خارج نطاق الخدمه

لظروف خارجه عن ارداتى طبعا ...اعتذر انى اكمل باقى الحكايات لظروف خاصه بنفسنويتى
انا اسفه بجد كان نفسى اضحكم بس للاسف لو كتبت اى حاجه دلوقتى هانكد عليكم
وهاتشفقوا عليا بقى وحاجات كده وانا مش بحب احاسيس التعاطف لان غالبا بتبقى نابعه من الشفقه
المهم يعنى انى اتغدر بيا من اعز اصحابى ولاسف ملوش حل ضيقى غير انى انسى
انا بس بطلب منكم بس ....تدعولى
ادعولى اعرف الناس بتكذب ليه
ادعولى انى ابطل اثق فى الناس
ادعولى انى افهم انا ليه حصلى كده
وده مش ندم على الصديق....ده ندم على صداقه مكنش يستاهلها
ادعولى بجد

ها نقول كمان ولا كفايه

ها يا حبايبى انبسطوا المره اللى فاتت...طب خدوا عندكم دى كمان
بما انى بنت روشه اوى زى ماانتوا شايفين ودمى خفيف اوى _يطلش الحقيقه_ وحلوه واموره واقدس الحياه الزوجيه ...مش عارفه مين اللى بيقول كده بس هما بيقولوا
المهم يعنى لينا واحده جارتنا اخدت على عاتقها مهمه تزويجى ومحدش برضه يسأل ليه
بس زى ماانتوا شايفين برضه لازم فى كل جوازه تطلعنا طنط شكريه بتاعه برايد
بس الحمد لله هى لسه موصلتش لحد طنط شكريه ومجايبها يعنى
يعنى مطولش عليكوا ولا اطول بر احتى برضه...ده بلوجى ولا ايه
طنط دى بتشتغل فى المحكمه...ومحدش يسألنى بتشتغل ايه علشان انا معرفش
المهم الاول وانا فى سنه رابعه اتصلت بمامتى _كانت اختى اتجوزت وقتها الدور عليا يعنى فى القطر_ان عندها عريس مواصفاته كالاتى
خريج المعهد العالى للخدمه الاجتماعيه _مدينه نصر( الكعب العالى لو تعروفه) وها _ وخلوا بالكم من ها دى _ ها يشتغل فى المحكمه
بس ايه عنده محل موبيلات قدددددددددددددددددددددد الدنيا
.
.
.
.
بس خلاص انتوا مستنين حاجه تانى؟
اصل دى المعلومات اللى توافرت عنه
طبعا انا قولت لا
اولا علشان انا مفهتمش هايشتغل ايه فى المحكمه بس حاسه ان المحكمه دى مفيهاش شغل اصلا
وثانيا يعنى ايه محل موبيلات
وثالثا اسمه ايه
ده كان واحد
الست برضه لسه عايزه تخدم
قامت اتصلت بمامتى برضه وقالتلها مواصفات العريس التانى
بيشتغل فى المحكمه
وعنده محل كمبيوترات
وخريج تجاره خارجيه
والمره دى قالت اسمه بس بلاش علشان الاحراج
المهم يعنى المشكله فين بقى
مهو لازم كل حاجه يبقى فيها مشكله
انه قاعد فى قريه تبع مركز من مراكز الفيوم ومفيش امل انه يستقر فى الفيوم
دى طبعا المشكله فى نظرهم
المشكله فى نظرى بقى الاتى
اولا انا ليه اتجوز بالطريقه دى واحد لا يعرفنى ولا اعرفه
ثانيا اول حاجه بيقولها اى عريس بيدخل بيتنا انه سمع عن بابا كتير وكان نفسه من زمان يناسبه
طب مايتجوز بابا طالما هو عاجبه اوى كده
واهم حاجه بقى مين قال انى هاعرف اتجوز واحد من غير مااحبه...مااتعلق بيه...أسهر طول الليل افكر فيه
طبعا فيكم اللى هايقولى زى ماما
افرض طلع كويس...هاقولك افرض مطلعش
افرض عجبك من اول مره...افرض انا معجبتوش من اول مره
افرض معجبنيش...هابقى محرجه وانا بعتذر واحتمال اكون متضرره اوى كمان ومش هاتجوز شفقه انا
طيب افرض حبنى وحبيته...عجبنى وعجبته....وحصلت اى مشكله لاى سبب وسيبنا بعض...يبقى ازاى الحال بقى
او حصلت اى مشكله وفسخت الخطوبه
هاسلم من كلام الناس بقى اللى هاتقول
والعيب كان منه ولامنها؟
اكيد فيه سر فى الموضوع؟
ومش بعيد يستحضروا روح شيرلوك هولمز علشان يعرفوا انا فسخت الخطوبه ليه
وطبعا مش هاسم من مصمصه الشفايف
وياعينى ياحبيبتى...اخص عليه المفترى
وحد يسيب القمر ده يضيع من ايده _اه انا قمر ...حد ليه شوق فى حاجه_ اخص اخص عليه
وبعدين فين احلامى انا ان واحد يموت فيا ويقول هى دى ويجى يجرى عليا ويشوق الدنيا كلها على بابايا علشان يرضى...وانا اقوله ....بحبه يا بابا
طب بلاش
الخطوبه هانقضيها نعرف بعض ...ولا هنقضيها يقولى بحبك وانا اتكسف ووشى يروح ميت لون
المهم طنط الحمد لله فقدت الامل فى اصحاب المحلات والمحكمه وشكلها هاتدور فى مصلحه حكوميه تانيه
تقولوش قاعده على قلبها فى العماره
ولا انا بايره مثلا بتدورلى على عريس والسلام
وبعدين مش العريس ده يشوفنى على الاقل ويلاقينى متعوضش يقوم يسأل عليا يلاقى اصلى طيب يتهبل عليا...انا مش فاهمه بجد
المهم يعنى على ذكر حكايه يشوفنى دى المره الجايه الكارثه بقى الفظيعه
استنوها بقى
ياجماعه الكلام ده بيحصل فعلا انا مش بألف واسألوا البنات يقولولكم

عريس مؤمن

بصوا بقى .....انا شايفه اننا نوعاً ما محتاجين للضحك شويه كتير وانا واحده من ناس كتير اوى بدخل عند (برايد_ عايزه اتجوز) اموت على نفسى من الضحك وامى تفضل تلف حواليا وتقول ايه المجنونه اللى بتضحك لوحدها....علشان كده فكرت انى احكيلكم على اللى بيحصل لينا كبنات عموما فى المواقف اللى زى دى
اول مره يحصلنا كده انا واخواتى وكانت مره فظيعه الحقيقه
اولا انا احب اقولكم اننا خمس بنات انا التانيه...والموقف ده حصل الصيف اللى قبل اللى فات...كنا فى كايرو مول بنشترى حاجات علشان فرح اختى الكبيره كان قرب وبنشترى طبعا حاجات كتير جدا وكلنا لابسين لبس البهدله بقى على اساس اننا هانقعد اليوم كله بره ....يعنى عايزين لبس مريح ومش محتاج مكواه ولا اخاف عليه يتبهدل
المهم دخلنا مؤمن اللى تحت كايرو مول انا وماما واخواتى الاربعه....طلبنا الاكل والحقيقه كنا هانموت من الجوع بعد ما المحروسه اختى طلعت عينينا فى اللف وكنا لسه هانكمل تانى
المهم قعدت انا واختى الكبيره واللى بعدى على تربيزه لوحدنا وماما واخواتى الصغيرين قعدوا على تربيزه جنبنا
علشان تبقى الصوره واضحه ليكم....انا اه عندى 21 سنه بس الواقع بيقول انى ادى تالته اعدادى بالكتير اوى واختى الاصغر منى بسنه واربع شهور شكلها اكبر من اختى الكبيره اساسا
المهم يعنى قاعدين بناكل (سندويتشات جمبرى بالكالايمارى ...وللى ميعرفش غالبا الكالايمارى ده نوع من السمك بس انا ماخدتوش فى المدرسه والراجل قالى جمبرى بالكالايمارى مفهمتش بس كنت جعانه اوى فا عديت الكلمه) المهم وطبعا كنا تلات قمرات مبهدلين قاعدين على التربيزه.....وفجأه
نلاقى واحده جات ومالت علينا وقالت
انتوا اخوات.....يااختى عليكم قمرات
طبعا كل واحده فينا حاطه صوابعها العشره فى بقها وبتاكل ومش فاضيه ترد...اختى الكبيره هزت راسها موافقه يعنى اننا اخوات
وفجأه برضه لاقينا طنط دى راحت ساحبه كرسى وقاعدت معانا على التربيزه...الاكل وقف فى زورنا طبعا وهى قعدت تتكلم
طنط: انا قاعده مراقباكم من بدرى وبصراحه عاجبنى اوى
الله يكرم اصلك ياستى بس احنا بناكل واكيد شكلنا مش عاطفى
طنط: ها ياحبايبى من فيكم الكبيره بقى _وشاورت على اختى الكبيره_اكيد انتى طبعا ياحلوه
بوسى _اختى الكبيره _: ايوه ياطنط انا الكبيره
وهى بتحشر الاكل فى بقها وبتبلع بالبيبسى
طنط: ماشاء الله ولا حول ولا قوه الا بالله...وانتى بقى ياحبيبتى خلصتى ولا لسه بتدرسى؟
بوسى_ وهى ابتدت تفهم الليله : اه ياطنط خلصت ومخطوبه
وصدرتلها الصباع اللى فيه الدبله ...الله يكسفك كنتى استنيتى شويه طيب
طنط _وخيبه الامل اترسمت على وشها_: اه انا برضه قاعده من بدرى وشايفه الدبله بس قولت اقرب اكتر ممكن تكون خاتم
ها بقى ياحبيايبى انتوا منين
انا واختى التانيه قاعدين بناكل وملناش اى علاقه ولا تدخل فى الحوار وسايبين بوسى تقوم بالمهمه دى
بوسى: احنا من الفيوم ياطنط...تعرفيها؟
طنط: اه طبعا ياحبيبتى....احسن ناس
انا اعرف اللى كان محافظ الفيوم من 13 سنه تقريبا...واحنا بقى من اسيوط وقاعدين فى القاهره ....الخ الخ الخ الخ
الحقيقه انا فاكره ان الاكل كان حلو اوى ومكناش عارفين ناكل منها المسكينه بوسى كل ماكانت تيجى تحط السندويتش فى بقها تقعد الست تتكلم تتكسف تروح مبطله اكل
بوسى : امممممم اه اسيوط امممممم اه طيب
طنط: ها بقى ياحبيبتى مش تعرفينى على اخواتك مين فيهم الكبيره اللى بعدك علشان انا عايزه اخطب لابنى منكم
بوسى: والصدمه باينه على وشها....وبتشاور عليا...دى اللى بعدى فى بكالريوس تجاره....وبتشاور على سوسو وبتقول ودى اللى بعدها فى تالته صيدله
واذ فجأه الست يجيلها ويحط عليها تقول
طنط: وهى بتبصلى شزرا ...اه لا دى شكلها صغيره اوى...وتحول نظرها لسوسو...وانتى ياحبيبتى قدامك قد ايه وتخلصى
بقى انا يتعمل فيا الفصل ده...اينعم انا لا كنت ولا عايزه اتجوز بس مش قدامى احترمينى ياشيخه شويه
بقى انا صغيره
طب دى حتى ميزه على الاقل السن مش هايبان عليا
المهم فى نفس ذات الوقت كانت ماما اخدت بالها من الست اللى قاعده تاكل ودانا وابتديت تاخد وضع الانقضاض علشان تشوف مين اللى رمت هيلب علينا دى
وطنط برضه ابتدت تاخد بالها وسالتنا
طنط: هى دى مامتكم
بوسى: ايوه ياطنط ماما واخواتى الصغيرين
طنط: ماشاء الله لاحول ولا قوه الا بالله دى زى القمر ومش شكلها مامتكم خالص واخواتكم ماشاء الله كتاكيت
وفى نفس ذات اللحظه اختى الصغيره وقعت من على الكرسى بدون سبب معروف اول ماطنط شاورت عليهم
واتفرج علينا كل الناس اللى كانوا فى مؤمن وقتها ...وهما اصلا كانوا بيتفرجوا
وراحت الست قامت وقعدت جنب ماما وقعدت تهرى فى ودانها كتير اوى
وفجاه لاقينا ماما طلعت ورقه وقلم
الست تمليها وهى تكتب
تقولوش قاعدين فى امتحان ماليه عامه ولا سياسات استراتيجيه وطنط بتغشش ماما الاجابه
واحنا طبعا قاعدين هانموت على نفسنا من الضحك
وخلص الكلام على ان طنط هاتورح تصيف فى مارينا وترجع تكلمنا علشان ابنها الكبير الدكتور اللى شغال فى السعوديه ولو منفعش عندها واحد وكيل نيابه اى واحد فيهم يشيل وخلاص
المهم بقى انا عايزه ارسملكم الصوره كامله
احنا كنا قاعدين بناكل....وعايزين نخلص بسرعه علشان ورانا الف حاجه لسه هانعملها
طبعا الامر مكنش يخلو من اصوات بتطلع واحنا بنشرب البيبسى
او المعركه الكبرى اللى هى طبعا....فتح اكياس الكاتشب...بأسنانا طبعا علشان مش معانا حاجه تانى نفتح بيها
وطبعا البطاطس اللى مكناش بنحس بيها لاننا كنا بنبلعها على طول
ورغم كده الست اعجبت بينا وكانت عايزه تناسبنا
اينعم هى متصلتش تانى...بس احنا قولنا يمكن لسه مرجعتش من مارينا
بس هى كانت قالت انها جوزت ابنها البكرى برضه من مطعم تانى بس هى مقالتش اسمه الحقيقه
علشان كده ماما كان عندها امل
ربنا يرجعها بالسلامه
قولوا يارب
الموقف ده حصلنا كلنا
لو عجبكم هاحكيلكم مأساتى الشخصيه بقى

حد يسمعنى زغروده

يا كل اصحابى البلوجريه
احب ازف ليكم الخبر التالى
خبر هايفرحكم قد ما فرحنى
هايسعدكم بعون الله قد مااسعدنى
لا لا لا مش هاتخطب لا سمح الله
لان الخبر ده هايزعل المعجبين منى
وهايزعلنى انا شخصيا
مش علشان الجواز والخطوبه والحاجات دى
بس ده هايبقى اعتراف رسمى من السلطات انى...كبرت
وبما انهم هايعترفوا انى كبرت يبقى هايعترفوا انى عقلت
ودى سابع المستحيلات
المهم يعنى الخبر بقى مش عايزه اقولكم
كليتى...جامعتى...دفعتى
قرروا يستغنوا عن خدماتى الجليله
واعلنوا رسميا
انى بقيت عاطله
الحمد لله حمداً كثيراً مباركاً طيباً
دلوقتى وبكل الفخر يملؤنى اقدر اقولكم
انى من بخره الصبخ (على راى اللمبى ) اقدر اروح اخلص ورقى
وطبعا هاوفر عليكم مهاترات انا ليه مخلصتش ورقى قبل كده
وخلينا فى انى خلاص هاخلصه
وهانضم لجموع العاطلين منكم
نبص للى بيشتغلوا ونقول ياريت
ونستنى اللى مخلصش يجيى يونسنا
انا مش عارف المفروض انبسط ولا لأ
افرح انى خلاص ارتحت لابد
ولا ازعل انى هابقى عاطله
قال يعنى كنت فالحه اوى فى الكليه
وكلام بينى وبينكم طبعا انا كنت رهيبه فى الكليه
كنت بذاكر انا واصحابى مقررات الصبح واحنا رايحين الامتحان..فى المكيروباص اللى كنا بنركب فيه
و اخد مننا رقات الحقيقه
المهم يعنى خلاص انا بقيت حررررررررررررررره
من الكليه طبعا مش بتاعه احسان عبد القدوس
وهافضى بقى وهادور على شغل بقى
ومش هلاقى
وغالبا هعمل زى كل الشباب مابتعمل
ايوه زى ماانتوا عارفين
هافتح محل موبيلات
اى خدمه
يلا حد يسمعنى زغروده علشان مش بعرف اعمل العمليه دى