ولما كانت البيروقراطيه والروتين الوظيفى هو المهمين والمسيطر علي حكومتك يا مصر ..فمن الطبيعي جداً انه يجيلى ضغط وسكر ومش بعيد شلل ثلاثى فى اطرافى الاربعه والاربعين علشان بس اخلص ورقى
المفروض طبعا انهم كانوا قالولى على عنوان معين اروح اقدم فيه الورق...وطبعا طلع العنوان ده غلط
قالولى على عنوان تانى برضه وطلع....غلط كالعاده
(تحسهم مثلاً مش عارفين بعض وانى بتكلم عن ناس مش موجوده )
المهم قالولى بقى العنوان الحمد لله المضبوط بعد لف فى شوارع المحروسه من ضريح سعد باشا زغلول لحد لشارع باب اللوق اللى كنت طول عمرى اعرف انه ميدان وفى الاخر طلع فى شارع البستان تقريبا
رحت بقى لشخص بعينه علشان ياخد منى الورق
لاقيت الشخص ده حد مهم كده هناك والسكورتيره بتاعته هى اللى قالتلى اروح فين علشان اخلص الورق
ورحت فعلا فى نفس الدور مكتب واحد كده محترم اوى
قعد يهزر معايا بقى هزار موظفين وانا كنت خلاص جبت اخرى ومش طايقه ماما اللى كانت ماشيه معايا اساساً
*هزار الموظفين ده بقى من عينه امضي الورقه ده منى ومن الاستاذ اللى قاعد قدامي وبعدين امضيها من استاذ فى اخر الدنيا وبعدين ترجعى هنا تانى علشان تختمي الورقه
وفعلا عملت كده اكروبات والله ياجماعه
وبعدين قالولى تنزلى بقى من هنا تروحي شارع مش فاكره اسمه بس باين كان رمسيس علشان اعمل الكشف الطبى فى مستشفى التأمين الصحى...وده مشوار تانى خالص بقى
وطبعا وقفنا فى حوالى 12 ألف اشاره مرور وملقناش اى مكان للعربيه خالص لدرجه انى نزلت المستشفي والسواق قعد يلف بالعربيه لغايه مارجعت
وبعدين برضه رجعت تانى لمبنى شئون العاملين اللى كان فى شارع البستان طبعا بجرى خايفه يكونوا مشيوا وخلصوا
وسلمت الكشف الطبى هناك وقعد برضه الموظف المحترم يهزر معايا هزار الموظفين تانى
وقتها حسيت بالدم فار من عروقى وعدى مرحه الغليان وقولتله يعنى ماتقعدوا كلكم جنب بعض
ايه فايده ان كل واحد يقعد فى طرف من اطراف المبنى واتمشور انا بينكم واخس النص وانا اساسا مش ناقصه
واخيراً
وليس اخراً
استملت الامر الادارى باستلامي العمل من تانى يوم
تحديداً 27 /2 /2007
يوم مشهود طبعا
ومشيت وانا فرحانه وعاقده كل الامال والاحلام انى هاشتغل بقى شغل فظيع جدا وهاحبه وشويه احلام ورديه الهى يارب ماحد يعدمها الا لما يشتغل
اول يوم شغل المره الجايه
9 comments:
مش لو كنتى قعدتى فى البيت كان احسن
بدل الاكروبات اللى عملتيها دى
:)))))))))
ربنا يكون فى عونك
أنا مستنيه أعرف بعد كل ده الوظيفه فى النهايه ايه؟
تحياتى ومحبتى
reemoo
منوره ياجميل والله
انا اول مره اعرف دلوقتى حالا ان عندك مدونه عن الفاشون والهدوم وحاجات البنات دى
بس لذيذه والله
وبعدين يابنتى انا لو كنت قعدت فى البيت اكتر من كده مامتى كانت اتبرعت بيا فى يوم اليتيم
بصى ياستى انا بشتغل فى مصلحه الضرائب المصريه بعقد مؤقت (لحد دلوقتى ) حاجه كده اسمها مساعد مأمور متدرب
دراع المأمور اليمين يعنى
ولما ربنا يكرمنى واكبر لو مااتفصلتش فصل تعسفى هابقى مأمور ضرايب كمان 3 سنين
نورتى
لو كملتي في الموضوع ده .. هتلاقي اللي تحكيه طول عمرك من غير زهق ولا مللل .. إسأليني أنا على حكومتنا الرشيدة
إبقي شوفي تجربتي دي
http://yamarakby.blogspot.com/2006/11/blog-post.html#links
فى النهايه
الف الف مبروك
ومستنيان الساقع
تحياتى
لووول
معلش جت سليمة وخلصتي الاجراءات ..
مبروك عليكي ويا رب كمان 3 سنين تبقي مامورة ضرايب كيوت وسويت كده وحنينة علي الغلابة ..وابقي اتوصي بأحمد عز لو عندك في دائرة شغلك
المهم احمدي ربنا إن الروتين ده مريتي بيه عملي في كام يوم
لكن لو ذاكرتي كتاب الشهر العقاري اللي كان عندي امتحان فيه من كام يوم كده...احتمال يجرالك حاجة
300 صفحة اجراءات...وبعد ما امتحن تعرفي حصل إيه
بيقولوا المادة اتلغت السنة الجاية وده قرار من العميد
يعني روتين معرفتش أكمله للأخر وفي الأخر يلغوها
يلا خير..أنا المهم اني خلصت واتفرغ للأرق وللبلاوي اللي في دماغي
وابقي خلينا نشوفك يا حضرة مساعدة المأمور :))
مش عاجبك ولا ايه
الف مبروك على الوظيفه
وعقبال اول مرتب
لازم على فكرة دمغتين
كول واحده بربع جنيه
بس دمغه حمرا ودمغه صفرا
ولازم الدمغة الصفرا
تكون فاتحه شويه
كده يبقى تمام التمام
والف مبروك
مضناك جفاه مرقده
وبكاه ورحم عوده
حيران القلب معذبه
مقروح الجفن مسهده
يستهوى الورق تأوهه
ويذيب الصخر تنهده
ويناجى النجم ويتعبه
ويقيم الليل ويقعده
الحسن حلفت بيوسفه
والسورة انك مفرده
وتمنت كل مقطعة
يدها لو تبعث تشهده
جحدت عيناك زكى دمى
اكذلك خدك يجحده
قد عز شهودى اذ رمتا
فأشرت لخدك اشهده
بينى فى الحب وبينك
مالايقدر واشى يفسده
مابال العازل يفتح لى
باب السلوان واوصده
ويقول تكاد تجن به
فأقول وأوشك أعبده
مولاى وروحى فى يده
قد ضيعها سلمت يده
ناقوس القلب يدق له
وحنايا الاضلع معبده
قسما بثنايا لؤلؤها
قسما لأقوت منضده
ماخنت هواك ولا خطرت سلوى بالقلب تبرده
صعب تغيب
هاى رنا
انا حبيت المدونه بتاعتك بس للاسف انا لسه مكتشافها بس قريت كل حاجه خلصتها وعجبتنى وضحكتنى كمان بس احلى موضوع عريس مؤمن وعجبنى اوى يوميات موظفه مقهورة بس انا مش عارفه انتى ليه بقالك كتير مكتبتيش حاجه جديده مع ان واضح ان انتاجك غزير يعنى ودى حاجه حلوة اوى ان فيه مدونات تانيه الواحد بيبوس ايد اصحابها علشان يدونوا عموما يارب نشوفك قريب بقي واتمنى ان احنا نكون اصحاب لانى بصراحه حبيتك اوى
السلام عليكم
عاوزين بوست جديد
فرحة ها مش عاوزين نكد عاوزة نكد تعالي عندي
سلام
Post a Comment