هو فيه ايه....؟

اولا انا احب اهنئ نفسى قبل ما اهنيكم طبعا كلكم تنحتوا _ايه اللى داخله على المساء دى تهنينا وتهنينا مين والناس نايمين؟؟ طبعا ليكم كل الحق انكم تستغربوا بس والله الموضوع كبير...كبير
كنت قاعده برضه لا بيا ولا عليا بتفرج على القناه الاولى الارضيه...بابا جه بقى ومشغل الجزيره باين...المهم يعنى واذ بى فجأه الاقى برنامج عظيم الحقيقه اسمه...هو فيه ايه؟؟؟من الاول كده تحسهم ناس مش فاهمه حاجه فى الدنيا
انا طبعا مش هحاول اعرف اسم المذيع اللطيف ولا المذيعه المرحه اللى بيقدموا البرنامج لانى قررت متفرجش عليه تانى اصلا ...بس اللى حكيه ده حصل وربنا وكانوا شهود عليه ضيوف البرنامج...اللى انا للاسف مش عارفه اساميهم كامله بس هما اتنين بنات حلوين كده وينتموا لفئتنا البلوجريه
البلوجز وصلت للتليفزيون المصرى يارجاله...وبقينا حاجه كده ناشيونال ...يعنى اعتقد ان دى اول فقره فى برنامج تتعمل على فكره المدونات وطبعا انا اخدتنى الجلاله اول ماقعدت وفرحت بنفسى بقى انى بعمل حاجه الناس بتتكلم عليها...هما اه مقالوش اسم مدونتى على الهوا بس كفايه انهم بيتكلموا على ناس شفتهم يعنى شفت مدوناتهم وكده واهو هاستعبط واقول كانهم قالوا عنى...كل المشاعر الحلوه دى كانت جوايا لحد ما عرفت السبب الخفى من انهم بيتكلموا عن المدونات...طبعا بيهاجموها وبيقولوا اننا بنسوء صوره مصر البايظه اصلا وان المدونين بينقلوا كلام محصلش
طبعا فضلت متنحه وعلامات الصدمه مشرقه على وشى...هو الموضوع كده يا اولاد..الناس الكويسه...اه ياقهرتى
طلع الفيلم كله اللى اتعمل عليا وعلى البنتين اللى كانوا مستضيفنهم علشان يطلعوا المدونين غلطانين فى عرضهم لاحداث وسط البلد اللى حصلت يوم الوقفه واول ايام العيد بالصوره دى...علشان اصلا الكلام ده محصلش...وزاره الداخليه قالت كده...اللواء احمد ضياء الدين تقريبا مساعد وزير الداخليه للشئو القانونيه جه فى برنامج حلو كده برضه اسمه القصه ومافيها بتاع رولا خرسا...وقال ان اصلا القانون مفيهوش حاجه اسمها تحرش...القانون فيه تعرض ,هتك عرض, مواقعه بالاكراه,اغتصاب, وخطف انثى_يعنى انا ساعه ما اكون ماشيه فى الشارع وواحد يجيى يعاكسنى اساله الاول لو سمحت حضرتك ناوى تعمل ايه علشان لما اروح ابلغ ابقى عارفه...؟ _ماشى يابنىادمين
المهم يعنى التليفزيون المصرى والجرائد الحكوميه بيقولوا مفيش حاجه حصلت ...والبنات والستات واصحاب المحلات واللى بيشتغلوا فيها وفى اولاد كمان بيقولوا انهم شافوا الموضوع ده بعينيهم السنين اللى فاتت...بيقولوا ان الموضوع ده حصل وبيحص وهايحصل دايما ...بس كالعاده البنات بتخاف من الفضيحه ومش بتبلغ والستات بيخافوا العار وبيتعقدوا كلهم وبيبطلوا ينزلوا الشارع والحكومه برضه بترفض تصدق او تتحرك
المهم نرجع لموضوعنا المذيعه الفظيعه بجد كانت رهيبه...قعدت تتفزلك وتقول اننا المفروض نتحرى الكلام قبل ماتتشره _ياستى حد قالك تفتحى نت اصلا _والبنت تقولها الموضوع حصل ...يقوم المذيع الجبار يسالها حصل معاكى..وقبل ماتتكلم يقولها حصل معاكى فى وسط البلد ..اكيد بتقوله لا وقبل ماتقول انه حصل فى اوقات واماكن تانى يقاطعها ويقولها مشوفتيهوش يبقى متتكلميش _جتك نيله يابعيد _يعنى انا المفروض لما لا سمح الله واحد تسوله نفسه ويقولى ياجميل قبل مااخرم عينه اسحبه على مبنى الاذاعه والتليفزيون واجيب المذيع من ودانه واقوله بص شوف ده اخره اللى يعاكسنى
طب بلاش كده لو هو اخته ولا مراته اتعرضت للموقف ده هايقف يقولها صورتي اللى عاكسك او اعتدى عليكى علشان محدش يكدبنا ولا هايجرى بيها على اقرب قسم او دكتور نفسى يعالجها
ياخراااااااابى بجد اتضايقت
الراجل قاعد والست التانيه دى معاه ولا كأن اللى اتحرشوا بالبنات دول اولادهم ولا من بقيه قرايبهم...تقولش يااخويا ان النخوه اتعدمت فيه وفى عيلته من الالف الى الياء
معلش ياجماعه على طريقه كلامى بس انا اصلا مخنوقه من موضوع وسط البلد ده من زمان ربنا يجازى اللى قالى خير...وجه البرنامج ده كمل عليا
محاولوش بقى يقولوا ان المدونات دى حاجه بنخرج فيها اللى جوانا وبتجمعنا فى حاجه كويسه سواء على فكره او اغنيه او اى حاجه بس نحس اننا عايشين
لا كل اللى همهم انهم يصورونا بصوره اننا بنسئ للسياحه ولمصر واننا بنتكلم كلام خارج وخادش للحياء...قال يعنى الكلام ده مش بنسمعه فى مسلسلاتهم ولا فى اغانيهم
واللطيف بقى واحده فى البنات تحاول تفهمها ان الدنيا كلها فيها الكويس والوحش وانتى اللى تقررى تقراى ايه ومتدخليش على مدونات مين...ولا الهانم فاهمه حاجه الحقيقه كانت ناصحه اوى هى والجلف اللى كان قاعد جنبها
بجد اعذرونى انا مش بحب اشتم او اهين حد بس دمى فار ...بقيت شبه ميكى ماوس
يلا خير...معلش بس انا صبرى قليل على راى الاخت شيرين
شويه برامج تانيه زى اللى كل شويه ادخل احكيلكم عليها واولع فى التليفزيون كله
واعمل عمليه انتحاريه وافجر تليفزيونات الجمهوريه كلها
ادعولى ربنا يتوب عليا من التليفزيون وبلاويه واللى بيجرى فيه
تصبحوا على خير