كم جميلا لو بقينا اصدقاء

دوما كنت اعتقد ان الاصدقاء كنز لايفنى...بل كنت اعتقد انهم اقرب الى من اهلى وعائلتى...اصدقائى كانوا دوما بالنسبه لى ملاذى من الدنيا وبدونهم لاتستقيم حياتى ...تحملنا معا كثيرا وعانينا اكثر...كنا دوما لبعضنا فى اوقات الفرح قبل الضيق...كنا نخرج سويا لننسى الدنيا وما فيها
ولكن لست ادرى سبب انتقاء الدنيا لاصدقائى بالذات لتبعدهم عنى ...حسنا اليكم ما كنت دوما افكر فيه
دوما كنت احلم بان يكون اخوتى اصدقائى ولكن هذا لم يحدث واعتقد انكم تعلمون جميعا ان هناك فارق رهيب بين ان تون صديق احدا وان يكون احد صديقك...واليكم الفارق لمن لا يعرف
ان اكون صديقتك اى اكون قريبه منك تستطيع ان تحكى لى جميع مشاكلك واساعدك فى حلها ولكن مشكلتى انا انه من الصعب عليا جدا ان اخرج ما بداخلى لاى شخص مهما كان وسبب هذا خوفى من ضعفى امام الناس ...لذلك كنت دوما اضع اصدقائى فى منزله بمفردهم بداخلى احسبهم دوما نفسى فى المرآه والتى لا اخشى ان اتحدث امامها عما يزعجنى ...ولكننى لفتره ما ابتعدت عن جميع الناس لظروف خارجه عن ارادتى ولكننى عدت اليهم لاجد منهم من بقى على حاله منهم من غيرته الايام والليالى منهم من لازال يريدنى فى حياته ومنهم من بات يكرهنى كاألد اعدائه ...والاسباب واضحه نفوس الناس فى زماننا هذا
اعرف ان متطالباتى فى شريك ذاتى ان يستطيع ان يكسبنى كصديقه قبل ان اكون له حبيبه ...ان يجعلنى بدون ان اشعر اخرج ما بداخلى من احزان والالم سببها دنيا اصبحت امقتها وامقت العيش فيها...خسرت اناس كثيرون فيها وسأخسر اكثر..كل ماذكرته يجعلنى احس باستحاله العثور عليه
يقولون اننى السبب ...عصبيتى وانفعالاتى او تلقائيتى وسرعه تأثرى بالاقوال والافعال...واننى غالبا لا اميز الجد من الهزل ولكن الا يكفيهم مكانتهم فى قلبى الا يكفيهم انهم اصدقائى من لا اكف عن السؤال عنهم او القلق عليهم...الا يغفر لى عندهم شعورى الدائم بمسئوليتى تجاههم
حسنا اليهم اصدقائى
عودوا فلا حياه لى بدونكم...ولا مكان لك سوى قلبى لتنعموا فيه حتى ياتى من يشارككم اياه وقتها اعرف انكم ستبتعدون لست ادرى لماذا ولكننى اعرفكم لن تريدوا ان يشارككم احد قلباً ملكتموه ولكنها سنه الحياه...واعتقد انكم لن تكرهوا لى الخير
بداخلى تتردد تلك الكلمات

وعدى العمر مش خايف على عمرى
لكن قد اللى فات عمرى
ما حسيت انه فات عمرى
كأنى معشتش الماضى
جيت ابدأ من جديد عمرى
شعرك حنى بريق الماس
والقلب باقيله كتير احساس
فى ناس شافتنى وحبيتنى
وناس نسيتها افتكرتنى
وناس عشانها نسيت الناس
فى الشده بعدت وسابتنى
لسه الحياه مش عاجبانى
امشى ولا واقف فى مكانى
جايز خدتنى وودتنى
لا بعدت عنها ولا سابتنى
بس السؤال اللى يحير
عشت الحياه ولا عاشتنى؟
***********
العمر مش عايش ليا
وبعيش لناس غدرت بيا
فى حزنهم ياما اتألمت
وفى فرحهم ضحكوا عليا
مستغرب الدنيا وهى
عماله تلعب اوى بيا
من كتر ما انا شايف منها
مبقيتش خايف احزانها
كل اللى مكتوبلى بشوفه
وانا حسبى ربى...عالم بيا

العلاقه السفسطائيه بين الجنيه والميه

جلست اتصفح جريده الدستور والتى صدرت لحسن حظى يوم الاحد بمناسبه العيد...يعنى اقراها الاربع والحد ورا بعض احمدك يارب...وجدت انها افردت صفحات كثيره بداخل عدد الاربعاء والاحد عن مشكله تلوث المياه فى الدقهليه وكيف ان وزاره الصحه كالعاده غرقت فى شبر ماء ملوثه كالعاده وانها لم تعرف للان السبب الرئيسى او بالاحرى الحقيقى وراء حالات الوفاه والتسمم ...عجز الاطباء والعلماء وكبار الممرضين والممرضات عن معرفه السبب الحقيقى مع انه ظاهر جدا
ربما سيلقى الذنب على الاهالى وانهم وراء الاهمال فى الحفاظ على نظافه المياه الغير نظيفه خلقه وربما سيلقى ايضا الذنب على ابرهه الحبشى كما سخر منهم الكاتب الفظيع_ بلال فضل_ ولكن السبب الاكبر يسُأل عنه اساتذه الاقتصاد والاعمال...تنحتوا...مش فاهمين حاجه من كلامى ...طب انا قررت فى اخر ليالى رمضان اتبرع بمعلوماتى الجامده جدا عن سبب تلوث المياه ورزقى ورزقكم على الله
باعتبار اننى خريجه طازه من كليه التجاره شعبه المحاسبه...درست فى السنه الاولى والثانيه والثالثه مواد الاقتصاد..والنقود والبنوك..والماليه العامه...بنفس ترتيب السنوات...وشلت منهم الاقتصاد والماليه العامه بمعنى اننى اتفوق على اقرانى باننى ذاكرت كل كتاب منهم مرتين ...وبالطبع كان يدرس لنا الجهبذ الدكتور سامى السيد وكيل كليه الاقتصاد والعلوم السياسيه على ايامى...كان راجل كويس والله...المهم يعنى كل المؤهلات اللى ذكرتها دى تخلينى على من اكثر الناس علما بخبايا الاقتصاد المصرى وذلك كما يقول المثل القديم..العلم مش فى الراس ولا فى الكراس بل فى الكتب الجامعيه واسألوا مجرب... ولهذا من واقع خبرتى فى التعليم عامه والاقتصاد خاصه احب ان ازف لكم البشرى التاليه
السبب الرئيسى الوحيد والاوحد فى تلوث المياه سواء النيل او المياه الجوفيه او البحرين المتوسط والاحمر وفى اسوان بحيره ناصر هو سبب بسيط جدا كنت اعتقد انه لن يحتاج عبقريه مثلى لكى تراه العين واضحا ساطعا كسطوع الشمس فى اليوم السادس من الشهر الثامن...عيد ميلادى يعنى
حسنا هذا السبب وبلا فخر ولا مط ولا اطاله ولا رغى وانا رغايه هو ......تعويم الجنيه المصرى
حد يسألنى ليه؟
انا اقولكم من غير ما تسألوا...تعويم الجنيه بدايه لمن لا يعرفه هو من الاخر وبالبلدى جعل الجنيه لا قيمه له امام العملات الاجنبيه ...بمعنى الدولار سعره يرفع تلاقى الجنيه سعره فى الارض...تلاقى برميل البترول سعره بقى اغلى الجنيه ينزل تحت الارض...وهلم جرر...وعلى فكره اللى يقولك ان تعويم الجنيه غير كده يبقى مش فاهم اى حاجه ويجى عن الخبيره تعرفه
طيب دلوقتى ايه العلاقه بين الجنيه وتلوث الميه.؟؟؟
العلاقه باينه واضحه ...الجنيه بنعومه فى ايه...أكيد ميه...امال هانعومه فى بنزين مثلا ده حتى سعره ارتفع هو التانى...بس ما احنا معومين الجنيه من زمان اشمعنى دلوقتى الناس ابتدت تشتكى من التلوث...أقولكم برضه
زمان الجنيه كان مقرف كده ولونه منيل الحقيقه والناس كانت بتستخدمه فى كل حاجه من كروت المعايده لكروت السبوع ل..احمد ومنى للابد...وتحت السجر ياوهيبه ياما كالنا برتجال...وبقى ينضفوا بيه اسنانهم او يبلوا ايديهم بحاجات مقرفه كده علشان يعدوا الفلوس...بس مع كل ده يامؤمن عمرنا ما سمعنا عن حالات تلوث...علشان قرف الناس كان منها فيها يعنى الناس تعامل الجنيه اسوء معامله ولما تشرب الميه اللى اتعوم فيها مكنتش بتفرق معاها يعنى مكناش بنطلع خيرنا بره....بس ايه الجديد دلوقتى
اقولكم برضه
الجنيه بقى معدن يارجاله
الناس لاهى عارفه تكتب عليه ولا عارفه تبل ايديها عليه علشان تعده ولا عارفه تنضف بيه اسنانها...ده غير طبعا انه مش سامح باى معامله مش ادميه ليه ...والسبب الاعظم بقى ان المعدن بيصدى فى الميه يعنى لما نيجى نعوم الجنيه المعدن فى الميه هينزل منه حاجات مش مننا يارجاله ولما الحاجات دى نشربها اكيد هاتضرنا...هاتبقى ميه معدنيه واحنا مش واخدين على الحاجات دى...احنا نشرب من القله ..الزير...الحاجات التراثيه دى مش تقولى ميه معدنيه ومتكرره...كدابين علشان انا مأخدتهاش فى المدرسه
انا كده افصحت بمكنونات صدرى وعلى اى واصل منكم يقول للساده الممسوسين على الحل اللى ابسط مما كانوا يتخيلوا...بس هانقول ايه يوضع سره فى ارفع خلقه
رمضان خلص...والعيد جه...والعيد فرخه زى مابيقولوا
كل سنه وانتوا طيبين
الا صحيح ...انا حاسه نفسى بكتب مواضيع كتير فى وقت قليل...انا اه طبعا عارفه نفسى رغايه بالكهربا...بس يعنى انتوا ليكم مطلق الحريه انكم تقولولى هدى اللعب شويه...انا البلوج بتاعى كله ديموقراطيه مهو مش معقول هابقى انا والحزب الوطنى عليكم
تصبحوا على خير وكل سنه وانتوا طيبين

حل الفزوره

طبعا كلكم بتقولوا اكيد انى اخدت الطاسه الذهبيه واهرب ولا طمعت فى العربيه وقولت انا اعرف الحل اخدها واهرب بس احب اقولكم ...لست انا هذا الرجل...انا بس حبيت اديكم اكبر وقت ممكن علشان تفكروا فى الحل...ويؤسفنى اقولكم ان محدش قرب من الحل ولا من المكان بس طبعا انا اقدر اعذركم علشان اللى هاقوله كحل للفزوره ..شئ لا يصدقه عقل ...على راى شويكار ربنا يمسيها بالخير...أقولكم الحل بقى
المنظر الطبيعى الخلاب ده الباك جراوند بتاع مبنى مهم وحيوى جدا عندنا فى الفيوم
العشوئيات اللى كلكم شكرتوا فيها دى عباره عن بيوت العرب لو حد يعرفهم من سكان المحافظات او الاقاليم لانى اعتقد انهم مش موجودين فى القاهره بس علشان منحرمش حد من حاجه هاقولكم مين هما العرب
العرب هما بدو قرروا انهم ينزحوا على المدن علشان يلاقوا اكل عيشهم بيمشوا فى الشوارع بالمعيز والخرفان علشان الناس يشتروا منهم لاوقات العيد مثلا او لاى سبب وطبعا دول يعتبروا ساكنين فى عشش مش بيوت زى ماانتوا شايفين جنب الموتوسيكل كده ودول عقبال املتكم بعد الشر طبعا عايشين تحت خط الفقر بكتير ولو فى خطوط فقر بالسالب يبقوا هما عايشين فيها
انا طبعا لسه شايله مفاجاه المكان وهاكتبه باكبر خط عندى علشان محدش يشك فى نظره زى ما انا شكيت فى نظرى اول مره شفت الصور
مكان الصور دى المستشفى الجامعى للفيوم ....اه وربنا مستشفى جامعه الفيوم هو اللى عامل كده
طبعا انا عندى صور كتبر عن المنظر ده من كل الاتجاهات بس للاسف الجهاز بتاعى معاق حبتين ومش راضى يقبل الصور...خايف يفضحهم اكتر من كده...بس على مين بعون الله هافضحهم
المهم بقى المستشفى دى حكايتها حكايه...عندى صور لصيدليه المستشفى فاضيه...بمعنى فاضيه...صيدليه طويله عريضه وبيشتغل فيها 11صيدلى ومفيهاش لا بنج ولا تحاليل ولا حتى قرص اسبرين ...بس علشان الامنه فيها صفايح فازلين بالكيلو بمعنى انك ممكن تتدخل تهز طولك وتقول للصيدلى...نص كيلو فازلين لو سمحت
المستشفى سورى فى الكلمه بس مش لاقيه الحقيقه وصف تانى ليها...بتضرب فيها المجارى فيها بمعدل مرتين فى الاسبوع واداره المستشفى ولا هى هنا
وطبعا انا قولتلكم ان اعشاش العرب ورا المستشفى فا مفيش مانع انك تلاقى مثلا معزه ولا خروف بيجرى فى المستشفى مهى زى بيتها برضه ده طبعا غير الفراخ والطيور اللى بترعى فى المستشفى وسلملى بقى على انفلونزا الطيور
وبيقال بقى الحقيقه والله اعلم ان السر فى ميزانيه الجامعه انها قليله بس انا رحت بنفسى وشفت مستشفى جامعه بنى سويف اللى ليها نفس الميزانيه والمستشفى هناك مستشفى بجد مش زى اللى عندنا سورى يعنى مقلب زباله بس برضه والله اعلم بيقولوا ان اداره الجامعه بتخصص فلوس للصيدليه علشان يجيبوا فيها ادويه وبعيدن يخدوا الفلوس يعملوا بيها قاعه اجتماعات للجامعه علشان طبعا ميقدرش الدكاتره ويجتمعوا فى مبنى او قاعه قديمه لا سمح الله
بس تخيلوا بقى مدى بؤس الناس اللى بتجيى المستشفى دى ومش لاقيه حتى كيس القطن اكيد زى ناس كتير من اهالى المحروسه فى كل حته
يلا حرقت دمكم قبل العيد ...معلش واهو على راى كيارا بنت سيمبا فى كارتون الاسد الملك
اللى يعيش ياما هايشوف
يفهم حاجه يلاقى الوف
ميفهمهاش
انا كده هادى الطاسه الذهبيه لمدير المستشفى وعميد كليه طب الفيوم ورئيس الجامعه علشان هما بجد يستاهلوا
والله انا كل مااقول انا خلاص سبت التعليم ومليش اى علاقه بيه الاقى قدامى حاجه تخلينى اكره التعليم واللى بيتعلموه واللى بيعلموه كلهم بلا استثناء
يلا كل سنه وانتوا طيبين بمناسبه العيد طبعا اللى مش عارفين هايطبخوه ويخلوه امتى
فى تتر حدائق الشيطان بيقولوا حاجه جامده جدا
قالوا لفرعون ياظالم
ايش فرعنك
قال عبيدى
تفتكروا بعد كل ده العيب هايطلع فينا؟؟؟
سؤال يطرح نفسه
كانت معكم ...رنا حسام...من كرسى المكتب ...بيتنا...شارعنا...محافظتنا

فزوره

ازيكم....وحشتكم...والله وانتوا كمان
النهارده كنت قاعده بضرب المصاصه بتاعه بالليل اصل ده كيف بعيد عنكم قولت لازم ادخل عليكم بحاجه جامده جدا علشان كده جايباكم فزوره انما ايه حاجه رائعه فعلا
خليكم معايا
حد شايف الصوره اللى فوق...اكيد طبعا كلكم شايفنها ولا شكلكم لابسين نضاره زيى ...هى اه النضاره متعيبش البنى ادم بس نقول ايه فى الدماغ الشمال
المهم يعنى الفزوره بقى بتقول
لو انت غلبان
واكيد تعبان
ونفسك ترتاح فى وطن محتاج
عايز غذا
عايز دوا
عايز الوف مؤالفه
ليه ياترى
علشان طبعا ولا الحوجه للحكومه وبلاويها واللى بيجرى فيها
طيب ايه ياحلوين...طب ايه ياشطار
تفتكروا معايا كده المنظر الطبيعى اللى فوق ده يبقى ايه
المنظر ده من محافظتى....أيوه محافظتى الفيوم...باريس الصعيد...متستغربوش هما بيقولوا عليها كده الفيوم ببحيره قارونها وشلالاتها وسواقيها بس ده الوش التانىمنها
محدش يفتكر انى بفضحها انا بس بفضح حكومه مفضوحه
بس عليكم تعرفوا المنظر ده بالذات ليه نشرته هنا وبفضح بيه اى مؤسسه فى الدوله
كل اللى عليك تقرا الفزوره وتحزر
وطبعا على راى الاخت نيللى....العارف لا يعرف واللى مش عارف يتصرف
اتصرف
اه نسيت اقولكم على الجواير
الفزروه قويه وجوايزها مغريه...شقه وعربيه والجايزه الكبيره....الطاسه الذهبيه
كل اللى عليك تعمله تكتب وتقولى الصوره دى بتعبر عن ايه
معاكم يومين وبعدين اقولكم الحل
اى خدمات

صوره...صوره...صوره...كلنا كده عايزين صوره

مساء الخيييييير
والله انا احترت جدا بما ان رمضان قرب يخلص ومش هايجى تانى قبل السنه اللى جايه طبعا قولت لازم اعمل حاجه اوريتنال ربنا يحاسبنى عليها كثواب طبعا وتكون فى ميزان حسناتى ان شاء الله
بصوا بقى طبعا انا ربنا كرمنى بالدش وطبعا من ساعتها قاطعت التليفزيون الارضى طبعا ..اكيد
الكل بيسال نفسه دلوقتى ده ايه علاقته برمضان اللى قرب يخلص...خليكم معايا للاخر بس
وطبعا مش بتفرج لا على الاعلانات ولا البرامج اللهم اللى بيجوا على الدش قوم بقى لما بابا بيبقى موجود...هاتقولى موجود فين هاقولك فى البيت هاتقولى ليه هو بيروح فين هاقولك وانت مالك انت هاتناسبنا... بيشغل بقى الجزيره والرياضيه والكلام الفاضى ده وطبعا انا ثقافتى فى الكوره شبه ثقافتى فى الكيمياء التحليله ...معلش استحملوا شويه حكاوى القهاوى اللى بحكيها...فا بضطر اسفه انى افتح التليفزيون الارضى اتفرج عليه وبالذات طبعا بكار بعد الفطار...فت نظرى اعلان رائع الحقيقه خلى الدموع تجرى فى عينيا والدم يرد فى عروقى بما اننا فى رمضان يعنى....الاعلان عن تعاون اليونسيف تقريبا مع الشركه الماليه _هرميس فى جمع تبرعات لاولاد الشوراع اللى احنا مش شايفنهم ومش حاسين بيهم...اقشعر بدنك زيى...ايوه والله فيهم الخير
وطبعا لا يخفى على اى حد فيكم ان المجموعه الماليه هرميس دى بتاعه مين...مش قولتلكم انا بحب الراجل ده...الشركه جمال مبارك مشارك فيها او بتاعته مش عارفه بس يعنى هو ليه ضلع فيها
شوف الراجل من كرم اخلاقه اكيد لما شاف المسلسل بتاع حنان ترك اولاد الشوارع اتأثر بيهم لانه اكيد عمره ما شافهم فى اشاره ولا قدام مسجد لا سمح الله ولا فى شوارع المحروسه بس حس بيهم وبمشاكلهم وقال يملهم تبرعات وانا بقول نساعده
والفلوس سواء هاتروح لاولاد الشوارع او اولاد الزوات كلها اموال خير تنفق فى الخير ويعوده عليكم فى شهر الخير بكل الخير
وهينالك يافاعل الخير والثواب
ترسل التبرعات الى قصر الرياسه ..مصر الجديده...بجوار محطه البنزين
والله كان نفسى اكمل كلام بس الست الوالده بتنادى
ايوه ياماما جايه

هههههههههههههههههههه

طبعا كلكم بتسالوا ايه الهبله اللى داخله تضحك دى بس والله انا زى ماتقولوا كده كنت مغيبه الاسبوع اللى فات ده قال ايه بذاكر بعيد عنكم ...حصلت حاجات كتير اوى ضحكتنى قولت يلا اشاركم فيها
*طبعا كلنا عارفين ان 6 اكتوبر كان يوم الجمعه..عيد ميلاد ساره طبعا...وبعدين قوم الدوله طبعا عرفت وقالت ميصحش كفايه رنا تحتفل بعيد ميلاد ساره واحنا نحتفل بنصر اكتوبر يوم تانى...واختارت يوم 9 اكتوبر وقالت بقى نعمل افتكاسه جامده جدا,,,عملت ايه الدوله يارجاله فى الاحتفال بالجيش فى نصر اكتوبر....جابت تامر حسنى وهيثم شاكر قال ايه يغنوا للجيش...مش بالذمه دى بجاحه مش كفايه قارفينا او قارفينى انا بالتحديد طول فتره سجنهم كانهم لا سمح الله كانوا مظلومين ولا مثلا احنا اللى اخترعنا حكايه تزوريهم اوراق الجيش وكمان شهادات الكليات يعنى احنا نتبهدل فى الكليات وهما يزوروا الشهادات...انا مش ضد ان الواحد يغلط بس انا ضد ان الواحد يتمسكن ويعمل فيها انه ضحيه وبرئ والكلام الفاضى ده وفى الاخر يطلع يغنى للجيش وقال ايه متشكرين ياجيشنا...تفتكروا هما كانوا ماسكين عليهم ذله علشان كده طلعوا يغنوا؟
وطبعا ده يخلينى اسأل بابا عنده عسكرى غاب 15 يوم من الجيش علشان كان عامل عمليه...لو عمل اغنيه لنصر اكتوبر هايقدر ينهى فتره الجيش من غير مشاكل...ولا انتوا رايكم ايه؟
*نشرت كل الجرايد واذاعت كل وكالات الانباء خبر نجاح كوريا الشماليه فى اول تجربه نوويه ليها تحت الارض غصب عن العالم كله...طب بالذمه مش عيب كده ...كوريا والشماليه كمان اللى معندهمش لا اول ضربه جويه ولا عندهم حزب وطنى ولا عبور للمستقبل ولا عندهم اى من مقومات نجاحنا لا كان عندهم عدوان ثلاثى ولا نكسه ولا اكتوبر النصر....لا عندهم جيش قوى زى جيشنا ولا ريس زى ريسنا ولا ابن ريس زى ابن ريسنا...عملوا اول تجربه نوويه واحنا قاعدين...وعلى راى الاعلان اللى بيقول...دخل بالشفيروليه واحنا قاعدين....طلع بالشفروليه واحنا قاعدين
عينى عليك يازمن
*طبعا انا كنت ناويه مشوفش مسلسلات خالص خالص السنه دى بس بقى هانعمل ايه فى النفس الاماره بالمسلسلات ...المهم يعنى سمعت كتير وقليل عن مسلسل العندليب والسندريلا والمشاكل اللى حصلت وقت تصويرهم ناهيك طبعا عن المسابقه العجيبه بتاعه العندليب من يكون...المهم يعنى انا بس عايزه اسال ليه عبد الحليم طالع نكدى اوى فى العندليب وطالع وحش اوى وبيحب نفسه بس فى السندريلا ...وبعدين انا على معلوماتى القليله ان مش ثابت ان العندليب والسندريلا اتجوزوا يقوموا يجوزوهم ويطلعوا عبد الحليم مش هامه اللى نفسه
والله عالم فاضيه سايبين الدنيا تولع وبنحارب بعض فى المسلسلات وبعدين هما الاتنين ماتوا بقى نسيبهم فى حالهم
*طبعا انا اتكلمت قبل كده عن حلقه برنامج وجهه نظر ومشوفيتش الحلقه حقها بس المشكله دلوقتى ان بجد الحلقه كانت رائعه وياريت لو اى حد فيكم يقدر يجيبلى كوبى منها علشان احتفظ بيها يبقى عمل فيا خير كبير اوى وهشيله الجميل ده طول عمرى
* اخر حاجه بقى بجد احلى اغنيه سمعتها فى تتر مسلسل السنه دى اغنيه تتر النهايه فى مسلسل سكه الهلالى كتبها ايمن بهجت قمر وبيغنيها مدحت صالح الاغنيه رائعه وبتتكلم عننا وعلشان كده قررت اقولكم عليها وبجد الراجل ده جامد جدا كلماتها بقى بتقول احنا اهو
دى لا باظت ولا خربت
ولا جابت جاز لامؤاخذه
دى عيشه ظريفه جدا
ولا فتنه اتضربت
ولا حد بيشتكى لحظه
ماشيه والاشيه معدن
عايشين فى حريه
زمن القيود اختفى
اتحدى لو واحد يوم
اتضرب بالقفا
والناس بتختشى
ولا حد بيرتشى
الله على الحياه
بقى لونها شفتشى
ده احنا لا صوتنا اتنبح
ولا فى مالطه بندن
متفأئلين بالفقر الضنك
تعليم وعلاج وحساب فى البنك
والشقق مرميه
واللحمه بسبعه جنيه
وساعات تلاقيها بسته
والكل منتعش والكل منتشى
الله على الحياه
بقى لونها شفتشى
ده احنا لا صوتنا اتنبح
ولا فى مالطه بندن
انا بحيى ايمن بهجت قمر علشان فعلا اول مره تعجبنى اغنيه كده
والاسبوع الجاى نوافيكم بباقى الاخبار

معلش زياده غلاسه

معلش اكيد بتستغربوا انا ليه بكتب اكتر من بوست فى اليوم الواحد بس معلش ده جه بظروفه
والله انا كنت ناويه والنيه لله ادخل انام وابعد عن التليفزيون واغنيله بس تقول ايه فى شوشو _الشيطان بتاعى بس انا بحب ادلعه_المهم يعنى ساقنى القدر انى اقلب على القناه الاولى المصريه فى ساعه صفا او حظ والله مافاكره كانت اى واحده فيهم المهم يعنى واذ بى افاجأ بالسيد المحترم جمال مبارك فى برنامج اسمه وجهه نظر ..والله انا حبيت الراجل ده لله فى لله....قعد يتكلم كلام كله منطقى ولانه طالع من القلب دخل بيت الكلاوى عندى على طول وقولت هو ده اللى كنت بدور عليه طول عمرى مش علشان ازاحم الانسه خديجه عليه لا سمح الله بس بجد قولت هو ده اللى تسلمله البلد وانت مطمن...بتسالنى ليه هاقولك
اولا كلامه كله محاور هو اه مقالش 26 يوليو ولا حاجه تانى بس احنا نفهم يعنى واتكلم عن الدعم وازاى انهم هايتشرطوا على الاسر الفقيره اللى هتاخد الدعم انهم يدوا البلد قد ما هاياخدوا سالتنى ازاى..هاقولك انت ممل اوى سيبنى اكمل يامؤمن وهاتعرف لوحدك
بيقولك احنا هانديهم الدعم وهما عليهم يساعدونا فى اننا نخرجهم من دائره الفقر...شوف الكلام الجميل...يعنى الدوله تديهم رز وهما يروحوا فصول نحو الاميه...الدوله توفرلهم الدوا وهما يروحوا الوحده الصحيه...الدوله هاتوفر لاولادهم المدارس والاولاد يروحوا يتعملوا فيها...والله يا جماعه اقشعر بدنى لما عرفت اننا شعب معندوش دم ومش مقدرين النعمه
بس تعالى بقى على الكلام الجميل...قالك فى مشكله النقل انهم هايحلوها هايحلوها ولو بعد حين او 24 شهر زى الوزير ما قال...بس المشكله مش فى السكك الحديد بس لان عندنا نقل برى وبحرى وجوى ونقل بيستعبط وكله عايز يتطور ...ايدينا على كتفك ياجمال بيه ...يا ابن الراجل الطيب
والكلام الاجمل بقى...المذيع اللطيف بيسأله سؤال علشان يحرجه يعنى بس على مين رد ولا عنتر فى زمانه
ساله المذيع عن مشكله التعليم وعن ان الوظائف المطلوبه فى مصر مش بتتناسب مع التعليم الموجود...بافتراض حسن النيه ان فيه تعليم يعنى...وده بيؤدى الى اننا بنستورد خبرات خارجيه ونسيب خيره شباب البلد للتعليم...رد السيد الموقر حفظه الله بحق جاه النبى ان التعليم هايتغير هايتغير تغير كلى وجزئى وان الطالب هايحس بالفرق لانهم ابتدوا يعملوا كده فعلا ...أبتدوا يصلحوا التعليم الحمد لله اخيرا وهايتطور وهايبقى 100 فل و25 علشان خاطرى
والله لو كانوا فاتحين الهوا فى البرنامج ده لا كنت اتصلت وقولتلهم شعر فى الراجل الكريم ابن الامراء ده وبرضه كان نفسى اساله سؤال فى الجون
هايحس بالكلام ده الطالب اللى لسه بيتعلم ...طب واللى اتعلم وادمر واطحن وربنا يتولاه بقى يعمل ايه...تفتكروا اعيد التعليم من اول وجديد املا فى فكر جديد وعبور الى المستقبل ولا انتوا ايه رايكم؟؟
ده كان سبب البوست التانى وياريت لو حد فيكم يحب نص الحلقه يقراها فى شريط الاخبار بتاع القناه الاولى او يستعوض ربنا فى رصيده ويشترك فى الخدمه ومش بعيد لو بعتوا الحلقه للجماعه اللى ربنا فاتحها عليهم وعندهم لايف
انا كده جبت جاز وخلصت كلامى
اصبح على خير طبعا

اعترافات ثوريه سابقه

أحم أحم اولا احب ان انوه ان ما سأكتبه الان هو مجرد تخاريفى والتى هى سبب اننى لم انم منذ البارحه وبالطبع دخول امتحان عجيب لماده عجيبه فى كليه اعجب...ادخل فى الموضوع
بالطبع لقد ثار المثقفون مراراً وتكراراً على اتباع الدوله سياسه ملأ المعتقلات التى تتبعها مع احزاب المعارضه ايا كان وجه معارضتها ...تخرج المظاهرات السلميه والتى توافق عليها الجهات المعنيه او لا توافق لا يوجد فارق فيمارس عليها امن الدوله _او الامن المركزى ايا كان مسماه فى هذه الدوله _ هوايته المحببه فى جمع المتظاهرين وضربهم وسحلهم وعمل فيهم البدع وبالطبع لاكمال اشكل الاجتماعى للمظاهره تنتهى بايداعهم السجون الكثيره المتعدده جدا...كل هذا كلام المثقفون وليس كلامى هذا فقط نقل لما اقرؤه فى الجرائد المعارضه
نيجى بقى لكلامى
قرأت فى الجريده الرسميه بدون ذكر اسمها انه بمناسبه حرب اكتوبر تقرر الافراج عن عدد من المسجونين مش فاكره عددهم الحقيقه بس كان عددهم كويس يعنى وفى كل مناسبه قوميه او دينيه يتم الافراج عن مثيلهم نظرا للفرحه التى تعم على الحكومه فى هذه الايام المفترجه سواء بالاعياد كبرى او صغرى او بالاحتفالات الرسميه كا السادس من اكتوبر والعاشر من رمضان الساعه 2 الضهر...سورى دى الاغنيه...المهم يعنى ان الاحتفالات دى بتخلى الحكومه تنتشى علشان بتفكرها انه كان يا مكان كان فيه زمان كنا فيه بنعمل حاجه هو اه شكله مش راجع تانى وهى ..الحكومه يعنى...معملتش اى حاجه فيها بس يعنى القرعه تتباهى بشعر بنت اختها
ودى كلها مبررات تخليها تفرج عن المسجونين وده يخلينا نسأل نفسنا سؤال جامد جدا
بعد ما الحكومه تفرج عن شويه مساجين كل مناسبه قوميه او عيد ...هايفضل مين يعمر السجون ويخليها خضرا؟
يعنى يرضيكم الظباط يتخرجوا من الكليه بعد كفاح اربع سنين ويتوزعوا على مصلحه السجون ميلاقوش شغله يشتغلوها ولا مساجين يعذبوهم...ينفع كده
طب بلاش الظباط...السجون اللى اتبنت وبتتبنى وهاتفضل تتبنى دايما مين هايسكنها؟ الاشباح مثلا ولا ناقص تقولوا نستورد مساجين من اوروبا والدول المتقدمه
اه يا ظالمه يرضيكم كده تهون عليكم مصر سجونها تفضل تنش مش لاقيه اللى يعمرها...بلاش يهون عليكم المسجلين خطر والحراميه وامثالهم يفضلوا فى السجون ونخرج المعتقلين السياسيين وبتوع يسقط الاستقلال ..اخص عليكم شعب ظالم مش بيعجبه العجب علشان كده انا قررت اراجع ضميرى واستنهز فرصه الشهر الكريم واعلن تبرأى من كل معتقداتى السابقه ضد الحكومه اللى طلعت عينها وعبادتها ان الشعب يفضل هانئ دايما فى سجونا ويعمر المحروسه
انا بقالى يومين منمتش لو حد عنده راى تانى يستنانى لما اصحى

ساره اكتوبر

الناس كلهم...كلهم كلهم بيحتفلوا دلوقتى ب6 اكتوبر ويفضلوا يقولوا النصر واول ضربه جويه فتحت باب الحريه واديها كمان حريه بس انا ليا راى تانى خالص الحقيقه
من وجهه نظرى 6 اكتوبر بالنسبه ليا عيد ميلاد ساره وبس
ساره ياجماعه انتيمتى من اولى اعدادى الحقيقه شافت منى كتير واستحملت اكتر مهو برضه انا مش ملاك يعنى...المهم ساره ان شاء الله بكره هاتكمل عدد معين من السنين اقول كام ياساره ولا بلاش...انا بقول بلاش
بس المهم يعنى انا حبيت اقولها كل سنه وهى طيبه وان شاء الله كل السنين اللى جايه انا على قلبها وهى مستحمله ...انا قولتلها تدخل النهارده على البلوج وهى متعرفش ليه بس اكيد دلوقتى عرفت
ساره...كل سنه وانتى طيبه ويارب نفضل طول عمرنا اصحاب كده يارب دايما
قولوا يارب