واكتب على القبر هذى امه رحلت

واكتب على القبر هذى امه رحلت....لم يبقى من اهلها ذكر ولا أثر
حقت عليهم من الرحمن لعنته...فعندما زادهم من فضله...فجروا
هذا شعر الرائع (فاروق جويده ) والذى من وجهه نظرى البائسه المأساويه يعبر ( الشعر مش الشاعر علشان مفيش كلام يعبر عن الراجل الحقيقه) يعبر الشعر عن حالتنا بمنتهى الدقه فقد كنا واشدد على كنا دى ...كنا اعظم الامم وماذا اصبحنا الان...أصبحنا بمنتهى الفخر...ولا حاجه الحمد لله
اصبح محور حياتنا الان يدور حول اننا (كنا ) اعظم الامم و(كنا) حضاره السبعه الاف سنه والتى من حقها الان ان تتبرأ من اعمالنا وافعالنا الرهيبه من وجهه نظرى...(كنا ) فخر الحضارات الى اخر هذه كلها فى الماضى ولكن الان ماذا نفعل
الان نحن ولله الحمد نبنى الكبارى والمحاور ونتبنى المشاريع الفاشله بالمعنى الحرفى للكلمه واهم هذه المشاريع ماكتب اليوم فى احدى الجرائد الحكوميه وحقيقه اثار فى نفسى التعسيه الضحك حتى كدت افقد الوعى
حسنا هذا نص الخبر..."تقنين طبع كتب الاخلاق والموسيقى...يوفر 200 مليون جنيه سنويا " الهدف الحقيقى من وجهه نظرى هو اننا نموت على نفسنا من الضحك على حكومتنا الالكترونيه والتى ادرك وزير تعليمها المغوار ان تحويل كتب المواد الدراسيه غير الاساسيه الى المكتبات للاطلاع عليها بدلا من توزيعها على التلاميد يوفر 200 مليون جنيه سنويا (يااخى بييجيبوا الارقام دى منين معرفش)
يمكن توجيهها الى دعم مسيره التطوير القائمه للعمليه التعليميه ( او تحويلها الى جيوب القائمين على تلك العمليه برضه)
ازاى يقى ياجدع هايعملوا كده انا هختصرلك الخبر علشان الضغط والسكر والحاجات دى
بص ياسيدى بيقولك هايطبعوا نسخ قليله من الكتب الخاصه بالمواد غير الاساسيه الاخلاق الانشطه التربيه الموسيقيه والزراعه وغيرها (ولمعلوماتك انا عمرى ماشفت كتب للموسيقى او ا لرزاعه او الكمبيوتر)هايطبعوا نسخ قليله ويحطوها فى مكتبه المدرسه (المهجوره بالمناسبه ) والطالب اللى عايز يطلع عليها يقدر يحصل عليها بطريقتين الاولى انه يصورها والتانيه انه يسدد ثمنها كاملا
اللى يحير بقى فى الفيلم ده ان نفس الوزاره كانت اعلنت قبل كده عن تخفيض المصاريف المدرسيه للطلبه اللى هايرجعوا الكتب دى سليمه للمدرسه اللى يضحك بقى ان الطلبه رفضوا الحل ده وباعوا الكتب لبيعين الروبابكيا وتقريبا مش بياخدوا مبلغ كبير من العمليه دى ( بالمناسبه انا عملت كده فى كتب الكليه بس لسبب انى مش طايقها قدامى) بس تفتكر الطلبه عملوا كده عند فى الوزاره؟؟؟
المهم الوزاره بتقول ان لو الطلبه كانوا وافقوا على انهم يرجعوا الكتب كانت هتوفر 800 مليون جنيه سنويا ....بص اللى جايه دى بقى
الطالب يستطيع الحفاظ على الكتاب المدرسى بحاله جيده بعد استخدامه نظرا لان الوزاره تستخدم اجود الخامات واحدث اساليب الطبع المتقدمه بما يساعد على استخدامه عده مرات اخرى ....اكيد اكيد اكيد يعنى كلكم كنتوا فى المدراس وعارفين قد ايه الكتب كانت تحفه ورائعه وقد ايه كنا فخورين اننا بنتعلم فيها ويمكن ساعات كنا بنتصور جنبها من فرحتنا بيها
الغريبه ياجدع ان الارقام دى ال 200 مليون و ال800 مليون والحاجات دى مش بتطلع غير لما مشورع كانوا ناويين يعملوه وفشل او لو مشورع عايزين يجيبوا رجلنا فيه ...او بقى يسيحوا على عجز الميزانيه بان الفلوس دى الطلبه مش راضيين يوفروها...اخص عليهم
وبنسأل احنا ليه مش بنتطور ولا بنتقدم طبعا عرفتوا السبب...طلبه مدارسك يامصر