهما يعنى مش واثقين فى كلامك يابابا لما تقولهم انى مليش سوابق ولا ايه
طب ده حتى انت شخصيه مرموقه فى البلد
المهم يعنى اخدت ديلى (مجازاً ) فى اسنانى والسواق فى ايدى ورحت رحله للقسم
وهنا قابلتنى جحافل من البشر كلهم بيعملوا الفيش او بيعملوا حاجه تتعق بالتجنيد تقريبا المهم ان كلهم كانوا شباب زى الورد الصراحه
وطبعا العبده لله ماشيه متخفيه ورا نضاره الشمس مش خوفاً من الشمس انما خوفاً ان حد يتعرف عليا اكون ضربته فى اى موقعه من مواقعى قبل كده
وطبعا السواق بتاعنا ماشى قدامى بيوسعلى الطريق.....كوسه بقى
واللى يكلمه يقوله انت مش عارف دى مين...وقبل مايقولهم يخافوا ويمشوا
دخلت الاوضه بتاعه الفيش لاقيت صول كده انيق ومبتسم للحياه السواق طبعا تعامل معاه وانا برضه مش راضيه اتكلم
وبعدين قالى اتفضلى
وقام ماسك ايدى كانه هايقبض عليا
وراح مغرقها فى بتاع مقرف كده _زى كل حاجه هناك _وحطها على الورق كانه بينتقم منى لسبب لا يعلمه الا الله
وخلاص بهدلى ايديا الاتنين قمت انا بسلامه نيه بطلع من شنطتى wipes
او للناس اللى مااخدتش عربى قبل كده مناديل معطره وفيها شويه صابون
طبعا طلعتها على اساس انى هانضف ايدي بعد القرف اللى هى مش متعوده عليه
لاقيت برضه الصول المعجزه بيقولى
ياابله !!! كده هاتوسخى المنديل
وقام كما الهمام المغوار مدينى ورقه جرنال امسح فيها ايدى
نهار ابيض ...بقى انا انضف ايدى من القرف بقرف اكتر منه
قولت يلا الراجل كويس وعايز يساعدنى
قولتله لا يافندم المناديل دى معموله علشان تتوسخ
واخدت الوصل منه ومشيت
وانا خارجه بقى واحد لطيف وظريف من الجحافل اللى ماشيه بييستظرف وبيقولى
( وانتى جايه برضه علشان الجيش )
وقفت بقى وبصلته من فوق لتحت
وقولتله ...ليه وهو انا زيك؟
ومشيت طبعا وراسى مرفوعه انى فتحت عكه
وخرجت من القسم ودى كانت اول مرحله من مراحل عذاب الشغل
واللى من ويالاتها بقول
****انا اللى جبت ده كله لنفسى ****
ملحوظه صغيره جداً
احداث اليوميات دى غالبيتها حصل وبعضها من نسج خيالى وبعضها كنت اتمنى انه يحصل
يتخلها نقد صريح ومحايد تماما للبيروقراطيه والضحك على الدقون الموجود فى حكومتنا الالكترونيه
انا هنا مش بفضح
انا بقول سلبيات وايجابيات
اخلاقيات كان نفسى الاقيها فى وسط مهم جدا فى حياتنا
واخلاقيات اتصدمت انى لاقيتها
كانت معكم
رناااااااااااااااااااا....كرسى المكتب
10 comments:
موضوع الجرنال اللي الصول ادهولك.........ضحكتني اوي الحكاية دي بس حصلت فعلا واللا دي بقي اللي من نسج الخيال؟؟؟بس لو حصلت دا يدل علي غلب الناس صعبان علية المنديل ابو ربع جنيه
الاستظراف والاستخفاف دا ما اكتره وان كان من رايي انك تستنكري خالص اللي بيتكلم
وتحياتي ليكي ومدونة رااااااااائعة
مصراوى اوى
يامراحب يامراحب
منور طبعا المدونه
وبما انها الزياره الاولى ليك وانك الزائر رقم مش فاكره كام هتاخد جايزه المدونه
هاتسمع اغنيه
كل شئ راح وانقضى
بص ياسيدى
حكايه الجرنال وكل حاجه حصلت فى القسم دى واقعه حقيقيه تماما بما فيها الاستظراف والاستخفاف ببنوته ضعيفه زيي على رأى الست الوالده انها بنى ادمه وطلعلها لسان دى برضه واقعه حقيقيه
بس ان شاء الله التأليف هايبقى فى اللى جاى علشان طبعا محدش من شغلى يدخل هنا ويقرا الكلام واتفصل انا فصل تعسفى
وطبعا اللى كان لازم تستشفه من كلام اللى اتقال انه من نسج خيالى ضيق بابا وماما واخواتى والجيران بيا والمظاهرات اللى كانت فى الشارع واجتماعات جامعه الدول العربيه ومجلس الامن علشان ينددوا ويشجبوا ويستنكروا انى لسه قاعده فى البيت
بس ياسيدى
ولو ليك اى سؤال تانى انا معنديش سكورتيره تاخد منها معاد
تدخل برجلك اليمين على طول
نورت يامصراوى
ياااه تصدقى انى كنت راجعه متغاظه من القسم من أسبوع
اولا انا حاموت و افهم ليه اصلا ناخد بصمات كده
و ليه كل مره تعملى فيها فيش
مش حنتقدم فى حاجه ابدا
بالمنظر ده
انا بقى يا ستى كنت واخده تعليمات
اولا ما الراجل يقولى كل سنه و انتى طيبه
اديلو فلوس
حيدينى صابون غريب كده يطلع الكلام ده الاول
المهم المره دى الراجل خد الفلوس و ما ادانيش اى حاجه!!!
و مشيت ولا اجدع ميكانيكى محترم
لحد ما رحت اشتريت المناديل
يخرب عقلك
ده ان موت من الضحك
بس بصراحه ومش بهرج
الفيش طلع فيه حاجه
:)))
أنا أول مرة أعرف موضوع ورقة الجرنال ده
على أيامنا كانو بيحطوا صوابعنا في جاز .. هو ده اللي كان بينظف صحيح
مبروك عالوظيفه
بس ورقة الجرنان دي جديده
لكن اللي قاله المركبي صح
كانوا بيستعملوا جاز ولو اديتي الصول جوز جنيهات ممكن يطلع صابون سايل من الدولاب بتاعه
ومره تانيه مبروك
http://1minelnas.blogspot.com
دنانير
هو عموما البصمات اختراع فاشل بغض النظر عن ان المعامله مش آداميه وده الطبيعى
بس حكايه الفيش كل مره دى واضحه جدا علشان الناس السوابق اللى زى ناس اصحابى متعرفيهمش
--------
محمد مفيد
ياباشا ربنا يخلينى واضحك جنابك على طول
وانا قولتلك قبل كده هايخرب عقلى اكتر من كده يروح فين
بس الفيش الحمد لله مكنش فيه حاجه علشان طبعا انا واسطتى جامده جدا ومحدش قدر يمسك عليا حاجه
محسسنى انى خط الصعيد والله
نورت
--------
يامراكبى
مهو حضرتك مش فاهم ان الراجل الصول توسم فيها انى بنوته رقيقه وضعيفه ومش هاتسحمل الجاز
طبعا ساذج مش عارف اننا متربيين عليه
وبعدين تصدق حضرتك ان حتى حبر الفيش بقى مغشوش ومش بيثبت فى الايد
طلع من ايدي بعد يومين بس والله
-------
واحد من الناس
الله يبارك فيك
الراجل كان فاكرنى اجنبيه ومش هاعرف الجاز وبطلع مناديل معطره وكده محبش يعمل واجب معايا
نورتونى كلكم والله وبعون الله انا هفجر المصلحه اللى بشتغل فيها دى وهاخربها وهاقعد على تلها
علشان انا قدمى خير الحمد لله
هههههههههههه
بصى يا رونى , اتكلى على الله وفجرى المصلحة وبعد كده تعالى اكتبى تدوينة عن اللى حصل
حلوه يا رونى اليويمات دى
بس واضح انك داخله من اولها مش طايقه
اما بعد عشرتاشر سنه موظفه هتعملى ايه بس
بس حكايه ورقه الجونال دى مش ظريفه خالص
تحياتى
هههههههههههههههههههههههههههههههههههههههههههههههههههههههههههههههههههههههههههههههههههههههههههه.
مبرووووووووووووك يا قمر عالوظيفة ونبقى نباركلك قريب على التفجيرات الي هتعملي .....انتي بس شدي حيلك يا قمر..وانشاء الله خير..جمدي قلبك بس
بس بجد عاوزة اعرف عربيتكم طراز كام...ولا السواق بتاعكم يعني طراز صيني ولا محلي...
ههههههههههههههههههههههههههههههههههههههههههههه...
تسلمي يا قمر على المدونة القمر زي رنونة كدة...والله ووحشتني يا بت ووحشتني طولت لسانك
Post a Comment