أحلى حاجه فى الدنيا ياأولاد فعلاً فعلاً يعنى انك تقعد تقرأ الجرايد وتضحك على الدنيا ماشيه ازاى
النهارده مثلا اجمد خبر قريته فى حياتى كان فى اخبار اليوم
عن قصه حب بين حصان وحماره وحشيه نتج عنها حصان مخطط شكله تحفه
سبحان الله بجد شكله حصان بس جلده مخطط
ودى طبعا اخره المشى البطال
ويماثل الهوايه دى جوايا برضه الفرجه على اعلانات ماما سوزان ومهرجان القراءه للجميع
اللى بتطلع فيه يسرا وكريم عبدالعزيز وابوتريكه ومتعب وباقى الناس الحلوين دول
وكلهم بيحثونا على القرايه وانها غذاء الروح اللى هى للى مش عراف موجوده جوه الجسد اللى مش لاقى ياكل
قوم بقى قعد افكر فى سؤال وجودى جداً وهو انى دايما بلاقى يفط مهرجان القراءه للجميع
وعمرى ما شفت فى محافظتى _الفيوم _ اى حاجه تدل على المهرجان ده
لا فى المكتبات العامه ولا الخاصه ولا المدارس ولا حتى عند بتاع الجرايد اللى بروح عنده
تفتكروا ليه؟
هل معنى ده ان مهرجان القراءه للجميع حاجه زى بقيه الحاجات اللى فى مصر؟ بنسمع عنها مش بنشوفها؟
ولا يمكن ماما سوزان كان قصدها العيال الكتاكيت الامامير اللى بيطلعوا معاها فى الاعلان؟
بس بصراحه بوستر المهرجان السنه دى الصراحه حاجه
موز ...موز....موز
على راى عماد اديب
ام هند برضه
حاجه جامده جدا
الريس واسرته احتفلوا بعيد الثوره اللى هو 23 يوليو يوم 19 يوليو
تفتكروا معنى كده اننا هانحتفل بشم النسيم يوم العيد الكبير والعيد الكبير فى العيد الصغير
ولا دى كانت صدفه وانا اللى نظريه المؤامره معششه فى مخيخى؟
انا قولت هانقضى يوليو كله احتفالات وهانتفرج على افلام خالده وعظيمه
زى الرصاصه لاتزال فى جيبى...مع انى بغسل هدومى
والطريق الى ايلات...فظيع الفيلم ده والله
واخيرا وليس اخرا
اغنيه على الممر...هما كانوا بيحاربوا ولا بيغنوا
عادى يعنى كله عند العرب صابون
وده كان اخر حاجه فاكراها من كل حاجه كان نفسى اتكلم فيها
المره الجايه هايكون رغى طبعا
اكتررررررررررررررررررررررر
9 comments:
السلام عليكم
أزيك يا عسل
عادي يعني هي دي مصر يا عبلة
يعني شفتي مثلا موضوع أشتراكات النت الجديدة العالم كله بيرخص علشان الناس كلها تستخدم النت إحنا لا بنستنصح علي الناس رخصوا الإشتراك و الخدمة خنقوها
مجتيش علي القراءة للجميع
أنا من ساعة أما عملوا المشروع ده رحت مكتبات المدرسة مرتين تقريبا في حياتي مقلكيش تلاقي الكتب مقطعة ده لو لاقيتي الكتب و طبعا الكتب المحترمة مش للإستخدام بس علشان الأمانة ده كان زمااااااااااان أيام ما كنت بأروح و ساعات الكتب اللي بيعملوها هي حلوة بس ساعات تلاقي الكتاب مقطوعة منه كم صفحة بس متنكريش إن المهرجان السنة دي شكله روش طحن الحقيقة
ياريت ينزلو كتب حلوة
أية الرغي ده كله مش فاهم أنا
سلام
ٍعجبني البروفيل
قلت أخبط وأسمي وأخش
تناول رقيق قوي لموضوع ان ولاد الناس
موجودين بس في القاهرة والاسكندرية
فعلا مبلاقيش ده حدانا في المنصورة
هنعمل ايه؟ نصيبنا
تحياتي
يعنى انت يا رونى عايزه تتساوى بالعيال القطاقيط القمامير اللى بيطلعو فى التليفزيون مع ماماسوزان
كفايه علينا الجرايد ونقرى الاخبار الظريفه زى الحصان اللى تزاوج مع حمار وحشى ولا العكس
أم هند
انتى عامله ايه؟؟
:)))
محبتى
أنا مش فاهم أنتى زعلانة ليه , ماما سوسو بتقولنا أقرو وأتثقفوا , بطلوا بقة نظرية المؤامرة دى اللى هتدودينا فى داهية , وبعدين يعنى ايه يعنى لما أكتر ناس ممكن تبعدك عن القراية ( يسرا وكريم عبدالعزيز وابوتريكه ومتعب) هما اللى يقولوا أقروا .. اهوه أعلان هياخدوا فيه سبوبة حلوة .. سبوبة الصيف ,
بالنسبة بقة لعيد الثورة فهو دة التجدييييييييييييد على رأى الريس ستامونى .. دة غير أن رقم 19 رقم حلو وأحسن من رقم رقم 23 وخصوصا أن 23 - 10 = 13 و13 رقم نحس ..
والله مع احترامى الشديد ل الطريق الى ايلات لكن بتبقى فرصة سنوية جااااااااامدة للضحك , اه والله , أنا بضحك وأنا بتفرج على فيلم الطريق الى ايلات أكتر مما بتضحك وأنا بتفرج على اللمبى أو عوكل .. برغم أنى كنت مبهور أوى بالفيلم دة لما اتفرجت عليه أول مرة , كنت تقريبا فى تانية اعدادى
دنيا
المهم , فى انتظار تدويناتك الجديدة
سلام
بطل نظرية المؤامرة دى وبلاش تشوف اى فيلم تانى احسن
والريس يحتفل باى حاجة فى الوقت اللى هوه عايزة ولو يحب يحتفل بعيد الجزر فى موسم القلقاس يحتفل
هى دى مصر
رغم كل ما هو سئ حولنا لكن انا عن نفسي كنت مبسوطه ان بقي في مشروع القراءه للجميع ومكتبه الاسره نزل فيها كتب كتير وباسعار كويسه
حقيقي احنا اللي محتاجين نقرا عشان نقدر نتكلم بصوت وقلب جامد
تحياتي علي البوست
والله أنا مرة حضرته بس من زمان..مكنش فيه شئ مميز خالص غير القراية!! تخيلي!! يعني هو من الحاجات اللي بنسمع عنها فقط!!
شكراً..
محمد المصري
السلام عليكم
مش هتشيلي البوست ده
كل اما أدخل و أشوف لا مؤاخذه دي بحس إني في حمام مثلا
:))
عاوزين جديد
فين الكتب؟
Post a Comment