ايماناً منى بالدور القويم الذى تقوم به شركه ( ام نبيل خدمات المهبول ) فى السيطره على سوق المهبول المصرى كليه وجزئيه طولا وعرضا ...ترسيخا لفكره انها شبكه المهبول الاولى فى مصر ...... وذلك تدعيما لمبدأ ان السيطره الاقتصاديه يلزمها غيابا فكريا وعقليا ...اخلاقيا وسلوكيا...وذلك بوضع عده اهداف عامه وخاصه فى نفس ذات الوقت عملا بمبدأ النجاح يلزمه معرفه والمعرفه يلزمها مواكبه وسائل تطور الانحطاط الاخلاقى واللاخلاقى فى ظل غياب اليات المراقبه وعدم تفعيل دور الرقابيات فى بناء الدوله وتفعيلها فقط فى الهيافات ...ونذكر بعضا من هذه الاهداف
اولاً: مسح الشركات التى نافست او تنافس او سوف تنافس فى يوم من الايام وفى اى مكان صحرا ان كان او بستان باستيكه روترنج ...وقطع ارجلها من الدخول فى اى سوق اخرى عملا بمبدأ " انا زى الفريك محبش شريك " ومن امثال هذه الشركات المدحوره المهزومه __ فوله فون لخدمات المهبول
ثانياً: زياده جرعه الفساد والانحطاط الاخلاقى فى ما يشاهده المواطن المصرى العبيط
ثالثاً: دفع الشباب لاستيعاب الهدف الاساسى الوحيد والاوحد من المهبول فى مصر وهو التعارف والتألف وقله الادب
رابعاً: الاتفاق مع بعض الجهات الفضائيه على تسميم الذوق المصرى بدفع عدد من ممن يقال عنهم زورا مغنييون اصحا الاصوات النشاذ فى اغنيه واحده وعدم مراعاه الشعور الوجدانى فى الانفعاليه الشعوريه لمرضى القلب والسكر والنقرص
خامساً: التشويه المتعمد للتراث الاصيل _ داليدا على وجه النحديد
وامعانا فى استخدام وتطبيق نظريه المؤامره علينا كشعب مصرى عريق لابد وان نشير الى ان مصرنا الحبيبه الان تمر بعده خطوات هامه ومنطقيه تجاه تعديلات دستوريه هامه وبناء _او هدم _ البنيه التحتيه والنص نصيه وايضا لانغفل مرورها بتلك الوعكه الصحيه والسجال السياسى الذى تعانى منه والذى لم يعرف بعد فتره حضانته او علاجا معروفا له ...قامت شبكه ام نبيل متعمده مع سبق الاصرار والترصد بتجاهل كل ما سبق والاتيان بتلك الفعله المنكره الشنعاء ...وذلك ببثها ذلك الاعلان والاغنيه المصاحبه له" احسن ناس "...متجاهله كل الاعراف والتقاليد وما نحفل به نحن المصرييون ....لذلك اليكم اعزائى القراء على حلقات مسلسله تحليلا منطقيا وموضوغيل محيادا للاعلان والاغنيه مصحوبا باستفتاء واستبيان شعبى لبحث وجهه النظر المصريه الشعبيه فى الاعلان
وقام باجراء الاستفتاء للحلقه القادمه...شباب مركز شبياب كفر ابو طشت
والان اترككم لتحليل الاغنيه
**************************************************************************
باخره تمخر عباب النيل تصاحبها موسيقى
نررررم...تاااااارررر.....ترررررررررر...ترررررررررر
ادينا بندردش...ورانا ايه...ورانا ايه...!؟
كا اجابه عن سؤال المحترم..ورانا ايه..!؟
ورانا بلد نبنيها.... نعمرها ....نسدد ديونها....نفرج عن مسجونيها...ونطرد امثالك منها
وبالنسبه للبلوزه البمبى اللى حضرتك لابسها دى انا مش هتكلم عنها علشان دى خلقه ربنا بس هى حريمى اوى ياكابتن
من حقنا نفرفش...ورانا ايه...ورانا ايه..!؟
الاخت دى بالذات وراها غسيل وطابيخ ومطنشه ودايره بس تقول
هو ده ...مسحوقى حبيبى
هو ده...مغسلش الا بيه
هو دهي ايوه ده...اللى انا عينى عليه
وبعدين سيادتك احنا منهوبين ومتبهدلين ومنفوخين وتقوليلى نفرفش...وماله ياحبيبى
نحب نتعرف....ورانا ايه...ورانا ايه..!؟
نتعرف ازاى يعنى...اعتبر ده وعد..؟
نتعرف بايه ومين وازاى؟؟؟ انت بتخاطب شباب مش ناقص بوظان اساسا ...وانا من موقعى هذا كرسى المكتب يعنى...احب اقول لاى شاب تسوله نفسه بتصل بيا يقولى نحب نتعرف
وحياه امى معنديش غير الشبشب ابو صباع
نحب نتشرف...ورانا ايه....ورانا ايه..!؟
وعلى راى المثل
وما الدنيا الا شات روم كبير
ومنين يابلدينا ...وبلدكم ايه...؟
هما نسيوا ورانا ايه...بس انا فاكره
ورانا ايه...ورانا ايه..!؟
لو حد بقى سألك السؤال ده عزيزى القارئ على طول ترد وتقوله
اى دونت سبيك انجلش ولا عربى
ولو اتزنقت اوى ياريت تقوله ساحل العاج او تمبكتو..هى بلد بس معرفش فين
بس بلاش مصر وحياه والدك والا هتلاقيه يرد يقولك
احسن ناااااااااااااااس
ام نبيل بتغطى 99% من سكان مصر...احسن ناس
طب مش بالذمه دى تبقى تفرقه عنصريه وزعزعه للامن القومى وزريعه للفتنه الطئفيه وتغذيه للصراع الطبقى والحقد الداخلى والخارجىزززطب وحمله خطوط فوله فون ينتحروا بقى ولا ايه...طب واللى معندهمش عدد ارضيه اساسا ولا اللى لاقيين يتفرجوا حتى على العدد العاديه يعملوا ايه
وبعدين نيجى بقى للاغنيه اللى ذكرت
سوهاج...برج الزغاليل...انفلونزا الطيور
بنها ...ألكوبرى...هاتدى لحبيبها طرف عينيها اللى معرفش هو فين
الاسماعليه...بعد المغربيه لان المحافظه بتفقل تقريبا بعد كده
المحله...ياسمنودى...وانا معرفش هو مين
اسكندريه...اجدع ناس
شبرا...مصر واولادها الطعمين...الاخت بتاعه الغسيل بتبيع ورد وفل فى الاشارات دلوقتى
------------- وباقى محافظات مصر
كل سنه وانت طيب راحوا مع اللى راحوا...اخدهم الوبا ياامه...راحوا فى 67 ...مهمش ام نبيل طبعا
طب مش دى بقى تبقى فعلا زعزعه للامن القومى ومصدر للمظاهرات
انا من مكانى هذا اطالب باغنيه للفيوم والفيوميه ولو حتى كانت...كوكى كا كوكى كا ولا اى حاجه تعبر عنهم
ولكن يبقى السؤال الاذلى
ورانا ايه...ورانا ايه...!؟
الحلقه القادمه يوميا محموليه بحته
Subscribe to:
Post Comments (Atom)
20 comments:
إيه ده كله؟ ده إنتي شايله منهم قوي
أحب أقولك إني متابع نشأة وتطور الشركة دي من يوم ما خصخصوا المحمول .. وهي في رأيي مش الأحسن في الخدمات .. هي الأحسن في الدعاية بس والضرب على وتر إنها اللي مصرية بجد وجد والباقي لأ
وأنا أعرف شركات تانية مماثلة في مجالات تانية برضة بتلعب على نفس الوتر علشان المبيعات وتلاقي إسمها الوطنية أو المصرية إلخ من مسميات بتدغدغ عواطف العملاء
إنسي حكاية أغنية داليدا دي .. ده بيزنيس
بالصدفة البحتة الإعلان كان في التليفزيون و انا باقرا البوست، و طبعا لم اتمالك نفسي من الضحك
لكن إحنا لسه شفنا حاجة؟ ده لسه فيه شبكة تالتة مدفوع مليارات في رخصتها بس، و على رأي واحد صاحبنا كتب مرة في الأهرام.. كل ما نتزنق نبيع رخصة محمول.. و خلي الناس ترغي و تنبسط
والله يا بنتى عندك حق
ورانا ايه ولاد الفاضية دوول
ده غير ان الشركة دى ازبل شركة محمول حصلت او هتحصل
دوول تقريبا شغالين بالنظام اليدوى .., ونظام يبطلو كل يوم كام ساعة شغل علشان يريحو السويتشات وكلام من ده
انتى جيتى عالوجيعه
بس معندكيش حق
احنا ورانا ايه ؟
عموما انا شايف هدفك من الموضوع جميل جدا ومش اول مرة موبينيل تعمل اعلان هايف وانا شايف انى فودافون عالميا ومحليا افضل
بسم الله..ها نبتدى بقى نرحب اولا بالناس الجديده ونقولهم ياالف ميت ويلكم ونقول للناس الحلوين انستوا والله
-------
يامراكبى
انا والله شايله كتير اوى والله لدرجه انى كل ما بشوف الاعلان ولا الاغنيه بقعد اضحك بطريقه فظيعه...البيزنس محدش قال عليه حاجه بس فعلا ام نبيل دى بتخدع مين دى فعلا شبكه واقعه جدا وبعدين مهو معروف عننا كمصريين برضه عقده الخواجه هاندور على شبكه المحمول الاولى فى العالم ولا ايه
نورت
---------
minesweeper
الحقيقه اسم اولا معبر جدا
وثانيا يااهلا وسهلا بيك عندنا الساقع نازل حالا
طيب وانت بتضحك كده دعتلى ولا لأ بذمتك...مش كفايه انى بضحكك فى الزمن الاخبر ده
طب فكر كده معاياثانيه لو موبنيل بتخدم 99% من سكان مصر
اكيد فودافون هاتخدم ال 1% الباقيين...شركه المحمول التالته دى بقى هانشغلها ليه....للاجانب ولامؤاخذه يعنى ولا ايه
zordaek
والنبى ياجماعه اللى داخل يكتب معنى اسمه بين قوسين ينوبكوا فيا ثواب
اقولك على حاجه بقى
انا مرضيتش اقول انها ازبل او احسن شركه او شبكه علشان محدش يقول انى بتحيز لفودافون ...بس انا احب اقول انى بشجع فودافون زى ما جوزيه بيشجع الاهلى
نورت
-------
كازانوفا
الاعلانات الهايفه كوم والعروض الفشنك كوم تانى
لو حد يعرف عرض ايوه بتاع الاقاليم اللى موبنيل عملاه العرض ده مخصوص لسكان المحافظات غير القاهره وتقريبا اسكندريه علشان يخدمهم بسعر دقيقه اقل وهما فى محافظتهم ونفس سعر الدقيقه الاصلى فى القاهره...بس ده كلامهم
اللى بيحصل بقى انهم كل شويه بيبعتوا رساله تقولك هاتتحسب دلوقتى بسعر اعلى للدقيقه او بسعر اقل للدقيقه وغالبا بتفرق داخل المحافظه من شارع لشارع
بس طبعا عادى
نورت
--------
ياجماعه الساقع والجاتوه جاى دلوقتى رحمه ونور على روح موبنيل اللى هاتروح على ايدى ان شاء الله....طبعا لو انا فى يوم اشتغلت فى موبنيل هاجى اقولكم دول احسن ناس وانا عارفاكم محدش هايفتن عليا صح
نورتوا
يخرب عقلك يارنا
ده انتي مشكله كبيره والله وانا مش عارف
بس كلامك جامد جدا جدا
عارفة الناس معذرة بردوا هو فية بديل احسن ومحدش راح لية
وبعدين هاتى ليا حد جرب يشيل محمول ويقدر يستغنى عنة
دى مشكلة فعلاا
بس هنعمل اية
والناس تجديهم فريقين فريق يقول الهيلة احلى
والتانى يقولك المجنونة
وفية فريق احتياطى
مستنى
الحلوة الغايبة
ربنا يسطر بقى
انا راى الاثنين حلوين الاثنين طعمين
تحياتى
lfدئيا إعلانات طارق نور كلها إستفزاز و بما إنه الشركة الرسمية للدعاية لشركة موبينيل فده مش جديد عليه
نفس الأسلوب في كل الإعلانات
معرفش تفتكري إعلانات فودافون في بدايتها و قد إيه كانت معبرة عن الشريحة اللي بتستهدفها
كانت إعلانات في منتهى الجدية
وحسب معلوماتي إنها غيرت لتتعاقد مع طارق نور )الله أعلم ده صح ولا لأ(
لكن الملاحظ إن إعلانات فودافون نفسها إنحدرت لنفس المستوى في الإسلوب
عموما فكرة الإعلانات اللي بتركز على العلاقة بين الشباب و البنات و سطحية التفكير بقت هي الموضة الغالبة
على جنب بقى بيني و بينك... انا متضايقتش خالص من تخوفك و لو كان ردي وصلك بعكس كده فلازم اوضحلك إني في منتهى التفهم ومش من السهل إني أقف لحد على الواحدة :)
يعني ممكن تقولي إني من عينة الناس اللي بتقدر ظروف الآخرين
ده بالإضافة إني أساسا عارفة إني تسرعت بطلبي ليكي إنك تراسليني من اول مرة أدخل فيها بلوجك
وأهلا بيكي في الجروب :)
ايه يا رونى ده
كالعاده موتينى من الضحك
بس احنا مورناش اى حاجة
ورانا ايه؟
و فى انتظار الحلقه القادمه
و فى نهاية الحلقه دى احب اسمع اغنية
البلح هتلاقيها جنب العنب على طول
بت انتي انا ليه عتاب عليكي بس يعدين
عدنا....بعد الفاصل
***********
استاذ محمد مفيد
الله يخليك انا مشكله والله ...ماما دايما تقولى انتى بلوه مش مشكله
بس ارجع واقول كل مواليد يوم التلات اللى اسمهم رنا كده
ولعلمك العباقره كلهم اسمهم رنا...مش غرور والله بس هما قالولى كده
نورت
------------
تامر
بص انا كنت بقول زيك كده اللى بيشيل موبيل بيبقى صعب يستغنى عنه بيبقى زى الادمان انا فعلا كنت مقتنعه بكده لحد من سنتين حصل ظرف كده والموبيل مكنش معايا وادينى لسه عايشه اهو
قعدت تلات شهور من غيره اتضايقت فى الاول شويه وبعدين حسيت ان الموضوع عادى وخلاص وهو رجع لوحده
وبعدين مش كفايه علينا الاهلى والزمالك هنتخانق كمان على الموبيلات
نورت
me2
والله يابنتى الموضوع مش طارق نور ولا لسه منورش ...بعيد عنك احنا اللى الهيافه بتقولنا ياهايفيين
تيجى ايه اعلانات موبينيل جنب اعلانات ميلودى ولا زووم
بس دول الحلقه اللى بعد الجايه بقى ان شاء الله
حرقتى المفاجأه انتى دلوقتى
وعلى جنب بينى وبينك
حقك تزعلى علشان انا مكنش المفروض اتكلم كده وكان المفروض اشرح وجهه نظرى بطريقه افضل من كده
يلا بكره تعرفى
-------------
mano
كالعاده المعتاده بعد الشر عليكى من الموت ياجميل....لما الضحك كمان هايموتنا يبقى ايه هايصحينا فى البلد دى
المهم انا بعتذر عن تلبيه رغبه العنب والبلح...علشان اللى لاقيته السمك السمك السمك...وطبعا انتى عارفه السمك وزفارته
بس انا بهديكى اغنيه
طفل صغير...لطيفه
اسمعيها وادعيلى
-------------------
انتظار مؤقت
البت دى انا ولا مين...؟
وبعدين عتاب ايه عدم اللامؤاخذه..؟
المهم انا بقترح انك تبعد عن البيض والسمك اليومين دول...او تقولى حضرتك مين
---------------
ياكل الناس نورتونى
انا ممكن اكون مشغوله الاسبوع الجاى بس هحاول مقطعش معاكم
مواليد يوم التلات العباقره دي بترجع للتوقيت
انتي اتولدتي الساعه كام
:))))
ممكن تبعتيلي الميل بتاعك
السلام عليكم
واضح أنك من الحاقدين من ممولين الشركة المنافسة
بصي من الأخر لو هم عارفين أن ده مش هينفعهم مكنوش عملوه هم عملوا كده لما شافو هيافتنا و تفاهتنا و أستمتعنا بركن الدماغ
يبقي عندهم حق في اللي بيعملوه
مع كل الإحترام للشعب المصري صاحب 5000 سنة حضارة
سلام
طيب بذمتك الغلط فيهم ولا في داليدا..مش تاخد بالها وهي بتغني
كده كده الاغنية دي بتنرفزني من زمان ورانا ايه لا يا ستي ورانا
المهم الشبكة يا ستي أفضالها علي المصريين كتير اوي كفاية إبتكار الجملة الرهيبة"انتي فين"عمرك كنتي بتسمعيها زمان قبل لعنة الموبايل وبعدين مؤسسةساويرس بتحاول تعمل دور اجتماعي ومسابقات قصة قصيرة وتعليم الصم وحاجات كده مرة وقع في ايدي السايت غلط وانا باكتب بوست عن التعليم ومن يومها مبطلتش ضحك
روني ابتسمي انتِ في مصر
no fear
ايه ده...انت لسه فاكرنى وكده...طب والله فيك الخير
عموما الاعلانات فشنك او مفشكنش احنا مش بناكل من الكلام ده ولسه عند كلامى انها شبكه واقعه
انا مفهمتش ردك عليا بعلامات التعجب مع انى شايفه ان كلامى كان مفسر نفسه
نورت
--------
saso
ياه يابنتى انتى فين من زمان والله
طب تصدقى وتؤمنى بالله...لا اله الا الله...الموبيل ده لعنه بابا بقى كل شويه يتصل وانتوا بقى بتعملوا ايه
انا فاكره اول يوم ليا فى الكليه بابا كان بيتصل يقولى الدكتور كان بيقول ايه فى المحاضره ...طب وانتى قعدتى فين وجنب مين وعملتوا ايه
مع انى كنت هاروح واقعد معاه فى نفس البيت بس هى لعنه الموبيلات
نورتى...متغيبيش كده بقى
رونى كعادتك الأثيرة و قدردتك العجيبة على أقتناص الضحكة من وجوه قرأئك مع تقديم قيمة جديدة كمان فى التدوينة
تحياتى ليكى يا رونى
بالنسبة لإنتظار مؤقت واضح أنه واحد بيخانق دبان وشه وبيعلق في مدونته عشان يحسس الناس إن في حد بيدخل فكبري دماغك ومتضيعيش مواهبك عليه إلا لو تسخين :))
ثانيا ( واخدة بالك إن مفيش أولاً ؟! ) بقي أغيب الفترة الصغيورة خالص دي وأرجع ألاقيكي بقيتي كده :|
واو و لول و ههههههههه ...مع إن كلامك بيفكرني بحاجات تخليني أعيط والكلام نفسه بيحمل معاني صعبة تتبلع
بس بجد أنتي عديتي ..كالعادة بس ناقصك تعملي مراجعة إملائية للبوست ...بس بجد بجد بجد ..انا ناوي أعمل مراجعة للبوستات حين ميسرة وهدور علي حاجة أحفظ عليها عنوان المدونة عشان مش يبقالي حجة
ومستني الباقي ومتهيألي أنتي مش هتشتغلي في أم نبيل لأنهم بياخدوا عينة اللي بيسمع الكلام وأنتي مش بتسمعي الكلام خصوصا لو كان غبي كده
هزعل منك لو أشتغلتي معاهم بجد ( هي هي هي )
مستني الباقي ...بقولك ايه متبعتيه علي الميل وحياتك ..)
سلام عليكم بقي وقتي خلص قبل ما أعلق بالتفصيل بس هو البوست جامد أوي ...نزلي الحلقات في الدستور ..سلام
mido2252@hotmail.com
mido225@gmail.com
بس ده سر يا غلابويه
Post a Comment